CiVil Bot

السلام عليكم
انا عمر عاصم مندوب مشروع الصحية وكنت كلمتكم قبل كده عنه كفكرة عامة تعالوا كده مع بعض نشوف الdetails
انا احد الاشخاص الى جابت جيد جدا فى المشروع وناقشت مع دكتور محمد شعبان 😂 الى تقريبا ادانى فى المناقشة النهائية ما بين 55 ل 60 من 80 فى المناقشة لان اسالته كانت فى ارقام ومناقشته 5 دقايق وانا مكنتش حافظ ارقام طبعا فيه ناس بتناقش ساعتيين مع غيره
كان فيه مشروع جديد الى هو solid waste وده بيناقشك فيه واحد من دكتوريين دكتورة اسمها شيرين ودكتور مصطفى وبالمناسبة دكتور مصطفى ده بيدرس فى كندا واستاذ دكتورة شيرين وده الى ناقشت معاه ولما عجبه المشروع قالى احكى عملت ايه ومسالنيش وادانى 19 من 20 ودى اعلى درجة عنده ودكتورة شرين كان فيه ناس كتير عندها خدت 20 فده مشروع مش مقلق خالص
السنادى تقريبا فيه
48 شخص جابوا امتياز مشروع
وحوالى 52 جيد جدا
و 8 جيد والجيد غاليا الى كان بايع الدنيا
والمناقشة فى حد زاتها بتعتمد على حظك وهتخش مع دكتور مين
ممكن يكون شغلك مش قد كده بس تعرف تمشى مع الدكتور
بس عامة الى مستواه كويس ايا كان دخل مع مين بيادى كويس فمتفكرش هتخش مع مين والكلام ده وسيبها على الله
بالنسبة للمشروع نفسه
شغل الترم الاول ده عبارة عن شبكات هتتفاجى فى الاول لانك هتبقى بتستعمل حاجات لاول مرة زى الكاد والاكسيل فهتغلط كتير
الصرف اصعب من المايه خلى المعلومة دى فى ذهنك
المفروض انك هتابع مع الدكتور بتاعك مرة فى الاسبوع وبتسلم لوح علشان اعمال السنة فدول 50 درجة اقل جروب كان الجروب بتاعى كان اغلبه واخد 40 من 50 بقية الجروبات كان الرينج اعلى على حسب الى بتابع معاه
شغل الشبكات مش صعب بس متركنش نفسك ولما تتعلم برامج طبق عليها علشان متنسهاش . فيه ناس بتضحى بالبرامج وبتناقش من غيرها بس انت وحظك ممكن دكتور زى دكتور شعبان يطردك من المناقشة اذا مش عاملها
وومكن تعملها وينطلب منك تعديلات فيها زى ما هتشوف فى مشروعى دكتور محمد فرجالة قالى ان مينفعش تطلع المعلومات فى جداول لازم يتحطوا على الاوتوكاد فقعدت احط حوالى 350 manholes على الاوتوكاد
هتمتحن المناقشة الاولانية فى بداية الترم التانى وعليها 50 درجة ورينج الناس من 40 ل 45 فيها
الترم التانى بقى
ده ترم تقيل فى المشروع لازم تشتغل اول باول علشان ما تتزنقش وتضطر تنقل من حد او تفبرك
وبردك تانى الصرف اصعب من المايه
وهيبقى عبارة عن محطات المايه والصرف
المشروع ده اذا كنت ناوى تكمل صحية هيفيدك والدكاترة هتفيدك وهتلاقى المعيديين هتفيدك وهتلاقى باشمهندس Maged Abdallah معاك على الجروب فاى وقت
تانى هنقول متركنش شغل الترم التانى علشان متتسوحش
على فكرة انت ممكن تشتغل مع صاحبك بس متعملش شغل copy _ paste علشان متتقفش غير فى الشكل والحسابات وكده
مشروع صحية مشروع لذيذ ومش هيتعبك التعب الى هو وهتستفيد منه
ونصيحة ان كنتوا هتطلعوا رحلة لمحطة صرف وامايه خلوها فى نص السنة مش فى اخرها علشان تشتغل الترم التانى على حاجة انت شايفها بعينك
ربنا يوفقكم جميعا ان شاء الله

Mohamed Ali El-Sotary:

سلام عليكم يا شباب .. انا كنت اشغال عامة وجاي اكلمكم عن مشروع السكك الحديد بإذن الله
- المشروع بيبقى عبارة عن مجموعات مش افراد و كل مجموعة حوالي 6 اشخاص تزيد او تقل حسب الاقبال
- حوالي 70% من شغلك هيبقى على برنامج civil 3D فا تعمل حسابك على رام اقل حاجة 8 جيجا على لاب core i7 وممكن i5 بس هيبقى رخم سيكا
- المطلوب منكم تصميم خط سكة حديد بالكامل بمعنى انك بتاخد حتة ارض بتعرفها نقط ع البرنامج وبتطلع خريطة كنتوريه بتمشي عليها مسار بمعايير معينه و بتعمل تصميم لشوية حاجات زي السرعات بتاعتك مثلا وبتحسب شوية بيانات كده بتختمها بالتكاليف والجدول الزمني للمشروع وبتطبع لك شوية لوح مع كتاب و cd بتدخل بيهم في المناقشة
- المفروض ان الشغل بيتقسم عليكم وكل واحد بيكون مجهز لابه لكن ده مبيحصلش و في الآخر واحد او اتنين بيشيلوا شغل civil 3D وبيطلع عينيهم والباقي بيبقوا مطريينها و عشان تتفادوا الحوار ده قدر الإمكان لأن الشغل بيبقى تقيل وممل مع انه مش صعب لكن عشان مراحله كتييير فا خلوا كل حاجة على بلاطة من اول السنة و نصيحة ابعدوا عن الناس اللي مكبره دماغها حتى لو حبايبكم لأن استلواحهم عليكوا هيتعبكوا اوي اوي و هتخسروهم في الآخر فا اعتبروا ان عم عشم مات من اول لحظة بدأ فيها المشروع و مشوا الموضوع ميري لأن المشروع كمان ملوش مصادر ع النت وكل شوية هتجروا ع الدكاتره والمعيدين عشان تاخدوا معلومة تبنوا عليها الشغل
- بالنسبة للتقديرات فا كله بياخد امتياز في الاخر بإستثناء كام واحد من اللي كانوا بايعينها من اول السنة وعشان نكون صرحاء فا شغل السكة الحديد قليل جدآ في مصر وبالواسطه لكن المشروع ده يعتبر موازي لمشروع الطرق بشكل ما فا اللي مش هيعرف يدخل مشروع طرق عشان المجموع وناوي بعد كده يشتغل طرق ممكن يدخل سكة و يتعلم يشتغل civil 3D لأن كل شغل طرق بيتم عليه و بالمناسبة مرتب مهندس الطرق اعلى من اللي بيشتغل خرسانات
- فا نصيحة اخيره لو ناوي على مشروع سكة اختار مجموعتك كويس عشان متلبسش الشغل كله على دماغك وترجع تندم بعد كده
وبالمناسبة اعضاء هيئة التدريس بتوع السكة متعاونين جدآ وبيعاملوا الطلبة كويس جدآ ومبيتأخروش عنهم لكن انتوا اللي لازم تسعوا ورا المعلومة
بالتوفيق 💛

Mahmoud Okasha:

سلام عليكم يا شباب 😀
اولا الف مبروك لكل اللي نجحوا 😀
و اللي ربنا موفقهمش ان شاء الله يبقي خير ليهم في بقيه حياتهم 😀...
البوست دا جمعتلكم فيه معلومات عن مشاريع قسم اشغال
اولا مشروع طرق ...
علي لسان طالب (امتياز مشروع)
مشروع طرق
1- المشروع بياخد 60 طالب فقط ،، اول 60 طالب كاتبينه رغبه اولي قال يعني عشان الاهتمام وعدد الدكاتره قليل وكده
2- المشروع بيبدأ بعد ميدترم الترم الاول وبيفضل مريييح خااالص لحد قبل الامتحانات بشهر ولا حاجه
3- المشروع مقسم ل3 اجزاء (rural & urban & airport ) ولازم تكون مذاكر جزء كبير من منهج سنه تالته عشان تسترجع المعلومات زي السوبر اليفيشن و الكيرڤس و هكذا. ،،، والمشروع عباره عن فيديوهات بتعمل زيها يعني بتشوف التقاطع الرباعي مثلا بيتعمل ازاي وتعمل زي الفيديو طبعا كده الاستفاده تكاد تكون معدومه ومعظم الناس بتطلع حاجات واحده عشان كده لازم تكون فاهم اوي انت بتعمل ايه وازاي وليه ،،، اي حاجه تعملها اسال نفسك ال3 اسئله دول ولو معرفتش تجاوب علي اي سؤال فيهم اسال المعيدين
4- الدكاتره هتشوفهم بالكتير اربع مرات فالسنه فحاول تستمتع بيهم علي اد ما تقدر
5- المعيدين بيهتمو علي اد ما يقدرو و بيتعبو بس برضو انت هتلاقي نفسك 3/4 محاضرات المشروع بتتلغي والشرح والمتابعه فالسكشن عشان كده الدنيا بتكون بايظه
6- البرامج اللي هتستخدمها الكاد و سيفل ثري دي بس ،،، فيه channels كتير عاليوتيوب لتعلم البرنامج بس مهما اتعلمت فالبرنامج لازم تشوفه عالمشروع عشان كده فيه واحد صاحبنا عامل channel شارح فيها كل جزء من ال3 بالتفصيل وهنديكو اللينكات باذن الله بس لازم برضو تكون فاهم بتعمل كده ليه
7- هتستخدم حاجه كده اسمها الاشتو وده عباره عن الكود المستخدم للطرق بس مش المصري الحمدلله
8- حاول تشتغل بزمه و ضمير من الاول عشان متعدش كتير بعد ما تخلص امتحانات
التقديرات (امتياز و جيد جدا)
:::::::::::::::::::::::::::::::::::::::::::::::::::::::::::::::::::::::::::
مشروع صحيه
علي لسان طالب امتياز
بايجاز كده
مشروع الصحيه عباره عن ان الدكاتره بتديلك مشروع على ارض الواقع
عباره عن مدينه مثلا جديده والمطلوب منك تصمملها شبكات ومحطات المياه والصرف
بنطبق بالظبط اللى خدناه فى سنه تالته فى الصحيه وفى الترم الاول فى اشغال في صحيه
ولكن الموضوع اشد متعه لانك بتربط كل حاجه ببعضها + الكود
فى جزء جديد اتضاف السنه دى واول مره ينزل اسمه الsolid waste وده وظيفتها بايجاز برضه هو ازاى تتعامل مع المخلفات الخارجه من المدينه السكنيه
بنشتغل فى الترم الاول على الشبكات الصرف والمياه
بنشتغلها منيول وكمان بنشتغلها على برنامج السيور جيمس والوتر جيمس
وفى برنامج اساس شغلنا وهو الكاد
بتعمل ديزاين كامل للشبكه للصرف وللمياه
اما الترم التانى
وبعد مصممنا الشبكات اللى هتجمع الصرف وهتبعت مياه الشرب
بنصمم المحطات الخاصه بكل شبكه
اما جزء السوليد ويست زى ماقولت فهو وظيفته ازاى تتخلص من المخلفات وهو جزء بسيط لكن مهم
وبتكون المناقشه فى المشروع على مرحلتين فى نفس اليوم ورا بعض
المرحله الاولى وهى بتتناقش فى الصرف والمياه
وبعد متخلص بتخش على المرحله التانيه وهى مناقشة السوليد ويست
جزء المياه والصرف فيه حوالى ٢٠ دكتور من جوا الكليه وبيجي من بره الكليه من ٣ ل ٥ دكاتره تقريبا ام بالنسبه لجزء السوليد ويست فهي دكتوره. واحده من الكليه واتنين من بره
جزء الصرف والميله عليه 80% والسوليد ويست 20%
والموضوع بسيط جدا اهم حاجه انك تسعى وتفهم بنفسك وتحاول تسأل اكتر من دكتور
وخالى بالك مش كل الدكاتره بتتفق على رأي
المهم تبقى انت مقتنع باللى هتختار رأيه ان هو الصح
لانك ببساطه هتتنقاش فى كل جزء بتعمله
:::::::::::::::::::::::::::::::::::::::::::::::::::::::::::::::::::::::::::
مشروع مساحه
أحنا كنا في فترة الدراسة شغالين تسكات صغيرة كدة بندرب فيها علي شغل و علي الشغل علي الأجهزة دا طول الدراسة
لما بنخلص أمتحانات بنبدأ في المشروع الفعلي بنعمل دا
١- معايرة الأجهزة
٢- استكشاف المكان و رسم كروكي له
٣- تثبيت نقطتين و نجيب احداثياتهم ب gps
٤- عمل traverse بأستخدام total station
٥- رفع مساحي ب total station
٦- عمل ميزانية دقيقة علي بعض نقط traverse
٧- عمل ميزانية عادية علي باقي نقط traverse
٨- عمل spot levelling يعني نقط كدة تعرف منسوبها عشان يفهمك الطريق مايل او هنا في رصيف او هنا في سلم
٩- عمل قطاع طولي و قطاعات عرضية لطريق
١٠- عمل ميزانية شبكية في مكان ما في الصحراء
١١- عمل نموذج GiS
بس ترسم بقي كل شغل دا و تقدمه طبقا للمواصفات المطلوبة منك و معاها شغل حساباتك
:::::::::::::::::::::::::::::::::::::::::::::::::::::::::::::::::::::::::::