Dr. Reham Ragab

الحقيقة الوضع أصبح فوق الاحتمال.

الأخبار اليومية عن ستات وبنات بتنهي حياتها وهي في أعلى مراحل اليأس شيء مفجع وقاهر وحزين.

إن شاء الله هنعمل جلسة علاج نفسي جماعية أونلاين للسيدات فقط مجانا.

هنسمعك كويس جدا وهتقولي كل حاجة مش عارفة تقوليها لحد ..
مش هنديكي مسكنات مؤقتة ومراهم علي الجرح،
لكن هندخل في العمق ونعالج الجرح من جذوره بإذن الله تعالى.

لو بتفكري تنهي حياتك وتقفلي اللعبة،
احنا حاسين بيكي جدا ..
طالبين منك بس تدي نفسك فرصة أخيرة معانا قبل اتخاذ القرار.
وخلينا نتكلم.

إحنا مين؟
سيدات تعملن في مجال الصحة النفسية.
هننزل التفاصيل كلها قريب جدا.

بس النموذج ده عشان صوتنا يوصل بسرعة لكل ست في المرحلة الحرجة دي من حياتها.

من فضلك املي النموذج وهنتقابل قريب جدا.

لو قريت الكلام ده ولقيته مش لامسك ولا يخصك،
ساعدنا بشير من فضلك عشان يوصل للي يخصهم. 🌹

اللهم هذا العمل خالصا لوجهك الكريم، فتقبله منا.

"لسا فيه أمل!" لكل سيدة فقدت الأمل وعلي وشك إنهاء حياتها .. تعالي نتكلم في جلسة أونلاين مجانية سيدات، ونتعرف أكتر علي الألم اللي جواكي ونساعدك تتخطيه.

١- العلاقة غاية في حد ذاتها:
اننا نكون هدفنا اننا نتجوز. وصلنا للجواز؟ خلاص كدة. جيم اوفر. 😂 عمرنا ما قعدنا نتناقش في حياة ما بعد الجواز. هنعمل ايه وليه؟ شكل علاقتنا؟ ادارة البيت؟ الأطفال؟ المصاريف؟ ادارة الخلافات بيننا؟ هدفنا ايه اصلا في الحياة؟ رايحين لنفس الاهداف ولا كل واحد عنده هدف مختلف؟ ولا مفيش اهداف اصلا وبنصحى نشوف الكلام على ايه؟ 😂

مقضيين الخطوبة كلها كلام ف التجهيزات كل حاجة مركزة على مرحلة ما قبل الجواز. أما بعد الجواز ده ربنا يتولاه بقى. 😂 المشكلة يا عزيزي ان مفيش ثابت والتغيرات كدة كدة هتحصل. وإن لم تدير التغيير في الاتجاه الذي ترغب فيه، سيديرك التغيير انت واللي يتشدد لك في اتجاهات لا ترغب فيها. 😂😂😂 جملة عميقة دي اقراها تاني.

٢- العلاقة جزء من حياة الرجل، وكل حياة المرأة:
ليه فيه رجالة كتير لا بتلبس دبل ولا بتحط صور مراتتهم وعيالهم ع السوشيال ميديا ومحدش يعرف حاجة عن حياتهم الأسرية.. في حين ان ستات كتير بتقلب بروفايلها كله (زوجي أعظم انتصاراتي) وهي لسا مقابلاه الخميس اللي فات ومتعرفش حاجة عنه أصلا، ثم انتصارات ايه انتي كسبتيه في غزوة بدر؟ 😂

عزيزتي الست،
لا تجعلي حياتك متمحورة حول الرجل مهما حصل، هتملّي وهو هيملّ و هيتخنق و هيطفش. ولو مطفش برة العلاقة/ الجوازة كلها، هيبقى طفشان من مقابلتك ومكالماتك ومن البيت بعد الجواز وهترجعي تشتكي انه غايب عن الجوازة.
استمري في اللي بيفرحك في حياتك، وأنا هنا لا هقول اشتغلي ولا متشتغليش دي تفضيلات شخصية، انما استمري ان يكون لك حياة وحاجات تعمليها وصحاب تقابليهم وغيره. انشغلي عنه شوية ومتركزيش معاه اوفر.

٣- احنا مختلفين في الأمور الكبرى ولم نتناقش فيها او لم نختبر الأمور دي جيدا قبل الجواز، أو ظهرت لنا علامات طنشناها في سبيل الحفاظ على العلاقة:
هو بتاع شرب وسهر وانتي محجبة وبتصلي بتحاولي تحافظي على دينك.
هي بتشتغل ١٢ ساعة في اليوم وانت عايز ست تطبخ وتنضف وتقعد في البيت تستناك.
انتي شخص رياضي وعندك تمارينك وهو شايف ان دي رفاهيات ومصاريف ملهاش لزمة.
انت نص شغلك علاقات عامة وهي شكاكة وبتراقبك ومش عايزاك تكلم ستات ولو في الشغل.
فيه أمور خلافية كبيرة هيستحيل معها الحياة بين الاتنين، ومش معناها ان حد فيهم وحش والتاني حلو. هما بس مش مناسبين لبعض. ف نحاول نعرف نفسنا وايه المناسب لينا من بدري.

٤- أحد الطرفين شايف نفسه دايما صح وعمره ما بيراجع نفسه:
الحائز على مفاتيح الحق والباطل اللي عمره ما بيغلط ودايما التاني الغلطان ولازم يعدل من نفسه عشانه، هو شخصية لا تعاشر سواء كان راجل أو ست.

وللحديث بقية. 🌷