Garden

الري هو أننا نوفر للنبات كميه المياة اللي بيحتاجها و طبعا دي بتختلف علي حسب حاجات كتير يعني مثلا النبات الكبير غير الصغير و ف الصيف غير الشتاء.

طيب أزاي أعرف أن النبات محتاج مياة(ري)؟
عشان نعرف أجابه السؤال ده كويس لازم نعرف أيه هي علامات العطش !!!
الي من أهمها ذبول في المجموع الخضري فتحس أن النبات تعبان ومرتخي وطبعا دي بتبقي مرحله خطر بالنسبه للنبات وبنسميها الذبول المؤقت
في حالة الوصول للمرحله دي بيبقي النبات عندة القدره أنه يرجع تاني لحالته الطبيعيه بمجرد زوال المؤثر اللي هوا "توفير المياة"
ومن ضمن علامات العطش" جفاف التربه"

في الحاله دي يفضل أن الجفاف لايصل لمنطقه نمو وانتشار الجذور لانه كده الموضوع ممكن يتخطي مرحله الذبول المؤقت ويوصل لمرحلة الذبول الدائم والمرحلة دي بتبقي صعبة جدا لانها بتعتبر مرحله "أحتضار للنبات" ،و بيبقي صعب أن النبات يرجع لحالته الطبيعيه مره تانية
بيبقي صعب لأن خلايا النبات بتفقد المياة بطريقه بتأثر
علي الخلايا النباتيه مش كده وبس ده بيأثر عليها وعلي وظائفها بالسلب عشان كده بمجرد ما يظهر أعراض العطش علي لنبات لازم نروي فورا.

أعمل أيه لو النبات عطش مني؟
»»نروي النبات ونتأكد من وصول المياة لكل الجذور لأن أحيانا بيكون في شقوق نتيجه العطش والمياة بتنزل منها وأحنا بنعتقد أن عمليه الري والصرف تمت بنجاح وفي حالات الأصص الصغيره يفضل غمر الأصيص بالكامل في الماء للتأكد من الري الجيد ووصول المياة لكل جذور النبات ف الأصيص.

»»وضع النبات في مكان بعيد عن الشمس المباشره لتقليل عمليه فقد النبات للماء من خلال الأوراق ودي بنسميها عمليه النتح وزي ما تقول كده أن النبات ف المرحلة دي بيبقي محتاج عنايه مركزه.

»»أما في حالات العطش الشديد والوصول لمرحله الذبول الدائم يتم قص النبات قص جائر ثم الري الجيد بعدها وهنا التقليم أحيانا بيكون أخر حل لأنه بيحفز الجذور علي النمو مرة أخري وبالتالي بيحفز خروج أوراق جديده من المجموع الخضري.