La Roche

الراجل خلاهم يدخلوا المسجد وهما بيصلّوا عليه، وراح واقف قدّام المصلّين كلّهم وقال:
"يا رب، إنت عالم بصدق اللي بقوله...
أمنته على مالي، مية سبعة وسبعين ألف جنيه، من تمن سنين، كانوا شقايا وتعب غربتي في بلاد الله.
كان صاحبي، وقالّي: هندخل مشروع شراكة مع بعض، وكل حاجة عليّا...

يا رب، بحق كل يوم اتكسرت فيه قدام عيالي،
بحق شقايا اللي راح قدّام عيني،
بحق المرض اللي ركبني من الحزن،
بحق كل حاجة كان نفسي أعملها وماقدرتش،
بحق تعبي وكسرتي، وابني وهو بيقولّي عايز الحاجة الفلانية وأنا وطّيت من الذل،
بحق كل عيد دخل عليّا أنا وبيتي كإننا في ميتم،
بحق تعب مراتي ومرضها النفسي من الحاجة، ومن احتياجنا للي يسوى واللي مايسواش،
بحق ما أنا واقف دلوقتي ودموعي سابقة كلامي من الذل والغضب والغيظ...

برد قلبي فيه يا رب،
خلّي قبره جحيم، ومسكنه نار،
واجعل كل لحظة تعب أنا عشتها، يقضي أضعافها في أسوأ العذاب.

أنا مش هاخد فلوسي، حتى لو هيطوقوها ليا عشر أضعاف...
مش سامحه يا رب، فبعزّتك وجلالك، ما تكسّرش قلبي وتسامحه...

وراح طالع من المسجد، والناس بتحاول تشدّ فيه،
"ليه يا عم عملت كده؟ طب فلوسك كام؟ تعالى نقعد ونشوف ولاده وإخواته..."
قال لهم: "روحتلهم كلّهم في حياته، محدش عبرني، ودلوقتي؟ والله لو يدّوني أعمارهم مش مالهم... ما تلزمنيش.
هو دلوقتي عند الحكم العادل، وربنا هو اللي هيفصل في حقي."
فخلي بالك لو اخدت مال 💰 احد ظلم ومسامحكش..
#منقول.