Tactics90

اوليسيه استلم الكورة وبيلف وشه..

احلي خبر شوفته النهاردة من موقع ترانسفير ماركت هو دخول ليفربول سباق التعاقد مع هيثم حسن،
حاليا سيلتيك الاسكتلنديّ هو الأقرب لانهم اعلنو انهم في محادثات مع وكيل اللاعب ومقربين منه لكن دخول ليفربول علي الخط ممكن يغير وجهة اللاعب للريدز.
فياريال كمان حدد مدير التعاقدات عندهم هيثم حسن كواحد من خيارات ميركاتو النادي الصيفي لتدعيم مركز الجناح في الفريق. بالتوفيق لهيثم ان شاء الله اتمني لو مراحش ليفربول يكون فياريال لان مستوي الدوريين الانجليزي والإسباني هيضمنو تطور احسن بكتير من وجوده في سيلتيك رغم أسطورية النادي الاسكتلنديّ.

خلاص هدينا دلوقت، بعد فترة الانفعال والحزن من سيناريو خروج منتخبنا الي كان صعب فعلا علي الكل واخدنا لمبالغات أنا شخصيا بعد ما رجعت أفكر واشوف بالمنطق بعيد عن العاطفة فهمت اننا بالغنا فعلا، لأننا كنا قريبين ولأن التحكيم فعلا كان فيه مجاملات ضدنا بمنطق مجاملة الفريق الأكبر لكن مش فضيحة بقي ولا غيره.
نيجي بقي ل نصف نهائي تاريخي بين المصنفين الأعلي في تصنيف الفيفا.
التصنيف قبل بداية البطولة:
1-الأرجنتين
2-أسبانيا
3-فرنسا
4-إنجلترا
…
عندنا مباراتين نصف نهائي الأولي نهائي أوروبي وكلاسيكو أوربي بين فرنسا وأسبانيا.
من التشكيل وحضور النجوم والقوة البدنية والسرعة وأغلب العوامل فرنسا واضح انها أجهز وأحسن حاليا وبفارق كبير كمان، فرنسا من بداية البطولة وهي واضح انها مش لاقية منافس، تفوق واضح علي كل المنافسين الفريق الوحيد الي لعب عليهم كان الشوط الاول من مباراة السينغال وعلي استحياء يعني، غير كده فرنسا تفوقت بدون مقاومة حقيقية باستثناء مباراة باراجواي الي لعبت كرة قدم ملهاش علاقة بكرة القدم يعني كانت كل محاولاتهم استفزاز لاعبي فرنسا وإخراجهم من تركيزهم.
لكن، من بداية البطولة وانا عندي رأي واحد ان فريق واحد في كاس العالم ده عنده فرصة أمام فرنسا ويقدر بتكنيك معين يتفوق عليهم في اجمالي ٩٠ دقيقة، الفريق ده هو "أسبانيا".
بس ركز معايا بالله عليك، أنا مش بقول ان اسبانيا أفضل من فرنسا ولا ان حظوظها اعلي، لا فرنسا تظل أفضل ومرشحة أكبر للعبور للنهائي ولكن أسبانيا مقارنة بباقي ٤٧ منتخب الي شاركو في كاس العالم هو المنتخب الي عنده اكتر حظوظ في ايقاف فرنسا وانه يلعب عليهم.
أسبانيا عندهم نقطة قوة الاستحواذ علي الكرة وحرمان فرنسا منها بدون السماح لفرنسا بالتحولات السريعة عليهم، لأن اسبانيا مش هتضغط فرنسا أصلا ولا هتهاجمها بخطوط منسقة وضغط منظم، اصل شوف فرنسا التشكيلة الحالية دي فيها ٣ مجانين قدام مينفعش يعملو عليك مرتدات. مينفعش تدافع قدامهم لان الجودة بتاعتهم في الاختراق والتسديد والمهارات كبيرة جدا.
اسبانيا عندها الجزء الاول في المباراة ده انها تقدر فعلا تسيطر علي الكرة وتستحوذ بوجود بيدري ورودري وفابيان رويز مع الاطراف الي واحد منهم دايما بيعمل تفوق عددي في نص الملعب سواء كوكوريلا من اليسار او بورو من اليمين.
اما اسبانيا تكسب المعركة الاولي دي هيبقي عندها معركة تانية بقي ان الأفراد الي قدام لامين يامال وأولمو واويارزابال يقدرو يصنعو لقطات تتوج كل ده في الجانب الهجومي.
دي السردية الي نجحت بيها اسبانيا امام فرنسا في يورو ٢٠٢٤ ولكن بالشكل الحالي، عشان اكون صادق في رؤيتي أنا شايف ان الاحتمال الاكبر انها متنفعش أصلا، فرنسا عندها وسط ملعب كوني ورابيو عاملين اداء خرافي والدكة بتاعتهم تشواميني وايمري.
دفاع فرنسا حاليا كمان الثنائي صاليبا واوباميكانو سرعة وقوة وتغطيات في القمة فعلا.
نهائي مبكر من وجهة نظري والفائز من اللقاء ده اكيد حظوظه هتكون اعلي من الفائز من لقاء الأرجنتين وإنجلترا.