The Marketing Factory

عارفة ايه سر نجاح اي بيزنس؟

الاجابة كلمة واحدة بس بتحتاج مجهود كبير .... الاستمرارية.

علشان البيزنس ينحج لازم تستمري، علشان صفحة الفيسبوك بتاعتك تنجح لازم تستمري وتلتزمي بجدول النشر بتاعك.

متعملوش زيي وتنشروا في وقت فراغكم 😅، انا بتعامل مع صفحتي بالحب لانشغالي بصفحات الشغل اللي بمسكها ودا غلط ومش هيجيب نتيجة ولا اثر بسهولة.

لكن اثبتت فعلا بالتجربة ان الصفحات اللي النشر فيها منتظم، العملاء فعلا بيرتبطوا بيها وبيتفاعلوا مع المحتوى اللي بينزل.
وعلى فكرة مش شرط النشر يومي، ممكن تكتفي بمرتين في الاسبوع او تلاتة، المهم يكون منتظم.

وعلشان تشوفي نتيجة الاستمرارية دي والنشر المنتظم على صفحتك محتاجة مش اقل من تلات شهور، لان مفيش حاجة بالساهل ومفيش نجاح سريع.

وعلشان تسهلي على نفسك هقولك نصيحتي اللي بقولها لكل اصحاب المشاريع، اعملي جدول لنفسك بالايام بالورقة والقلم

يوم الحد هتجمعي افكار المحتوى اللي هستخدميه لمدة اسبوع او اتنين او حتى شهر لو تقدري

يوم الاتنين هكتبي المحتوى اللي حضرتي افكاره

يوم التلات هتراجعيه

يوم الاربع هتظبطي التصميمات

يوم الخميس هترفعيه كله مجدول بحيث يكون جاهز وتتفرغي بقى لشغلك نفسه

واي مساعدة هتحتاجيها في النقطة دي متتردديش تبعتيله وهجاوبك بكل ترحاب

تشتري عصير قصب ب 60ج ولا معكش فكة؟

رجل اعمال عاقل رشيد قرر يستثمر فلوسه في الوقت العصيب اللي العالم كله بيمر بيه ونزل منتج عصير قصب الكوباية منه بخمسة جنيه ومصر كلها عارفة سعره وسعره هو 60ج
تفتكروا ايه اللي يخليه يعمل كدة؟ وهل هيلاقي حد يشتريه؟

كل غني مصري مر بفتره من عمره مواطن عادي بيقف يشرب قصب، لكن مع تغيير حياته الاجتماعية بسبب تحسن ظروفه المادية بقى صعب يمارس السلوك دا

صعب يقف يركن عربيته المرسيدس وينزل يشرب قصب، طب يعمل ايه علشان يرضي احتياجه دا؟ يروح يشتري علبة Sugarcane من السوبرماركت ب ٦٠ج

يبقى عمر المشكلة كانت في السعر، المشكلة في التسويق والبراندينج

فلو انت هتنافس بالسعر الارخص فاتاكد ان عميلك هيبيعك مع اول منافس ارخص منك بربع جنيه، لكن لو بتنافس بميزة تنافسية حقيقية فعميلك عمره ما هيفكر معاك في السعر