Chez Marioum

مساء الفل😍😍 العيد قرب تعالوا نعمل زي كل سنه و نتكلم عن قطعيات اللحمه و طرق استخدامها تعالوا النهارده حانتكلم عن اهم قطعيه في العيد و هي لحمه الفته .. و الفته من الوصفات اللي ممكن نعملها بقطعيات مختلفه في الذبيحه سواء كانت اللحمه فيها انسجتها طريه او ناشفه لانها لحمه بتتسلق..
لحمه الكتف Beef chuck
وهي من انشف اجزاء جسم الذبيحه لانه بيستخدم في الحركه و فيه عضلات و مع هذا هو جزء ليه نكهه قويه و جميله…
الكتف ممكن يطلع منه اشكال مختلفه .. ممكن القطع اللي بتستخدم في الفته مثلا او في الطواجن اللي بتحتاج الفرن علي نار هاديه مع وجود سوائل في الطاجن او كباب الحله علي النار بس بردوا نار هاديه و وقت في السوا..
كمان ممكن يطلع من حزء بسيط منه لحمه ستيك steak لكن مهم جدااا تسويه بطريقه بطيئه جدا
كمان هي قطعيه مناسبه المفروم و البرجر و اي نوع من الكفته… يعني الخلاصه .. الكتف لحمه بتحتاج سواء رطب يعني مع وجود سائل و علي درجه حراره مش عاليه عشان نحس بطعم و طراوه للحمه..
اخر ملحوظه….. لحمه الفته او اللحمه المسلوقه عموما عشان نحس بطعم حلو للشوربه و اللحمه….
ننزل اللحمه في الحله مع البصل و المنكهات اللي هي ورق لورا و حبهان و مستكه يتشوحوا مع بعض و كمان ١/٢ م سكر بتدي طراوه للحمه و الانسجه و يتنكهوا مع بعض قبل ما نحط الميه او السائل و الافضل يكون سخن ..افضل كتير ..و ممكن نحط جزر كرفس لو حابين …و نبدأ نحسب عمليه السوا من وقت غليان السائل مع تهدئه النار قدر المستطااااااع … لان كل ما نسوي اللحمه علي نار هاديه و متستعجلش عليها كل ما تاخد نكهه و طراوه اكتر بكتير ….. والف هنااااا😍😍 و لو في اي سؤال انا تحت امركم 😍😍