iDesign

علم الدلالة semantics

تعريفة : الدلالة عن الشئ في حالة عدم وجودة

وبيستخدمه المصممين والكُتاب للتعبير عن صور و أفكار من غير ما يظهروها (زي انك تصور صبار عشان تعمل إعلان عن كريم إزاله شعر من غير ما تظهر رجل البنت) والأسلوب ده من التفكير بيستخدمة المصممين في الإعلانات المطبوعة واللوجو وقليل جداً لما بيستخدم في التلفيزيون وفي الإعلان هنا نجح الأساتذة الكريتف عمرو الحداد وأحمد حسين في تطبيق علم الدلالة في الإعلان ( الرحلة قصيرة متسافرهاش) اي حد تاني كان هيعمل الأسلوب العادي والمستهلك وهو انك بتعرض المنتج او الخدمة وتقول المميزات او توعية بالخطر ودة الاسلوب المستهلك اللي بيستخدمة أغلب الصناع ( في الحالة دي واحد بيدمن وفي الأخر بيموت أسلوب إعلانات (رخيص) ومستهلك وعديم الفكرة والاعتماد الاساسي بيكون انك تصورها بشكل حلو او نجيب فنان مشهور ينصح الناس) هنا استخدموا الاسلوب الأذكي وهو استخدام علم الدلاله عن طريق تصوير قطر الموت عشان يدل على ان الحياة رحلة وانها ملاهي بتلعب وتتسلي في البداية لكن النهاية هي الموت .مأظهرش اي نوع من أنواع المخدرات مكدبش وقال انها اولها وحش هو صارحك بالحقيقة من غير ما يبقي بأسلوب إعلاني رخيص. بالعكس هو استخدم أسلوب سينمائي بيعتمد فيه علي مشهد واحد قصير (من غير ما يقع في الفخ السينمائي ان ايقاع السينما ابطئ من ايقاع الإعلان) وكان الايقاع مظبوط وسريع وسرعة رحلة المخدرات انها بتدمرك بسرعة وأختيار قطر الموت ودلالالته كأسم وسرعه ورعب وتعبيرات الوشوش اللي بتتغير بنفس السرعة للوصول للنهاية والشاشة السودا اللي بتعبر عن الموت . ورغم ان التكنيك ده ناجح جداً عالمياً لكن للاسف مش بيستخدم في مصر كتير لأن أغلب الشركات والمسوقين دايماً بيتعاملوا مع المشاهد أنه غبي ومش هيفهم الرساله من الرموز ولازم تبقي واضحه واللي حصل العكس لما نزل الاعلان حقق نتايج كانت منشورة علي صفحة وزاة التضامن توضح قد ايه المشاهد أذكي من انك تديله المعلومة بالمعلقة وممكن نشتغل بعلم الدلاله والإعلانات تنجح والأفكار تكون فريش شكلاً وقوية مضموناً وتوصل بشكل بسيط.

شكراً لكل واحد أشتغل في الإعلان انه مستسهلش وقدم الفكرة العظيمة بشكل بسيط ومش مستهلك

سقوط لوحة اعلانية كبيرة علي الدائري قبل نزله المعادي