Cap Rwan Elshaarawy

قواعد التخسيس الصحي

1- حرق الدهون مرتبط بعدد السعرات اللي بتاخدها عن طريق الاكل
وعدد السعرات اللي بيحرقها جسمك خلال اليوم .. شوف جسمك محتاج كام سعر حراري ف اليوم وقلل السعرات دي من 500 ل 1000 .. عن طريق برامج الاكل الصحي

2- مفيش حاجه اسمها عاوز اخس من منطقة كذا ..
لان الدهون متوزعه ف الجسم كله بنسب معينه لكن فيه منطقة معينة فيها دهون اكتر تبعا لنمط الجسم ومستوي النشاط .. وحل الموضوع ده هو تمارين الكارديو بكل انواعها يعني المشي والجري والايروبكس ونط الحبل والزومبا والسباحة دي انشطة بتخسس الدهون من الجسم كله ..

3- لازم نعمل ميكس بين تمارين الكارديو وتمارين المقاومة عشان نخس بدون ترهلات .. لان تمارين المقاومة مهمة جدا للعضلات وبتحافظ علي مظهر الجسم مشدود ومتناسق ..وهنا بقي ممكن نقول تمارين مقاومة لمنطقة معينة عشان اشد الترهلات اللي فيها .. ومتخافوش ..تمارين المقاومة مش بتكبر العضلات زي ما انتو متخيلين
هيا بس بتشدها وبتديها حجمها الطبيعي .. ولما العضلات تاخد حجمها الطبيعي معدل الحرق
هيكون اسرع حتي ف ايام الراحة ..

4- انت طبيب نفسك حاول تثقف نفسك وتقرا عن العادات الصحية والاكل الصحي واهمية النشاط البدني ..

5- التجويع خطر علي الصحة وبيسبب ثبات الوزن .. واهدار لعضلات جسمك ..لازم ناكل بطريقة صحية في حدود السعرات المناسبة .. وجبتين اساسي (فطار - غدا )
و 3 وجبات خفيفه (سناك ) الوجبات الخفيفه طبعا بدون كربوهيدرات او دهون
يعني ممكن تكون خضار فاكهه زبادي .. ونحاول نشرب ميه باستمرار لان الميه اساسية ف عملية حرق الدهون ..

6- الكربوهيدرات اساسية ف وجبة الفطار هيا اللي هتديك طاقة طول اليوم .. ونقللها في وجبة الغدا ( 5 ملاعق أرز حد أقصي ) وممكن نستغني عنها ف وجبة العشا .. ولو جعت بالليل اياك تاكل حلويات دي مصيبة سودا وهتبوظلك اليوم
كل اي خضار او فاكهه .. ( سعرات أقل وفائدة صحية أكبر )

7- النوم الكافي مهم جدا .. لان اثناء النوم جسمنا بيتعافي من اي خلل او اجهاد وكمان النوم ده اهم تمرين للجهاز العصبي المركزي .. وبيظبط الايقاع الحيوي للجسم .. ولا يغني نوم النهار عن النوم بالليل ( 6 - 8 ) ساعات ..

مشكلة الكرش والرجلين للبنات
اشفطي بطنك وانتي ماشية وانتي قاعدة بلاش تتباهي بكرشك الله يكرمك🙈

بلاش فكرة الدايت الي كل يوم هتبدأي من بكرة انتي واصحاب الكرش اصحابك وابدئي من دلوقت🙆😂

بلاش تسمعي كلام صحابك دايت ال٥٠ كيلو في اسبوع ده مش دايت ده انتحار 😂

بلاش الدايت الاسلامي تاكلي محشي وكشري وتقضيها رمرمة وتدعي ربنا تخسي تفتكري ربنا هيرضي بالي بتعمليه في نفسك 😂🙆

بلاش مرار ونبي وكل شوية عياط واكتئاب كدة مش هتخسي وكرشك هيبقي مترين قدامك انتحري وريحي نفسك🙍

مفيش حاجه اسمها اكل دايت ووصفات بسبوسة وكنافة دايت بلاش افتكاساتك الغير شرعية ومش هتخسي والي خلقه ربنا كله كويس بس ناكل بالعقل ومتشغليش دماغك😂🙆

بلاش ماتكليش حاجه علشان تخسي كدة هيجيلك جفاف وهتقعي من طولك ومستشفيات ومحاليل ومرار بلاش طرق التخسيس الغير شرعية دي 😂

بلاش محشي الحاجة اللي عامل زي القنبلة ده وتقولك عاملاه بزيت زيتون ومقلله الارز بتكدب عليكي

متدبيهاش وتنامي كدة كرشك هيدعي عليكي

متناميش ١٤ ساعة في اليوم ٨ حلوين من ١٢ الي ٨
بلاش جو السهر ومبعرفش انام بدري والجو ده صحتك اهم من الرغي

كلي اكل صحي بلاش جو كيت كات وجلاكسي اللى هيودكي في داهية

بلاش جو تعدي تلزقي في الكرسي خليكي خفيفة😂

بلاش تاكلي في المطبخ وانتي واقفة الاكل مش هيطير بطلي طفاسة😅

اشربي حوارق الكرش😂 (كمون-جنزبيل_قرفة_اضافة الشطة الي الطعام بنسبة خفيفة)
اشرب مياه كتير اوي قد ماتقدري والله مبتعملش كرش
بلاش ماك وكريب وعك بطلي اكل الجامعة والرمرمة
وبلاش تاكلي بسرعة والله مش سباق اكل كلي علي مهلك
متشربيش ازازة مياه في نص الاكل وتقولي اوه كرشي طلع اشربي رشفات

خلي الفاكهة قبل الاكل
بلاش تدلقي الملح والسكر علي الاكل استخدميه بحظر

هاتي ٢ كيلو تفاح كل يوم تفاحة كدة علي الصبح بلاش كروسو وكيك💪🏽

اقولك حاجه سر التخسيس في ٤ حاجات:
١-نامي واصحي بدري نامي ٨ ساعات مش ١٦

٢-نظمي سعراتك متاكليش بالبركة

٣-اتمرني كل يوم ساعة مانتي بتعدي علي النت ١٥ ساعة في اليوم مش ساعة التمرين هي الي تقيلة عليكي اوي 💪🏽✔️

٤-راحة نفسية مفيش حد هينفعك الا نفسك خليكي دماغك علي وضعها وريحيها😂