Go with so

اقدم حقيبة ظهر في التاريخ؟!🎒
تمثال الخادم ني عنخ ببي كم من الاسره السادسه.
التمثال من الخشب الملون.

• رأس من الحجر الجيري الملون للملكه حتشبسوت من الاسره ١٨ ولقيناه في معبدها ف الدير البحري.
• وعلي عكس العاده التمثال باللون الغامق ودا عشان الملكه حتشبسوت كانت عايزه تتشبه بالرجال عشان تثبت شرعيتها ف الحكم دا غير حاجات كتير عملتها عشان نفس السبب زي انها امرت ان لما يكتبوا اسمها ف اي حاجه او يتكلموا عنها يتكلموا بصيغه المذكر.

•الامير رع حتب وزوجته نفرت
الامير رع حتب 121سم وزوجته نفرت " يعني الجميله" 122 سم من الاسره الرابعه من الحجر الجيري الملون لقيناها من ضمن حفاير مارييت في منطقه ميدوم وال بيميز التمثال دا العيون المطعمه ال بتبينهم واقعيين ال بسببها العمال لما دخلوا المقبره اتخضوا بسبب انها باينه كأنها حقيقيه جدا .
ومن التفاصيل ال كان بيهتم بيها المصري القديم هي ان تماثيل الستات بتكون باللون الكريمي الفاتح لكن تماثيل الرجاله باللون الغامق" عشان يعني بيشتغلوا وشقيانين".

هو انتِ على راسك ريشه؟!
دي حاجه احنا بنقولها لحد دلوقتي بس مش عارفين اصلها ايه؟
• نظام ماعت هو المبدأ الاخلاقي وتطبيق العدل والحق والصدق الذي اتبعه المصري القديم وكان بيتم تصويرو وهو علي راسو ريشه.

• التمثال الوحيد المؤكد ان هو للملك خوفو "٩سم" علي الرغم من ان هو بينسب ليه هرمه ال من ضمن عجايب الدنيا السبع لكن دا تمثاله الوحيد المؤكد.
• من عصر الاسره الرابعه لقيناه في ابيدوس من ضمن حفاير بتري مصنوع من العاج التمثال كله "٩سم" ولما لقوه ف الحفاير لقوا جسم التمثال بس وملقوش راس التمثال بس اثر الكسر كان جديد فعرفوا ان اكيد راس التمثال موجوده فكملوا حفاير عن طريق انهم ينخلوا الرمل تلت اسابيع لحد م لقوا راس التمثال وال اثبت ان التمثال للملك خوفو هو وجود اسم الملك الحوري علي جانب قدمه اليمني وهو التمثال الوحيد المؤكد انه للملك وموجود ف المتحف المصري بالتحرير، وفي برضوا اجزاء من تماثيل تم العصور عليها في الجيزه ويعتقد انها للملك خوفو وهي موجوده دلوقتي ف متحف بوسطن ف امريكا.

•اقدم هرم في العالم
هو هرم زوسر المدرج في سقاره يرجع للاسره التالته بناه إمحوتب اول مهندس وطبيب في التاريخ بعد م اضاف علي المصطبه (الشكل القديم للمقابر) العديد من التغييرات وف الاخر وصلنا للشكل دا ال بيتكون من 6 مصاطب وليه مدخلين المدخل الشمالي وهو المدخل الرئيسي "دا ال بيدخلنا حجره البئر ال فيها التابوت" ومدخل جنوبي تم فتحه في الاسره 26 كنوع من معرفه اثار الاجداد والحفاظ عليه وعملوا فيه ترميمات ومن المدخل دا هنلاقي ممر اخرو بئر بعمق 28متر فيه تابوت الملك زوسر المصنوع من الجرانيت الوردي، وهو من ضمن مجموعه جنائزيه ضخمه وتعتبر اول عمل معماري متكامل من الحجر؛ هنلاقي من ضمن المجموعه الجنائزيه المعبد الجنائزي ومجموعه من المقاصير للاحتفال بالعيد الملكي المعروف ب"حب سد" وفناء احتفالات وحجره السرداب شمال الهرم ولقينا فيها تمثال للملك زوسر وموجود دلوقتي ف المتحف المصري وف الغرفه دي كان قدام عين التمثال مفتوح ثقبين عشان كأن الملك بيبص فوق للسما لاجداده، ومقبره جنوبيه ومجموعه مخازن حوليها سور ضخم من الحجر الجيري.

• نصوص الاهرام"متون الاهرام" من هرم الملك ونيس"اوناس" من اواخر الاسره الخامسه وموجود جنوب هرم زوسر وهي بتكون عباره عن دعوات للملك وتقديم قرابين وتصور الكهنه لنشأه الكون الاولي واسماء المعبودات ال بترعاه وف السقف مرسوم نجوم بحيث تكون شبه السما ومتلونين باللون الازرق المصري.
• الهرم من برا متهدم بس لسه محتفظ بكل دا لكن الجزء الجنوبي من الهرم رَممو خعمواس اول مرمم في التاريخ ابن الملك رمسيس الثاني وكتب عليه ان هو رمم الجزء دا حباً ف الحفاظ ع تراث اجداده.

•واجهه المتحف المصري فيها تفاصيل كتير وكلها ليها معني فهنلاقي علي جانبي المدخل عمودين علي التراز اليوناني وفوق في النص تمثال نصفي للمعبوده حتحور ويتوسط قرنيها قرص الشمس وعلي جانبيها هنلاقي تمثالان للمعبوده إيزيس وهي لابسه زي اغريقي التمثال ال علي اليمين ممثل وهو مغلق العينين ليمثل الليل والتاني ال علي اليسار مفتوح العينين ممثل النهار وفوق علي اليمين مُسجل (1901) وهو تاريخ افتتاح المتحف وعلي اليسار (1897) وهو تاريخ وضع حجر الاساس للمتحف.

• اغلبنا بيلاحظ حجم عمامه محمد علي الكبير بس منعرفش هي كبيره اوي كدا ليه؟
السبب لان هي مكانتش مجرد عمامه لا دا هي كمان عباره عن كفنه ودا كان رمز للشجاعه.

𓋹Archaeological information𓋹