Tech Planet

5 مخاطر حولين اولادنا وهما بيمارسوا التكنولوجيا لازم الآباء ينتبهوا لها :

1- الملاحقة الجنسية : من الصعب تخيل ان ممكن حد يستدرج طفلك إلى فخ كارثي قد يدمر مستقبلة ولكن للأسف دي حقيقة موجودة وأسهل طريقة لاصطياد الفرائس هي أكثر مكان يكون فيه الأطفال بعيد عن أهليهم وهي الألعاب ال online اللي تعتمد على اللعب مع غرباء بالإضافة إلى أن من السهل أن الطفل يتعرض لمحتويات على الانترنت غير لائقة اخلاقياً وفكرياً

2- الاحتيال : لو حد عرض على طفل مليون جنية اكيد مش هيستجيب ولكن لو عرض عليه حساب للعبة مليان بالاسلحة و الفلوس للعبه اللي بيحبها مقابل بطاقة الائتمان بتاعت الوالدين ساعتها ممكن يفكر فعلاً

3-حسابات غير حقيقة :حسابات الأطفال على مواقع التواصل الاجتماعي مصدر لمعلومات مهمة جدا ممكن تسمح لشخص أنه ينشئ حساب مزيف مشين للأطفال أو لأهليهم أو انتحال شخصيتهم وارتكاب جرائم باسمهم

4- الصحة : الأنشطة البدنية والمذاكرة والخروج والصحاب ... كل الحاجات دي لها نهاية إجبارية زي الإجهاد والزهق و تأخر الوقت خارج المنزل … لكن الألعاب الإلكترونية مصممة انها ميكونش لها نهاية إلا النوم القهري وهي ممتعة بدرجة ممكن تتسبب في إدمان حقيقي للطفل بالإضافة إلى قلة الحركة اللي المفروض يخرج فيها طاقته وعمل خلل في نظام اكله ونومة و كتر التركيز يؤثر على الأعصاب وضعف النظر على المدى البعيد

5- الانعزال الاجتماعي : الألعاب الالكترونية و مواقع التواصل الاجتماعي عوالم افتراضية الإفراط فيها يتسبب في حب الطفل للخيال و رفضه للواقع وده لأن الواقع الأفتراضي بيختار فيه الحاجات اللي مش بتضايقة بعكس الواقع اللي بيكون في حاجات ضد رغباته

هل الحل اني اخلي ابني بيعد عن التكنولوجيا والإنترنت ؟؟
اكيد لا لان التكنولوجيا اصبحت شئ اساسي زي الاكل والشرب

امال ايه الحل !!
الحل انك تقرب من طفلك وتتكلم معاه وتعرف هو بيعمل ايه من خلاله ولما تعرف انه بيعمل حاجة غلط متعنفوش علشان تكون مصدر ثقة وأمان ليه وحاول تتصرف مع المشكلة بشكل غير مباشر
متتطفلش عليه ولكن اتعلم اللعب اللي بيلعبها والبرامج اللي بيستخدمها عشان تشاركه فيها وتعرف المشاكل اللي ممكن يقابلها وافتكر دايما كل يوم في جديد

علم ابنائك قيمة الوقت واشغلهم أوقاتهم بأنشطة مختلفة مثلاً يمارس رياضة , يتعلم لغة جديدة , يتعلم أنه يصنع التكنولوجيا مش بس يستخدمها , إنه يكون صانع محتوى مش بس متلقي

مهما كنت مشغول ووقتك غالي افتكر ان ابنك اغلى