Chef Rania Eltaher

صدور الفراخ بصوص الليمون و الكريمة ❤️👌

المقادير :

٤٠٠ جرام صدور فراخ
تتبيلة الفراخ : ملح ، فلفل، بودرة ثوم، عصير نص ليمونة
بصلة صغيرة مفرومة عليها ملح و فلفل
٤ فصوص توم مفرومين
معلقة صغيرة دقيق
١/٢ مكعب مرقة
٢٠٠ مللي كريمة حلويات
عصير نص ليمونة
١/٢ معلقة صغيرة زعتر

الكحك بالسمنة البلدي ب٣ طرق ، السخنة و الباردة و الميكس سخن على بارد ...

مقادير كحك السمنة المقدوحة (السخنة):

٢٥٠ جرام دقيق
معلقة صغيرة ممسوحة ريحة كحك
ربع معلقة بيكنج باودر
معلقة صغيرة سكر باودر
٥٠ جرام لبن + ربع معلقة صغيرة خميرة جافة + نص معلقة صغيرة سكر
١٤٠ جرام سمنة بلدي

مقادير كحك السمنة الباردة :

٢٢٠ جرام دقيق
٣٠ جرام نشا
معلقة صغيرة ممسوحة ريحة كحك
ربع معلقة صغيرة بيكنج باودر
٥٠ جرام لبن + ربع معلقة صغيرة خميرة جافة + نص معلقة صغيرة سكر
١٤٠ جرام سمنة بلدي ساقعة
٢ معلقة صغيرة (مليانة) سكر باودر

مقادير الكحك الميكس (سمنة سخنة على باردة):

نفس المكونات الجافة بتاعة كحك السمنة السخنة ، بس كمية السمنة مقسومة سحن على بارد (٧٠ جرام سمنة سخنة ، ٧٠ جرام باردة)

ملحوظات مهمة :

١- مدة بس الدقيق ماتقلش عن ١٠ دقايق عشان الكحك مايشققش معانا ، و كل ما كمية الدقيق بتزيد كل ما وقت البس بيزيد ، و لو الكحك شقق معانا بعد ما بسيناه كويس يبقى نزود سمنة بس بكمية صغيرة قوي لحد ما تظبط معانا

٢- لازم كمية الخميرة و البيكنج باودر تبقى قليلة عشان الكحك مايرفعش و شكله يبوظ معانا ، احنا بنضيفهم عشان الكحكاية ماتبقاش مكتومة

٣- يفضل مانفتحش الشواية و الكحك يستوي على حرارة الفرن ، بيفرق في الطعم و الشكل كمان ، و لو فيه مروحة نشغلها بتوزع الحرارة بشكل أفضل

٤- مهم جدا اننا مانعجنش العجينة بعد ما نحط الخميرة عشان مانفعلش الجلوتين و تعمل عرق و تمط معانا

٥- ال٢٥٠ جرام دقيق بيعملوا من ١٦ ل ١٧ كحكاية ، يعني كيلو الدقيق بيعمل ٦٥ كحكاية تقريبا ، ده لو الكحكاية وزنها ٢٥ جرام قبل ما تدخل الفرن ، لو هنعمل كحك حجمه أصغر من كدة هايعمل معانا عدد أكبر طبعا

٦- الكحك اللي بالسمنة الباردة و الميكس طعم و ريحة السمنة البلدي ظاهر فيهم اكتر ، و الكحك اللي بالسمنة السخنة و الميكس بيقعدوا لفترات اطول ، و بالتالي اللي بيفرق معاه طعم السمنة يبقى ظاهر و في نفس الوقت عايز الكحك يقعد لفترات طويلة هايبقى الاختيار الأمثل هو الكحك اللي بالسمنة الميكس سخنة على باردة #كحك