Inspiration

دلوقتي عايزين نتكلم عن ظاهرة بقت تخلي معظم الناس تبقى محلك سر في حياتها ، الظاهرة دي أسمها الخوف من الإنتقاد ، ليه معظم الناس في حياتها بتخاف انها تعمل عمل جديد في حياتها خوفا من نقد الآخرين ! طب هل العيب على الناقدين ؟ بصراحة لأ ، أنت لو بصيت على حياة كل واحد فينا هتلاقي متكونة من أشخاص بثقافات مختلفة ، من أجيال مختلفة و كل واحد عنده قناعاته الشخصية اللي بيتصرف على اساسها ، يعني من الاخر أي فعل أنت بتعمله ليه معارضين في حياتك اليومية، طب الحل في ايه ؟ الحل انك تكون واثق في نفسك و في اختياراتك ، يعني دلوقتي أثق في نفسي ثقة عمياء و مليش دعوة بالمنتقدين ؟ لا برضو مش بالظبط كدة ، أسمع النقد الموجه ليك جايز يفيدك في أي وقت من الأوقات و لكن متسمحش لغيرك انه يتفه من اللي بتعمله، يعني على سبيل المثال أنت قررت تفتح مشروع ، جيه واحد قالك أنت مجنون حد يضيع فلوسه في الهبل ده ؟ و جيه واحد تاني قالك مش الأحسن انك تستنى تعمل راس مال اكبر بحيث تكون مش بتجازف ؟ الأتنين هنا ناقدين واحد أسلوبه مقبول ، واحد أسلوبه غير مقبول ، واحد قدر يوجه نظرك لنقطة قادرة تفيدك و واحد كرهك في الموضوع كله و خلاك تتقفل منه ، يعني ببساطة أسمع النقد البناء اللي قادر يضيفلك، الخلاصة أنك لازم تتقبل انك هتتعرض للنقد على مدار حياتك ، وارد كمان تسمع آراء سلبية ، بس أفتكر انك عشان تتجنب النقد مقدامكش الا حل واحد : هو أنك متعملش حاجة و تقف ثابت و بالتالي مش هتقدر توصل لاي جديد في حياتك.