Senior Ahmed

شرح تاشيرة أستراليا🇦🇺 الاونلاين

اولاً اسم التأشيرة Visitor visa subclass 600 استخدامها سياحة او دراسة وبتكون مدتها ٣ شهور.التقديم اونلاين وسعرها 198 دولار استرالي

والناس اللي بتسأل عن سهولة الفيزا احب اقولهم للأسف التاشيرة صعبه ونسبه الرفض عاليه واكتر اسباب الرفض ان ماعندكش فيز تقيله ع الباسبور يا معندكش سفريات كتيره ع الباسبور.
طبعا انا شوفت ناس ومكاتب بتقدم للناس بيعملوا بلاوي ف التقديم
انا هسأل المكاتب دي سؤال بسيط.
انت مبتعرفش تقدم استراليا ولا تملي الابلكيشن ولا تعرف توابع ومصاريف ما بعد التقديم بتلبس الناس ليه ؟ بتقدملهم ليه؟؟؟بترسملهم من البحر طحينه ليه؟؟؟طب بتجرب ف الناس ليه؟؟؟

كمية نصب مشوفتهاش ف حياتي ف موضوع فيز استراليا ده
المهم نقدم ازاي
هتدخل تعمل اكونت علي موقع وزارة الهجرة الاستراليه imm وبتختار نوع التاشيرة والسياحة احنا قولنا اسمها visitor visa subclass 600 وبتملي بياناتك وممكن تعمل حفظ وتكمل بعدين وهكذا. يعني تقدر تدخل تملي كل يوم شوية بيانات وتعمل حفظ وتكمل بعدين وهكذا. خلصلت الابلكيشن ؟
اخر مرحلة ادخل ارفع ورقك بقي واللي هقولهولك هو اهم الأوراق الداعمة ليك بالترتيب
١-كشف حساب بنكي ٦ اشهر وخلي مساحة الفايل متعديش 5 ميجا. وخلي بالك كشف الحساب مهم جداً لانه هيقدر يعرف انت مقتدر مادياً ولا لا ومستقر ف شغلك عن طريق دخلك الشهري ف الحساب ولا لا ومصاريفك اليوميه والشهرية هتوصح انك مستقر ف حياتك ولا لا.
٢- اي املاك عندك او شهادات او اي حاجه بتدخلك دخل ثابت تاني غير شغلك او مبتدخلكش.
٣- ورقة من شغلك تثبت مرتبك وكاش ولا تحويل بنكي وتاريخ العمل والاجازة وتاريخ العودة لمباشرة العمل بعد الاجازة وطبعا يكون موجه لاستراليا واكتب فيه رقمك التأميني لو متأمن عليك. ولو طالب يبقي قيد دراسي ولو صاحب عمل يبقي سجل تجاري وبطاقة ضريبية.
٤- صور الاختام والتأشيرات السابقه اللي عندك ونفذتها علشان طبعا يعرف انك مُسافر دائم وبتحب السفر مش نمت حلمت باستراليا صحيت بباسبور ابيض تقول هي دي اللي هبدأ بيها يعني !!!
لو فيه باسبور قديم برضوا هترفعه ولو عندك فيز ساريه لاي دولة برضوا هترفعها.
٥-خطة سفر بالتفصيل فكك من جداول شركات السياحه اللي جاهزه وبتتحط مع كل فايل دي. لازم تعرفه انك رايح عارف وفاهم انت رايح فين وليه ف اعمله من الاخر cover letter بخطة سفر محترمه
٦- متجوز او مخلف يبقي تقدم قيد عائلي يقوي موقفك ف العوده.
رفعنا الاوراق يبقي تستني ايميل فيه طلباتهم الزياده
اول طلب اساسي هو هيطلب منك تروح vfs ياخدوا بصمتك ويصوروك وده هيكلفك تقريبا 500 جنيه.
تاني طلب وده مش اساسي بيبعتلك ايميل يطلب منك تروح تعمل كشف طبي بحاجات محدده هو بيحددهالك ف الايميل وف مكان محدد برضوا تبع السفارة. بس ده مش معناه انك خدت الفيزا. ده كله قبل ما يبص لطلب الفيزا اصلاً يعني ممكن بعد المصاريف دي يرفضك عادي. والكشف ده بيكلف من 100 ل 150 دولار امريكي
اخر طلب وبرضوا مش اساسي ممكن يطلب منك فيش جنائي.
اي ورق من كل ده لازم يترجم انجليزي لو هو مش انجليزي.
بس وهتستني بقي يردوا عليك بالرفض او القبول او طلب اوراق زيادة او يمكن كمان مقابله ف السفارة وده مظنش بس برضوا يظل اوبشن عندهم.
اخر نصيحه. ركز ف البيانات والابلكيشن كويس جداً
اكتبه بنفسك او اكتبه ومعاك حد فاهم مش مجرد حد بيملي شوية ورق زي شغل المصالح الحكومية. لو حاسس ان حسابك البنكي كتير عليه المصاريف دي غير مصاريف الرحله يبقي متحاولش ولو شايف نسبة رفضك اعلي يبقي صدق حدسك ومتحاولش.

تأشيرة الإمارات 🇦🇪
هحكي النهارده عن الامارات. نوع تأشيرتين سهليين اوي تقدر تعملهم بنفسك. اولهم فيزا مجانية ترانزيت ٤٨ ساعه
تاشيرة الامارات 🇦🇪 ٤٨ ساعه
كل اللي بتحتاجه صورة للباسبور وصورة شخصية وبس ده غير تذكرة الطيران طبعا او الخروج من الأمارات اللي مينفعش بأي حال من الاحوال تزيد عن ٤٨ ساعه.
بتاخد وقت اد ايه علشان تطلع ؟ يوم بالكتير.
فيه ناس بتعملها تروح تشتري ايفون وترجع والله🤣
وده اللينك اللي تقدر تعملها بنفسك منه
‏https://uaevisas.etihad.com/echannels/web/client/etihad/index.html #/dashboard

تاني نوع هو تأشيرة الأمارات ٤ ايام ب ٥٠ درهم ( ٤٠٠ جنية تقريبا )
اسمها ع الموقع فيزا ترانزيت بس ممكن تستخدمها عادي كسفرية لوحدها من بلدك للامارات وتضيف دولة كوجهة تالته علشان تطبق شروط الترانزيت. المهم متتعداش اقامة ٤ ايام
بتخش تملأ البيانات بتاعتك وتحمل صوره باسبورك وصوره شخصيه وتذكره طيران ذهاب وعوده من اي شركة طيران وبس كده. استني خلال يوم او اتنين علي الايميل الفيزا يا معلم
وده اللينك

‏https://uaevisas.etihad.com/echannels/web/client/etihad/index.html #/dashboard

اه نسيت اقولكم علي حاجه. طالما بتدور علي الرخيص وهتعمل فيزا بتراب الفلوس استني خد دي كمان😄

‏Abu Dhabi Airport Express
باص من قدام مطار ابوظبي لمحطة ابن بطوطة يعني لحد عتبة المترو ف دبي ٣٥ درهم بس وشغال ٢٤ ساعه وبيتحرك كل ساعه من مطار ابوظبي. والطريق بياخد ساعه برده
متنساش بقي تسيب كل اللي انا كاتبه ده وتدخل تقولي الصوره دي فين ف الامارات 🤦🏻‍♂️🤦🏻‍♂️🤦🏻‍♂️سلام