LAVENIR CONSTRUCTIONS

السلام عليكم .
ناس كتير بتسألنا عن تفاصيل معينه واحنا بنشطب .
اهم الاسئله واكترها دايما عن بلاعه المطبخ ما بين الماضي والحاضر 😅 وناس كتير بتعترض علي بعض افكار لمجرد انها بتهد فكره في تجهيز البيت تعتبر من الاساسيات علشان كده احنا فريق عمل LAVENIR قررنا نقول مميزات وعيوب بلاعه المطبخ :
١- المميزات :-
تقريبا مفيش غير ميزه واحده وهي اننا بنستخدمها لما في مياه بتقع من حوض المطبخ نتيجه عمليه غسيل الاطباق او لما نيجي نعمل نضافه شامله متكامله فبالتالي بنستخدمها علشان تصرف المياه دي .
٢- العيوب :-
نتيجه لقله استخدام المياه فيها او بشكل اوضح مبتستخدمش بشكل يومي فبالتالي بتبقا معظم الوقت جافه وصدقوني مفيش انسب من كده للحشرات انها تكون وكر ومستعمرات اللي منها بتقرر انها تهاجمنا في المطبخ 😂.
عيب تاني :-
انها بتكون مصدر للروايح الكريهه في المطبخ نتيجه كونها متنفس للغازات والروايح الموجوده بمواسير الصرف 🤮
العيب الاخير :- ودا من وجهه نظري البسيطه شايف انه مش عيب اوي يعني ان وجود بلاعه في ارضيه المطبخ بيضر بشكل الارضيه .
وكده يبقا احنا وضحنا وبينا ليكوا مميزات وعيوب بلاعه المطبخ والقرار ليكوا 😉
وبمناسبه المطبخ ناس برده بتقول انا عاوز اعمل سقف المطبخ سيراميك 🙄
طيب مبدأيا كده احنا بنعمل الارضيه والحوائط سيراميك ليه مع انه مش شرط ولا دايما بتتعمل الحوائط سيراميك بتختلف حسب نوع الديكور المستخدم ما علينا 😃
احنا بنعمل الارضيه والحوائط سيراميك لسهوله النضافه وتغطيه المواسير وكنوع من انواع عزل الرطوبه طب ليه اعمل السقف سيراميك ؟!
مبدأيا واللي معظم الناس بتكابر فيه انه خطر جدا بس لك ان تتخيل ان حدوث اي تسريب لاقدر الله في السقف اللي فوق هيضعف الاسمنت ( الماده المستخدمه للصق السيراميك) فبالتالي هيعرض السيراميك لاحتماليه انه يقع ولك ان تتخيل بقا سيراميك بالمونه بتاعته لو وقعت علي دماغ حد لا قدر الله انا بصراحه مش عاوز اتخيل 😅 .
طب هنعمله علشان نضافه ؟! بالله عليك حد بيطلع ينضف سيراميك السقف ف المطبخ 🙄
طيب هنعمله علشان شكل جمالي 😌 .
انت متخيل فكره انك تدخل مكان سقف وحوائط وارضيه سيراميك ؟ ايه الجمالي في كده ؟
تحس انك داخل صندوق او علبه كبيره او تابوت 😫
وطبعا دايما بنسمع الصوت اللي بيبقا مليان حده دا بس انا عامله ف بيتي من عشين سنه وزي الفل .. ربنا يسترها عليك وعلي اهل بيتك عاوز اقلكوا ان فكره انه بقاله عشين سنه دا في حد ءاته يخوف 😂 وسبب اكبر اني انزله واغيره .
اتمني نكون قدرنا نوصل افكارنا ونصايحنا للناس اللي عاوزة تشطب او تعرف حد عاوز يشطب ♥️🙏
ومتنسوش الدعم والنشر علشان صوتنا يوصل للناس كلها 😅

♥️♥️🙏