dr.Mona farouk

* كلام لأى حد بيقوم مفزوع من النوم وخايف..
طيب ليه بنقوم مفزوعين من النوم (الفزع الليلي) ليه أسباب علمية ونفسية ذى ​اضطراب القلق: لو يومك مشحون بتوتر، عقلك مش بيفصل وقت النوم و بيترجم الضغط ده لصور مرعبة وكوابيس. كمان
لو فى ​ارهاق جسدي: نقص النوم أو النوم المتقطع بيخلي المخ يدخل في مراحل نوم غير مستقرة، وده بيسبب "الفزع".
​المشاكل النفسية: الاكتئاب أو الصدمات بيخلوا العقل الباطن "يفرغ" الشحنات دي في صورة أحلام مزعجة.
فى كمان ​أسباب عضوية: أحياناً ضيق التنفس وقت النوم أو مشاكل القولون بتخلي الشخص يصحى مخنوق ومفزوع.
طيب وليه بتخاف من أحلامك!..
احيانا بتصحى من النوم متعرق و ضربات قلبك سريعة، عندك زعر وخوف شديد لمجرد إنك شوفت "حلم وحش" أو شوفت أحد المتوفيين من المعارف او الأقارب في منامك. ومش عارف إيه سبب شعورك بهذا الخوف مع إنك عارف انه حلم مش حقيقة
تعالى​ أفهمك....
عايزه انبهك اولا إن أغلب اللي بتحس بيه ده أوهام ملهاش علاقة بالواقع ليه ...اسأل نفسك :
​هل رؤية المتوفي فى المنام معناه اقتراب الأجل؟...لأ طبعا .لأن بالمنطق كده الميت في دار الحق، واحنا في دار الفناء. رؤية المتوفي غالباً بتكون نتيجة اشتياق مدفون في العقل الباطن، أو مجرد تفكير فيه. وده بيخليك تعيش في نكد وقلق دايم ويحرمك من طعم الحياة والتفكير بنهاية الأجل..
​ الحلم المرعب ده "فقاعة" ملهاش أي سلطة على عمرك أو مستقبلك، ومهمتها الوحيدة إنها تخوفك وبس.
​طيب إزاي ترتاح وتوقف الكوابيس دي؟
​قبل النوم بساعة، ابعد عن الأخبار الكئيبة والموبايل، وحاول تهدي أعصابك. كمان أبعد عن المأكولات الدسمة والاكلات الثقيلة وكف عن الطعام قبل النوم على الاقل بساعتين والأهم هو ان يكون عندك
​يقين بالله: ومفيش حلم في الدنيا يقدم ولا يأخر لحظة في عمرك. ممكن تستعين ب​التحصين والاستعانة بذكر الله ده بيعطيك راحة نفسية قبل النوم ويقودك لنوم هادئ ومريح.
​ وهتلاقي اى حلم مزعج اختفى مع الوقت...
​الخلاصة :
الأحلام هي مرآة لحالتك النفسية مش كتاب للمستقبل. لو قلقان، تعبان، أو مضغوط، طبيعي عقلك يصورلك كوابيس. استعيذ بالله، وطمن قلبك، وعيش حياتك.. فالله أرحم بك من أن يخيفك برؤيا...

♤اقرأها بعقلك وقلبك♤
مفيش حد بيغير حد
ومفيش حد بيحب يعترف او حتى يقتنع انه غلطان
قليل قوى اللى بيقول انا اسف او غلطان وسامحني.. الكِبّر واخد الناس فى حتة مفيش حد أحسن من حد
¤عشان كده ¤
نفسيتك اولي بالاهتمام من انك تثبت انك صح وتحارب ان وجهة نظرك توصل لحد مش فاتح إشارة الاستقبال أصلاََ
اشتري دماغك وراحه بالك و أنجى بصحتك النفسية
احنا مش هنعلم الناس الاصول ولا النخوة ولا الشهامة ولا......
احنا حنشاور بس واللى يأخد مننا اهلا به واللى مش فارق معاه مش حنبص عليه ونمشى ومش حنلتفت ورانا ...
الطريق مفتوح والسكه سالكة بدون اللى بيعطلونا وبيحبطونا ويصعبوا الحياه علينا ويسممونا بأفكارهم
اعملوا بلوك عادي جدا
لاي حد بيتعبكم
راحه البال أهم من استجداء مشاعر ناس فقداها اصلا
متجادلش مع ناس دماغها مغلق لما يجادلك قوله آه تصدق انت صح
مكنتش فاهم النقطة دى وخلص القاعدة واقلبه اشتري صحتك وقوم امشي وقول سلام عليكم
فى اي قاعده تهدك نفسيا او تقل منك او تشحنك بطاقة سلبية
اهررررررررب من
الشكاي البكاي اللوام اللى شغلته الطاقه السلبيه و بث السموم
قول له ربنا يصلح حالك وحالنا واقطم الكلام سطح العلاقات مع الناس دى ..
روق دماغك واشتري نفسك و بلاش الجدعنه الزياده مع الناس عشان دى بتوديك فى حتة تانيه صعب ترجع منها وخاصة ان معظم الناس دلوقتى ماتستاهلش
■واهم حاجة ■
ما تحطش ناس فى مكان مقدس للأبد ..لان الناس بتتغير وتتحول مره واحده او على مدار الوقت وهى دى سنة الحياة التغيير انت نفسك بتتغير من غير ما تحس راجع مراحل عمرك حتلاقيك كذا نسخه معدله وولا واحده تنتمى للنسخة الاصليه...
المهم اننا نتعامل بما يرضي الله وخلاص
■الخلاصه■
اهرب بنفسيتك و راحه بالك من الخذلان ووجع الدماغ وكسر القلب واي حاجه تضايقك
واطلب من الله الثبات على الطاعة والنجاة من شرور خلقة... دمتم بالخير دائما.. .. ..
د/منى فاروق إمام