BanArki

شطب بنفسك

(٧) تأسيس الكهربا

- ابدأ الكهربا قبل الصحي بيوم .. عشان الكهربائي يوفر وصلة كهربا للسباك عشان عدته … وينور المكان كله لو انت ماجبتوش في الأول ينور المكان زي ما قلنا

- لو ماجبتش سباك في الأول يعمل وصلة مية زي ما قلنا … ماتأخرش السباك عن يوم واحد لإن الكهربائي هايحتاج مية عشان المونة بعد ما يخلص تكسير

- المفروض معاك رسمة فيها تصور للمكان بفرشه بأماكن وحدات الإضاءة والأجهزة وأماكن المفاتيح ومخارج الكهربا وأي شبكات تانية انت عايزها في المكان

- هات الكهربائي وعرفه الشغل عالطبيعة ويا ريت بطباشيره تعلم على الحيطان أماكن العلب وتوفرله نسخة من الرسومات

- اتفق اتفاق مناسب للطرفين بعد ما تكون عرفت متوسط السعر بالسوق وجبت كهربائي موثوق فيه سواء اشتغل معاك قبل كدا او حد ثقة رشحه

- ماتسترخصش … في المرحلة دي ألف زيادة لكهربائي شاطر ثقة وأمين مش هايخسرك … دا كله مكسب هاتشوفه قدام

- اتكلم في كل تفاصيل الاتفاق عشان التحوير واللوع بيعلموه للصنايعية والعمال وهما في اللفة (يا ريت تكتبوا ورقتين بينكم فيهم كل التفاصيل)

- اتفق على نسبة التشطيب من دلوقتي عشان مايبقاش عليها خلاف قدام (اللي هايقبضها بعد ما يشطب الشقة)

- بعد الانتهاء من الاتفاق اكتب معاه كل طلباته وخد شنطة فلوس وانت نازل تشتري

- بأكد على تأمين الشقة عشان السلك غالي ومش بس بيتسرق قبل مايركب … دا بيتشد من الحيطان بعد تركيبه لغلو تمنه

- لو جاهز وعايز يبدأ تكسير يوم الاتفاق … مافيش ما يمنع تخليه يبتدي

هاننزل السوق نشتري الخامات

ندعو الله أن يعلمنا ما ينفعنا وينفعنا بما علمنا

شطب بنفسك

(٦) التأسيس (كهربا وصحي)

- أحد البنود المهمة جدًا اللي مهم فيها التفكير المسبق وعمل تصور نهائي واضح

- كمان مهم في بنود التأسيس التنفيذ بدقة لإنها بنود علاج مشاكلها المستقبلية أو تعديلها مكلف وملوث ومضر

- اتفقنا إنك عامل رسومات فيها تصور (للفرش بشكل عام) و(فرش المطبخ والحمامات بشكل خاص) ومحدد أماكن وحدات ومخارج ومفاتيح الكهربا وأي شبكات تانية بالحوائط

- ممكن تشتغل بندين التأسيس (كهربا وصحي) بند ورا التاني … لكن انا بافضل اشتغلهم سوا في نفس الوقت

- باكرر التأكيد على تأمين المكان خصوصًا خامات تأسيس الكهربا والصحي اللي هاتتشون في المكان مش رخيصة

- ماتسترخصش وانت بتختار صنايعية التأسيس (الكهربائي - السباك) … الغلطة في التأسيس تصليحها مكلف

- خلي اتفاقك مع الكهربائي والسباك لحد التشطيب النهائي لإن لو حد غيرهم كمل الشغل هايطلعوا عينك وهايخسروك

- مش محتاج اقول ماتقفلش حسابهم بعد التأسيس وكل ما النسبة المتبقية كانت كبيرة كل مكان أحسن ليك (لو قليلة ممكن الصنايعي لو مشغول يضحي بيها ويحلقلك)

- الروبير: مهم جدًا تبقى محدد روبيرك اللي هو منسوب أعلى متر من أرضية المكان بعد التشطيب … في أغلب الأماكن بناخده من بسطة السلم … حتى لو السلم ماتشطبش بافترض سمك التشطيبات ولو ارتفعت ١-٢ سم يبقى أسلم

نبدأ بنود التأسيس بالتفصيل

ندعو الله أن يعلمنا ما ينفعنا وينفعنا بما علمنا

شطب بنفسك

(٤) تعديلات معمارية ١

أمثلة للتعديلات المعمارية: (هدم حيطة - بناء حيطة - قفل باب - فتح باب - تغيير أبعاد فتحات)

ومن التعديلات المعمارية المتكررة:

- إلغاء حمام الضيوف
- إضافة حمام أو دريسينج لغرفة النوم الرئيسية
- فتح المطبخ على الريسيبشن (مطبخ أمريكاني)
- إضافة غرفة داخلية على حساب الريسيبشن أو العكس
- تعديل مساحات الفراغات
- تعديل مكان الأبواب
- تعديل أبعاد الفتحات (أبواب - شبابيك)

بناء على التصور اللي في الرسمة اللي عملناها هانبدأ بسم الله تنفيذ التعديلات اللي هانقسمها لتلات بنود:

أولًا: بند التكسير:

- اشتري برميلين ولوحين بنطي وخليهم في الشقة هاتستخدمهم لحد نهاية الأعمال لكل الشغل العالي (هاتريح دماغك وتوفر كتير قدام)

- وزي ما عملنا قبل كدا هانجيب نحات وهانديله الشغل طريحة (مقطوعية) ودا يخلينا قادرين نقدَّر حجم الشغل يوميات عشان لما نحوله طريحة مايتضحكش علينا

- لازم تقف مع اللي بيكسر أو بيهد لإنه ممكن بغشم يهد أكتر من المطلوب أو يضعف أجزاء مش هاتتهد … ووقتها لازم كل الأجزاء الضعيفة تتهد ويتعاد بناها الأمر اللي هايدخلك في خساير مالية

- اشتري ٥٠ شيكارة وسلم منهم للعمال بالعدد واستلمهم بالعدد تحت متعبيين مخلفات واقفل عالباقي وخبيه من العمال والصنايعية

- المخلفات الناتجة من التكسير هاتجيب عمال يعبوها في شكاير وينزلوها طريحة ويجمعوها بمعرفتك في مكان مايسببلكش مشاكل واستنى لما نخلص بند التعديلات كله ونشيلهم مرة واحدة

- النحات اللي بيستخدم معدات بحرفية (هيلتي - صاروخ - خلافه) أنضف وأسرع

- مش محتاجين نأكد إن التعديلات كلها في أعمال مباني فقط بشرط يكون النظام الإنشائي مش حوائط حاملة ولو مش متأكد استعين بصديق مهندس ييجي زيارة يعاين

كدا احنا جاهزين لبند المباني

ندعو الله أن يعلمنا ما ينفعنا وينفعنا بما علمنا