Expressive Art Therapy Studio

وضع الحدود هو عملية من أربع خطوات هتحتاج منك شوية شغل على نفسك من (جواك) زى انك تصدق ان ليك حق فى انك تحترم ومسئولية من (بره) وهى انك تحمى حدودك دى، وده كله محتاج منك شوية جدعنة وشجاعة.
1️⃣الخطوة الأولى: حدد ايه اللى انت عاوزه!
لو حدودك النفسية والشخصية هشة وضعيفة فهنحتاج نتعلم مع بعض مهارة (وثيقة الحقوق) اللى هنتكلم عنها النهاردة.
حضر ورقة وقلم علشان هتحتاجهم … الوثيقة دى هتكتب فيها..
✔ ايه التصرفات اللى هتكون مناسبة ليك.
❌ وايه هى التصرفات اللى انت محتاج تاخد فيها قرار مختلف بوضع حدودك.
• ايه هى السلوكيات المقبولة بالنسبة لك فى علاقتك مع والدتك العزيزة.
• ايه هى السلوكيات اللى بتجور على حريتك.
• ايه السلوكيت اللى بتحس معاها بإنتهاك سواء بقي نفسي او جسدى.
• ايه هى الحاجات اللى انت معندكش مانع انك تعملها لو هى طلبتها.
• وايه الحاجات اللى هتحط حدود فيها؟
كمثال:
◀ مفيش مشكلة لو أمى دخلت عليا الأوضة من غير ما تستأذن!
◀ هل مسموح لها تتصل بيك وانت في شغلك .. فى جامعتك .. مع أصحابك.. لو مفيش حاجة ضرورية!
◀ هل مسموح انها تتصل بيك فى وقت متأخر.. لو مفيش حاجة طارئة!
◀ هل مسموح لها تاخد حاجات خاصة بيك من غير ما تستأذن!
◀ تقرأ الرسايل على تليفونك؟ تفتحس الواتس اب .. الفيس بوك إلخ
◀ لما تكون عندك فى بيتك .. أوضتك هل مسموح لها تفتح دولابك تشوف في ايه أو تعيد ترتيب حاجات تخصك؟
إفتكر دايماً أنه من حقك فى أى علاقة إنك تُحترم.. مشاعرك تُحترم.. أفكارك تٌحترم.. مساحتك الشخصية الخاصة تُحترم.. اختلافك وتفردك يُحترم.. ومن حقك كمان توقف أى معاملة مش مناسبة ليك ( نقد ، لوم ، نصايح....).
◀ ومهم جداً جداً إنك تحافظ على حقوك دى بإنك تحط حدود، اكتب الجملة دى على ورقة كبيرة وعلقها قدام عينيك "تحمى الحقوق بالحدود".
ماينفعش حد يقرب من نفسك أو جسمك أو مشاعرك بدون استئذانك وموافقتك ورضاك.. ماينفعش تسمح لحد حد يلومك أو يحسسك بالذنب على حاجة انت مالكش يد فيها.. ماينفعش حد ياخد منك حاجة انت مش عاوز تديهاله؛ ان شالله تكون كلمة.. ماينفعش حد يتدخل أو يتطفل فيما يخصك ولا يعنيه.. من حقك محدش يبتز مشاعرك أو يستغلك أو يجي عليك.
◀ مش مقبول أبداً انها تتكلم معاك بطريقة فيها صريخ وزعيق أو تستخدم لغة فيها تهديد أو إساءة لفظية، او إساءة جسدية.
◀ من حقك تطلب منها انها توقف لوم وانتقاد وانتقاد.
◀ من حقك انك توقف النصايح اللى بتقولها لك مدام مطلبتهاش.
أنت شخص بالغ وعندك مسئولية واختيار، وتقدر تعرف حقوقك و حدودك النفسية والجسدية والعاطفية " هات ورقة وقلم واعمل قايمة بإيه هى السلوكيات اللى عاوز تحمى حدودك منها خليك زى القنفد اللى عنده شوك اللي مبيسمح لحد انه يأذيه – الشوك ده هي حدودك - ".
اكتب القايمة وخليها قدام عينك طول الوقت ومش ضرورى تحط حدودك كلها مرة واحدة ومش مستحسن اوى بصراحة مع الأمهات النرجسيات ، اعمل ده على مهلك وبتأنى واعرف ان فيه تمن هيدفع!
التمن ده ممكن يكون زعل.. ممكن يكون خصام.. ممكن يكون بُعد وهجر وانفصال..
التمن ممكن يكون وحدة.. ممكن يكون فقد.. ممكن يكون صعوبة نفسية أو اجتماعية أومادية.. بس الحقيقة كل ده أرحم من ان التمن يكون نفسك..
علشان كده فى الخطوة دى، زى ما هو مهم إنك تصدق وتتأكد إن حدودك دى حقك مهم كمان تعرف وتتوقع التمن اللى هاتدفعه.. وتشوف إنت مستعد لدفعه ولا لأ.. وتحسب هل هو ده الوقت المناسب ولا تستنى شوية.. وتحط قدام عينيك تصور واضح - بقدر الإمكان- عن اللى هايحصل بعدها..
نوره حسن
أخصائية نفسية إكلينيكية
مقالات هى لهدف التوعية وليس التشخيص.


You're not crazy, It's your mother