Basma Alaa

فرّطوا في ولادكوا النهارده… عشان ملاليم النفقة
ما تجيبش حتى عيش فاضي…
بس بُكرة؟
لما يكبروا… هتبقوا مستنين رنّة تليفون مش هتيجي.”

فيه ناس فاكرة إن العلاقة بين الأب وولاده أكل وشرب وملابس…
فاكرين إن الطفل لما يطلب أبوه، بيطلب فلوس.
وبيتناسوا إن الولد والبنت مش محتاجين جيب مليان…
قد ما محتاجين حضن مليان، وظهر ثابت، وأب شايفهم مش شايف جيب طليقته واهلها.

فيه أب بيقعد يحسب ملاليم النفقة…
ويتخانق ويفاصل كإنه بيشتري سلعة،
ومش واخد باله إن كل جنيه بيحاول يوفره…
بيضيّع مقابله ذكرى، لحظة، علاقة، إحساس… وبيضيّع مكانه جوه قلب ولاده.

يا جماعة…
الطفل اللي بتكسروه بالخصام…
اللي بيروح المحكمة بدل ما يروح حضن أبوه…
اللي بيسمع إن أبوه شايفه عبئ ومصاريف…
الطفل ده مش بيكبر وينسى…
ده بيكبر ويتقسى…
وبيكبر وهو محتاج حماية من الشخص اللي المفروض يحميه.

فرّطوا في ولادكم النهارده…
عشان شوية جنيهات…
عشان تثبتوا إنكم “مش هتدفعوا أكتر من كده”
عشان كرامتكم قدام الناس…
بس بكرة؟
بكرة هتكبروا… وهتعجزوا…
وهتدوروا على اللي كنتوا بتفاصلوا عليه.
هتبقوا مستنيين زيارة…
مكالمة…
حضن…
كلمة “بابا” خارجة من قلب صادق مش من فاض وتقضيه واحب .

الأب اللي شايف ولاده “فاتورة”
هيجي يوم…
يشوف نفسه غريب في حياتهم.
مش لأن الأم حرّضتهم…
ولا لأن الجد علّمهم يكرهوه…
لأ…
لأن القلب لما ينجرح… بيقفل.
ولما يقفل… صعب يفتح تاني.

اعرفوا إن النفقة مش فلوس…
دي مسؤولية…
ودي شهادة إنك كنت أب… حتى لو العلاقة بينكم وبين أمهم خلصت.

ولادكم مش محتاجين يفتحوا التلاجة يلاقوا أكل بس…
محتاجين يفتحوا قلبهم يلاقوا أب يستحق كلمة “بابا”.

،


#المطلقات #الطلاق
#فتكات

اللي بيشوف مطلقات المحاكم عار … هو نفسه الي عار .
الست اللي دخلت المحكمة دخلت عشان حقها وحق اولادها ، مش عشان حد يديها لقب ولا يحكم عليها.

طلاق المحاكم مش عار…
العار إن ست تتهان وتتظلم وتسكت وتسيب حقها.
العار على اللي شايف حقها بيضيع وواقف يتفرّج.
العار على اللي يبرر الظلم…ويفرض على الست انها “تستحمل” عشان المجتمع مايتكلمش.

الست اللي وقفت قدّام القاضي وخدت حقها
أقوى من ألف واحد قاعد يتكلم من ورا الكيبورد.
دي ست وقفت على رجليها… وخدت قرار… ودافعت عن نفسها.

بدل ما تلوم الست…
لوم اللي اضطرها توصل للمحكمة.
لوم الظروف اللي خلتها تحارب لوحدها.

دي مش ضعيفة، دي أقوى منكم كلكم.

دايما بسمع كلمة "مش بنت اصول" من اي واحد منفصل زوجته رافعة عليه قضية...
يعني هي مش بنت اصول لانها راحت المحكمة عشان عايزة تاخد حقها منك؟
مش بنت اصول عشان مش عايزة تعيش معاك غصب عنها؟
مش بنت اصول عشان عايزاك تصرف على اولادك اللي شايلين اسمك؟
مش بنت اصول عشان بتطلب مسكن لاولادك يعيشوا فيه
لحد مايكبروا وفي الاخر بيرجعلك؟
مش بنت أصول عشان بتشحتكً عشان تشوف اولادك الي يتمتهم وانت وعايش؟!
طيب احب اصدمك انت اللي مش ابن اصول ولا راجل عشان خليتها تتبهدل في المحاكم عشان تاخد منك كل الحاجات دي اللي ربنا فرضها عليك اساسا وجعلك مسؤول عنها؛
ماهي لو خدت كل حقوقها دي بما يرضي الله هتروح المحكمة ليه؟
وتصرف فلوس على المحامين ليه؟!
بلاش نضحك على بعض.
الراجل اللي يجبر أم أولاده تلف وتتبهدل في المحاكم علشان تاخد حقوقها منه،

مش راجل…

ده إنسان جعان، ومترباش على المسؤولية.
الست اللي شاركته العمر، وشالت معاه،
ماينفعش يكون جزاءها الذل والدوخة عشان تاخد أبسط حقوقها!
اللي بيتخلى عن مسؤوليته،
وبيدفّع أم عياله تمن رجولته الناقصة…
ده لا يعرف معنى الرجولة، ولا الأصل، ولا الدين.
الراجل الحقيقي؟
هو اللي يعرف إن زوجته أمانة،
وإنه مسئول عنها قدّام ربنا قبل أي حد.
"وَعَاشِرُوهُنَّ بِالْمَعْرُوفِ"


#المطلقات #الطلاق
#فتكات