Visual Merchandising Eye

📌 ايه الفرق بين :

1__Up Selling
2__Cross Selling
3__Down Selling

📌 إيه دورك كVM؟
📌 ليه أساليب (تكنيكات) البيع دي مهمة وبتأثر على ايه؟

📌 أولاً ال Up Selling

▪️كلمة أب سيلينج معناها رفع قرار الشراء للعميل
▪️هو إنك ترفع اختيار العميل لنفس الفئة لكن بمستوى أعلى في السعر والقيمة

يعني ايه الكلام ده ؟

⭕️ مثال:

عميل اشترى جاكيت ب 2000 جنية انت أقنعته بجاكيت أفضل في الخامة والقصة وسعره 3000 جنية انت كده عملت Up Selling

انت هنا حسنت اختيار العميل من نفس الفئة لحاجة أعلى في السعر وأفضل للعميل كقيمة سواء كانت خامة أو قصة أو غيره

⭕️ دورك ك VM

إن حسب البلانوجرام الصحيح ف القطع اللي سعرها عالي بتعرضها في ال A placement

📌 ثانياً ال Cross Selling

▪️كلمة كروس سيلينج معناها البيع التكميلي
▪️هو انك تضيف قطعة او قطع مُكملة للقطعة اللي اشتراها العميل


⭕️ مثال:

عميل اشترى بنطلون جينز انت عرضت عليه تيشيرت وجاكيت وشوز عليه والعميل اشتراهم او اشترى قطعة منهم مع البنطلون

العميل اقتنع لانك اديتله قطع بتتماشى مع القطعة اللي اشتراها وظيفياً يعني كملتله الأوتفيت اللي رايح بيه المناسبة زي اول يوم الجامعة مثلا، مبيعتلهوش بشكل عشوائي

انت كده عملت Cross Selling

⭕️ دورك كVM

لتسهيل ال Cross Selling

ال Vm بيشتغل بال Cross Merchandising العرض التكميلي علشان تسهل الاختيار على العملاء وعلى السايلز في مساعدة العملاء

وده بيظهر في انك تشتغل على بناء الأتفيت في المتجر
وطريقة الكومبينيشن

📌 ثالثاً ال Down Selling

▪️كلمة داون سيلينج معناها الهبوط بالبيعة
▪️هي إنك تنزل باختيار العميل علشان تحافظ على البيعة لأن العميل ممكن يكون :

مش مقتنع بالاختيار اللي عندك
أو القطعة سعرها عالي بالنسبة لامكانياته
أو عندكم موديلات كتيرة وتاه وسطهم

هنا بتنزل بالبيعة علشان تقلل من مقاومة الشراء وتزود فرصة إغلاق البيعة لما العميل يرفض السعر أو القيمة اللي متقدماله مقابل السعر

⭕️ مثال:

عميل عجبه بدلة سعرها عشرة ألاف جنية والسعر أعلى من البادجت اللي حاططها لبدلة تقدر تنزل لبدلة قريبة منها أقل سعراً لضمان البيعة انها متطيرش

دي محتاجة حرفية شديدة علشان بيكون صعب تبيع الأقل جودة بعد الأفضل جودة

بيكون مهم الحفاظ على قيمة اللي بتبيعه في نظر العميل ميحسش فرق كبير بين الاختيارين

⭕️ دورك ك VM

العرض وفقاً لل price ladder

هي طريقة تعتمد على عرض الموديلات المتشابهة مع بعض بأسعار مختلفة وبتكون أفضل مع الموديلات اللي ربحها مرتفع زي البدل

بحيث ان العميل مثلا لو جاي الفرع محتاج بدلة كحلي

يجي يلاقي البدلة الكحلي الصوف الإيطالي ال Premium price

والصوف المحلي ال Medium price

والبدلة البوليستر ال Low price

▪️الPremium price سعر عالي
▪️الAverage price سعر متوسط
▪️الLow price سعر منخفض

والطريقة دي هفصل فيها بعدين أكتر

📌 ليه بُتستخدم أساليب البيع دي وبتأثر على ايه؟

كل تكنيك من دول بيأثر مباشرة على أرقام المتجر حيث أن :

▪️الUp Selling = بيزود قيمة القطعة المُباعة

وده بيأثر على ال (ASP) متوسط سعر البيع

▪️الCross Selling = بيزود عدد القطع المباعة

وده بيأثر على (UPT) متوسط القطع في الفاتورة

▪️الDown Selling = يحافظ على البيع لكل العملاء اللي دخلوا

وده بيأثر على (CR) معدل التحويل

⭕️ طيب السؤال اللي كان بعده أثاره يوسف في الكومنتات تفتكر لو العميل اشترى تيشيرت والسايلز باعله تيشترت تاني كده ده يسمى ايه؟

📌 عرفنا إن الدينم هو الخامة اللي بتتصنع منها الجينز ولكن كان السؤال اللي بعده طيب ما الدينم بيتصنع أساساً من القطن كده نفهم كلمة دينم ازاي؟

📌 عايزك تفرق بين حاجتين مهمين جداً فيهم خلط شديد وهما الفرق بين ال

▪️الFiber الفايبر
▪️الFabric الفابريك

كلمة فايبر معناها الخامة الأولية قبل آي معالجات

مثال : القطن

كلمة فابريك معناها القماش اللي اتكون من الخامة الأولية دي

مثال : قماش الدينم

لكن القماش ده مش بيتعمله نسج بس علشان اقول عليه انه خلاص يطلق عليه دينم ، ده بيعدي بالمراحل الأتية :

📌 مراحل تصنيع القطن ل لدينم

▪️أولاً ال Fiber :

هو المادة الأولية والخامة الخام واللي هي في مثالنا هنا القطن

▪️ثانياً مرحلة ال Yarn :

معناها مرحلة الغزل اللي بيتغزل فيها القطن ويتعمل خيوط

الخيوط دي قسمين

▪️Weft: الخطوط العرضية [ اللُحمة ]
▪️Warp : الخيوط الطولية [ السُدى ]

▪️ثالثاً مرحلة ال Dying

معناها مرحلة الصباغة

بيتم فيها صباغة الخطوط الطولية بس باللون الأزرق وبيتساب الخطوط العرضية بيضاء وده اللي بيخلي الدينم أزرق من بره وأبيض من جوا

▪️رابعاً مرحلة ال Weaving

معناها مرحلة النسيج
الخيوط دي بتدخل مرحلة النسيج

⭕️ [ معلومة مهمة عن مرحلة النسيج ]

[ كل طريقة بيتداخل فيها الخيوط دي مع بعض بمادة خام أو أكثر من مادة خام مختلفين بشكل مختلف وبأعداد مختلفة بتدي خصائص مختلفة للقماش وبيكون ليها اسم مختلف وعلى قد ما تقدر تعد عد أعداد لا حصر لها من طرق النسيج ]

نرجع لمثالنا في طريقة نسج الدينم الدينم بيتنسج بطريقة اسمها ال Twill تويل

الطريقة دي بيكون الخطوط العرضية بتعدي من تحت 3 خطوط طولية وبعدها تطلع من فوق واحد

وفي نفس الوقت كل صف من الخيوط تحته بيرحل يمين علشان في النهاية يدي الشكل المائل اللي بتشوفه في الدينم زي الصورة

▪️خامساً ال Fabric

معناها القماش المنسوج النهائي المُعالج

⭕️ دي كده المراحل الأساسية كل مرحلة بيكون جواها تفاصيلها الفنية

▪️سادساً ال Garment

معناها المنتج النهائي وهو في حالتنا هنا البنطلون الجينز وده بيدخل بقى في مراحل تصنيع تانية مختلفة ومعالجات مختلفة علشان يوصل لمرحلة انه يكون منتج نهائي جاهز

يبقى كلمة دينم في النهاية بتساوي =

1__القطن اللي اتغزل واتحول لخيوط

2__الخيوط اللي اتصبغ منها الخطوط الطولية باللون الأزرق النيلي فقط واتساب الخطوط العرضية

3__ اللي اتنسج بطريقة ال Twill التويل اللي بتظهر على القماش كخطوط مايلة

4__اللي النسج بالطريقة دي اداله خصائص مهمة زي المتانة وقوة التحمل

5__اللي تم استخدامه لصناعة يونيفورم يتحمل شغل عمال المناجم وتم تسميته جينز وده ليه مراحل تصنيع بقى تستكمل بعد كده

⭕️ وبعد كده اتحول لأيقونة ملابس عملية في عالم الموضة

⭕️ خد بالك الكلام ده كله على الدينم الكلاسيكي بشكل الأولي دلوقتي بيتعمل من قطن وبوليستر وقطن وليكرا وغيره

والسؤال ليك تعرف ايه تاني فيه خلط بين طريقة النسيج وبين الخامة الأولية؟