Shaker1Pan

انا بحاول اصمم فيديوهات عن محمد شاكر واوريها للناس عشان يعرفوا ولو جزء بسيط عن الشخص ده.
الواحد جواه كلام كتير ومتلخبط ومن كتر الصدمة مش قادر يعبر صح عن اللي جواه. بس انا هحاول اتكلم يمكن صوتي يوصل للناس.
يمكن معرفتي بمحمد بدأت من سنة تقريبا لما اول مرة شفت فيديو لشاب جميل رايح دار ايتام . شفت محبة الاطفال الحقيقية ولهفتهم عليه. اصل الطفل بيقدر يحس بالبني ادمين اوي ورد فعلهم والبهجة والفرحة خلتني اسأل نفسي مين ده؟
ابتديت ادور مين ده وبيعمل ايه وعرفت انه موجود علي التيك توك. وده ابليكشن بالنسبالي مجهول الهوية. معرفش عنه غير انه عليه فيديوهات لكن مكنتش اعرف ان كمان عليه لايفات.
دخلت اشوف محمد بيعمل ايه. من اول لايف ليه حسيت باحساس الوناسة والانبساط بطريقة غريبة. كنت بضحك من قلبي كأني بتفرج علي فيلم كوميدي لأحمد حلمي.
بقيت كل يوم اخلص شغل واستناه يفتح بالليل اتفرج عليه بدل ما اشغل التليفزيون . محمد كان بالنسبالي روتين يومي قبل النوم. حاجة حلوة اختم بيها يومي علي ضحكة صافية طالعة من القلب.
بحكم غربتي وبعدي عن اهلي واصحابي كان محمد ولايفه وجمهوره هم العيلة التانية اللي موجودة كل يوم ف نفس المكان ونفس الزمان. تجمع عائلي في الصالون بس بدل ما كلنا بنتجمع ف المناسبات كنا بنتجمع كل يوم

مع مرور الوقت قربت من محمد اكتر علي المستوي الشخصي. يمكن ماكناش بنتكلم كتير لكن علي اد المرات اللي اتكلمنا فيها كان تعامله معايا بكل ادب واخلاق. حتي في عز مرضي ومروري بحالة نفسية سيئة كان هو اول واحد بيسأل عليا ويديني طاقة ايجابية وحسسني ان فعلا ممكن يكون ليك أخ لم تلده امك ويكون ضهر وسند ليك.

محمد جدع اوي. يمكن جدع بزيادة في بعض الأحيان. كتير كنت بستغرب تصرفاته مع بعض الناس اللي بتسئ ليه وهو مبيردش الاساءة. لا كمان بالعكس لما بيكونوا في ضيقة بيكون اول واحد يمد يد العون.
غريب اوي الجدع ده. شاب صغير ٣٠ سنة لكن فاهم الدنيا صح. ذكائه وحكمته ف مواقف كتير وسرعة البديهة وردود الفعل اللي تخليك دايما مصدوم ومن صدمتك تسقف تلقائي.

يمكن محدش هيحس ولا يفهم الكلام اللي بقوله غير الناس اللي بتتابعه. تخيل تقعد مع صاحبك كل يوم ٧ ساعات تضحك وتهزر وتتعرض لمواقف كتيرة. مع الوقت هتكون فاهمه اوي. احنا بدون مبالغة بنفهم محمد من عينيه. امتي بيكون مبسوط مع الجيست وامتي يكون عايز يخلع بشياكة.
فاهمينه اوي وحافظينه لدرجة اننا بنبقا عارفين ازاي ننكشه ونضايقه وازاي نفرحه وهو متضايق. كومنتاتنا بتكون واحدة.

الناس المستغربة اننا بندافع عن محمد ضد حملة تشويه سمعته علي السوشيال ميديا. انتم فاكرين اننا بندافع عنه عشان هو حد مشهور بنحبه. للاسف ده غلط.

احنا بندافع عن محمد لانه اخونا وصاحبنا والواد الجدع اللي ف حياتنا. هو اخوك لو دخل خناقة هتسيبه؟

فرق كبير انك تكون بتتابع حد بينزل فيديوهات او بيعمل افلام او اغاني. وفرق كبير انك تكون مصاحب حد بتقعد معاه اكتر ما بتقعد مع اهلك نفسهم.

قوة جمهور محمد في المحبة اللي هو قدر يزرعها في قلوبنا. المحبة اللي خلتنا كلنا بلا استثناء مش عارفين ننام . الواحد كل ما عينه تغفل من كتر التعب يحس بالذنب ان محمد ممكن ميكونش نايم مرتاح.

صدمتنا في صورته المنشورة علي صفحة الداخلية كلنا حسينا ساعتها بسكينة في قلوبنا. واللي زاد الوجع اكتر، الناس اللي كانت شمتانة وبتهاجم من غير حتي ماتعرف مين ده.

احنا واثقين ف اخلاق محمد جدا. وعارفين ان الموضوع هيعدي علي خير لان اللي معاه ربه وحب الناس عمره ما يخاف.

لو محمد غلطان حاسبوه. لكن بلاش تشوهوه.

كفاية تشويه لشاب صغير كلنا بنعتبره اخونا. كفاية تجريح بكلام احنا عارفين وواثقين انه مش صح.

وعندنا امل كبير في اجهزة بلدنا انهم هيكشفوا الحقيقة للناس. وان كل واحد غلط ف محمد او افترا عليه بالكذب ذنب محمد هيكون ف رقبته حتي يوم الدين.

سيبوا القانون ياخد مجراه. بلاش تطلعوا حكم بالاعدام علي شخص لسه لم تثبت عليه اي جريمة ومازال تحت التحقيقات.

اتقوا الله في اهله . اتقوا الله في اصحابه.

ومنقدرش نقول غير حسبي الله انت نعم السند والوكيل

#تضامُنا_مع_محمد_شاكر #شاكرمحظوردلوقتي ゚viralシ #مصر #موناليزا