Cairo Confessions

222599
: Follow us on
Mood:😕
Female, 30 confesses:
"مشكلتي تبان هبلة بس يا ريت تحاولوا تقروها وتتخيلوا نفسكم مكاني. أنا متجوزة راجل طيب وبشوش ومخلفة ولد ربنا يحميه. مشكلتي في الحياة إن جوزي مهووس بصفحته على الفيس. وبيعمل فيديوهات هو والولد غريبة والله كل شوية. أى موقف في حياتنا يبقى أى حاجة ألاقيه بيصوره.
زمايلي في الشغل حافظين شكل بيتي ولو اشتريت خددية جديدة بيعرفوا. أنا اتخقنت وحاسة إني محتاجة خصوصية مش طايقة.

لما كلمته قال لي أنا مش بطلعك في أى حاجة ولا صوتك حتى، وهى الليفنج وأوضة الواد. وإن كله بيعمل كده وعادي يعني وبيهزر مع إبنه وصحابه.

الفكرة الولد بدأ يفهم وبقى معاه على الخط وبيمثل معاه المواقف وحاجة مقرفة بجد. أنا بقيت مش محترماه للأسف مكسوفة إني بقول كده بس دي الحقيقة. أهم حاجة عنده عدد المتابعين والمشاهدات ولو يوم ريل جاب مشاهدات او تعليقات كبيرة بيبقى مبحلق قدام الموبايل طول اليوم كل شوية يشوف ويقرأ لي ويضحك لما ببقى مش عارفة أروح منه فين.

هو طول عمره صحابه كثير وبيحب الناس والناس بتحبه ودي كانت حاجة محبباني فيه من وقت الخطوبة. بس من ساعة الصفحة اللي عملها دي الحياة بقت الصفحة. نروح حتة لازم نصورها ويتصور فيها، ناكل أكلة لازم يتصور في المكان ويعيش دور المشهور. أى موقف يحصل ممكن يعمل منه فيديو في ثانية يكون مظبط النور وبدأ تصوير.

والله العظيم حاسة إني مش عايشة حياة حقيقية مع بني آدم حقيقي، ومش عارفة أفهم إيه سر حبه الشديد للحياة دي. يعني أنت أما تبقى معروف على الفيس خلاص بقيت مشهور يعني؟
أنا مش عايزة كل الناس تبقى عارفة الجديد في حياتي حتى لو حاجات عادية ماتبانش خصوصيات. مش عايزة الناس كلها تبقى عارفة عني أى حاجة أصلاً. ادعوا لي الله يبارك لكم واللي عنده نصيحة يقول لي"