Xacobeo 2021 e a Ruta da Seda

Xacobeo 2021 e a Ruta da Seda

"O Xacobeo 2021 e a Ruta da Seda: Camiños para o diálogo Oriente - Occidente" é un proxecto promovido polo Instituto Galego de Análise e Documentación Internacional (IGADI) ao abeiro do programa O teu Xacobeo 2019, impulsado pola Consellería de Turismo e Cultura da Xunta de Galicia, e no que colaboran os Concellos de Santiago, A Coruña, Pontevedra e Lugo.

Este proxecto pretende sentar os cimentos para un diálogo compartido aproveitando a potencia narrativa do Xacobeo 2021 para afianzar os vínculos entre Galicia e China, comprendéndose desde a narrativa china da Ruta da Seda e situando a Compostela coma capital do diálogo euro-asiático.

Para acadar este obxectivo, artellarase unha rede de interese galego-chinesa, levarase a cabo o estudo “O Xacobeo 2021 e a Ruta da Seda: Camiños para o diálogo Oriente-Occidente” e promoverase Santiago de Compostela coma capital das relacións sino-europeas arredor do vínculo entre o Camiño de Santiago e a nova Ruta da Seda por medio dunhas xornadas homónimas que terán lugar en abril de 2020 no Concello de Santiago.