Manage Your Risk

4-4- دراسة الجدوي التجارية

ده أخر مرحلة في دراسة الجدوي.

(هدفها ان نعرف مدي نجاح المشروع من الناحية التجارية)

في اكثر من طريقة وأفضل طريقة هنستخدمها ان شاء الله هي فترة الاسترداد.

فترة الإسترداد = النفقات الاستثمارية / التدفقات النقدية السنوية

وهتقدر تعرف منها عدد السنوات اللي هيستغرقها المشروع لإسترداد رأس المال المدفوع.

وبناء علي دراسة الجدوي التفصيلية تقدر تبدأ مشروعك مع تمنياتي بالنجاح والتوفيق

4-2 دراسة الجدوي الفنية للمشروع

بعد ما خلصنا دراسة الجدوي التسويقية للمشروع هنبدأ في المرحلة الثانية من دراسة الجدوي التفصيلية وهي دراسة المشروع من الناحية الفنية.
بنمشي في المراحل التنفيذية للمشروع لمعرفة هل من الممكن تنفيذ المشروع من الناحية الفنية ولا لأ.
وبنحدد في دراسة الجدوي الفنية 5 عناصر رئيسية وهي كالتالي:

1- تحديد الموقع
2- تحديد الطاقة الإنتاجية
3- تحديد طريقة الإنتاج
4- تحديد الإحتياجات من العمالة والمهمات
5- تحديد التكاليف الإجمالية للمشروع

هنتناول كل عنصر بشئ من التفصيل في التالي:

1- تحديد موقع المشروع ويتم تحديده بناء علي دراسة العوامل التالية:

1) الخصائص الطبيعية والفنية للمشروع
يعني مثلا لو هنعمل مشروع زراعي يبقي لازم يكون علي أرض خصبة ولو صناعي لازم يكون بعيد عن المناطق السكنية ولو سنتر تعليمي يبقي لازم يكون قريب من الجامعة.

2) تكلفة الحصول علي الموقع

- الموقع هيكلفني كام وهاخده إيجار ولا تمليك.
- إمكانياتك المادية هتحكمك في تحديد الموقع يعني لو عندك مثلا شقة ايجارها 1000 جنيه وشقة تانية ايجارها 2000 جنيه حتي الأن هتفضل التكلفة الأقل إلا اذا كان في عوامل أقتصادية أخري مثل العوامل الإقتصادية الأخري.

3) عوامل إقتصادية أخري

يعني في مثال الشقة السابق لو الشقة اللي ايجارها 1000 جنيه فيها مشكلة هتأثر علي المشروع مثل مدخل العمارة سئ (غير مشرف) في الحالة ده هرجح كفة الشقة الأخري رغم ان ايجارها أعلي وهكذا.

• بعد النظر لل 3 عوامل السابقة نقدر نحدد موقع المشروع

2- تحديد الطاقة الإنتاجية للمشروع يعني في مثال مشروع مركز للدروس الخصوصية هحدد عدد القاعات في السنتر وعدد المدربين وهكذا.

ولازم انظر ل 4 عوامل رئيسية لتحديد الطاقة الإنتاجية للمشروع وهي كالتالي:

1) العوامل الإقتصادية والقانونية (حجم ما تملكه من رأس مال)

2) أكتمال الشكل القانوني للمشروع (أوراق وشهادات وتصاريح) (يعني ممكن يكون في عائق قانوني أو نظامي يقيد حجم طاقتك الإنتاجية).

3) حجم السوق

بمعرفة حجم السوق تقدر تحدد طاقتك الإنتاجية.
يعني في مثال مشروع مركز للدروس الخصوصية لو حجم الطلب علي المركز متوقع 100 طالب مينفعش اجهز 10 قاعات وهكذا.

4) عوامل إقتصادية أخري
عوامل أخري تحدد حجم الإنتاج مثل مشروع مصنع أسمنت بيستهلك فلوس كتير في الطاقة لازم تكون طاقته الإنتاجية عالية جدا بما يتوازي مع حجم استهلاكه للطاقة وهكذا.

3- تحديد طريقة الإنتاج (هشتغل ازاي)

وفيها يتم تحديد كافة العمليات اللازمة لإنتاج السلعة أو الخدمة الخاصة بالمشروع وترتيب تسلسلها الزمني.

1) طريقة كثيفة العمالة (يعني انزل عدد كبير من الموظفين يسوقوا للمنتج أو الخدمة)

2) طريقة كثيفة استخدام رأس المال (يعني مش هنزل عدد أكبر يسوق لي وأستعيض عنها بإعلانات علي الفيس وعلي التليفزيون والجرائد وهصرف فيها فلوس كتير)

3) طريقة الإعتماد علي المكون المعرفي (أجيب ناس معروفة وخبرة وعندهم قدرات كبيرة توفر علية الدعاية)

4- تحديد الإحتياجات من العمالة والمهمات

(محتاج كام موظف ومحتاج أصول أد ايه....مثلا في مثال السنتر محتاج كام مكتب وكام سبورة وبروجيكتورو....)
1) عمالة (مؤقتة في بداية المشروع (زي الصنايعية اللي بيشطبوا و و..) ودائمة مستمرة معاية)
عدد العمالة المؤقتة (خاصة في بداية المشروع)
عدد العمالة الدائمة
2) الأصول و المهمات المطلوبة (كام مكتب كام كرسي كام بروجيكتورووو...)

5- تحديد التكاليف الإجمالية للمشروع وده بتتكون من:

1) تكلفة تأسيسية (أصول او مصاريف تدفع مرة واحدة خلال فترة التأسيس).
2) تكاليف رأس مالية (أجهزة الكمبيوتر والمكاتب وو.....).
3) تكاليف تشغيلية (أجور الموظفين والمواد العلمية والانارة والكهرباء والغاز والبوفيه وأي تكاليف أخري للمشروع).

ملحوظة هامة:

• في النقطة ده بعد تحديد التكاليف نقدر نحدد هل هنقدر نعمل المشروع ده ولا لأ.