Calture

የቦሎቾ አልፋቴ

ኩፉች አሴ ጋክ ተባሊምኮ ጠረቤዘ፣ ወንበር፣ ኮመዲን፣ ሳጢን፣… ብያቆምሳነይ ፈት ጠጠይ ተባሊቅ እትሮን፡፡ የቀኚት አዘሪ መስኮት መዘናትከ/ ጊርጆ አልትከፈታን፡፡ ሆሽተ ዱመ ያበቀሉ ባሊቅ ቀልበኒሙ ጣሎኔ፣ ያወጦ ያወርዶን፤ እነቅሎ እጢሎን፤ ቢንጅኒሙ ዬንዙይ ስልከ አሌሳቦ ተክ አሱይ፡፡

ደኑር አቦ አደ ግነ ስልከይ እንካኮን፤ እጢሎ እነቅሉያን፡፡ አደግነንገ ቶረቀትዋ ቲስክሪብቶ ያዋልኮን፡፡ ቡስቤኒሙ ዋሀተ ኢንዞተ ደበልቡያን፡፡ ሀይ ሀይ ሀይ …! እድጎቦን እነቆን ሀይ ሀይ ሀይ …! እድባብሎን ለዮን የቀጭቀጫት ደዊ፡፡

ዱንቡጠም የጋር እንደት ዘቢበ ጋክ ባት፡፡ በቆረኜ ጅስም ኣደኜይ ቀሚሰ ለበሶን፡፡ ተተስቲ፣ ተሻሼይ፣ ሙሹቅ ቲብሉ ወዘነ ሸልከ ትያሻን ስንትርኒሙ ቲጋገዞ ያፍትነት በሬድነተ ግረገቡኒማን፡፡ ኮ! ብቾናሀ?

ደኑር አቦ፡- ሁልም ኤዳን፣ ጩሎ ጮንቦም አልቀራን፤ ተጠረገ ኤዳን፤ ማ ቀሬ?
ዘቢበ፡- ኡሃዉ ያለመስ፤ ሰበ ሮሴኔ ጋሪ ጡልትከ ያኬስላን፤ እትባላን እመስላን በልዳሌ፡፡ ኡስቤም አላትፌዶት፡፡ አለነስ! እሄዋ ሞጎቴ አለነ፤ ብቼ አሎንኩ ሞጎቴ ያትዋልከኛን፤ ፈየኮ አሳወ ያሽኛን፡፡ ሰብ አግኖቴ አንዠ፣ ድግላዬ በለ ሰቸ ሄደ፤ እሄዋ ሞጎቴ ቀሬነ፡፡ ሆሽትነ ቀሬናነንስ እለሻዉ፡፡ አኩው ገባሽ? ባሉ ደኑር አቦ በኖዞ

ዘቢበ፡- ዮል ጀመራሀስ…
ደኑር፡- ጀመረኝ!…አይነኮ እለጀምረኝ? የጀምረኝስ፤ የድግላዬ ሀበር ተይጠፈ ጀመረኝ፤ የሌቃኝ ሁል ሙለ ልሎጭ አተረኝ አባቡሬ አሼኝ፤ ኮኬቴ ገብ ልያሽኝ አላሃነን ፈረ አጫቀሰ አደገኛን፤ ዬው አዘር አመኛት አከተማን፡፡

ዘቢበ፡- ብቼመከ? አጲ ምን ሊጥለፉይን፤ አለሀ መለ ዮባን፤ ኡግረ ያበ አለሀ ጥፍረ እላትር... አቦ አሳወ ገረድ ላንጭር ወክት መለ እትቀብጥ እሌን እነይ አሎን? ቀለ በረድ ባሎኔ የሴራይ ሙት በልክነበልኩም ትትቀጦም በሉናን ባሉ ዪዳር ዤለኒሙ ኡፍተ ትያንዙ፤ ሙሹቅ ባሉ፤ አነውግነ አላንዞት ናር፡፡
ዘቢበ፡- ለትቀጥነ! ሰብ በምን እትጎበላን? ኡፍተም አላንዜነስ፡፡

ለምን እምጫን? ለምን እትጎበላን? እከታን፤ ኡፍተ ኢንዞቲ ቢጥለፈዉ? ተዲን ታደ ዬለ አታምጪ፤ ሊዝን እሌ ኢዝነ እቀዴን ባለ የቦሎቾሚ አለሀ አውፈ የበለነ፤ ኢስራፍን፡፡ ምነ! አተንገ በል ዱሜ አትኒጭኝ፤ ታቅዋ እለመስለኝ፡፡
ደኑር አቦ፡- አዉ የደፈ፤ ዱመኒሙ ደፉ፡፡ አዉ እከታን…ቁንቁቼ በሎት ጀመሩ፡፡
ዘቢበ፡- ወግን! ቆት ያንዜ ቆጠ ዮጤን ደሬ ገቡ ጉርጉሜ ትትል ለቁንቁቼይ ጀዋብ እመስላን፡፡ ላፍቴም የትሊቄኔ የዲግሲ፣ የድበሲ የባሽ አሽ፤ ቆተሜ ልቴዉጂኝ አሽ ቱጉግ በባለይ ጅረ መዬ የደፋትቢ እመስላን!

አሰላም አለይኩም ባለ የሚሽ ጠንበ፡፡ ዋለይኩም አሰላም ወራህመቱላሂ ወበረካትሁ! ረቢየ ተደሬ መጣት፤
ደኑር አቦ፡- ማኒ?
ሙለሞ፡- ኬርገባተ፤ ሙተይ የዤገንኩቡይ ብረ ዋቡኝ እላነን፤ አንጉቼነ ሽኩሬ ዋጆም መጠ ናር፡፡

ደኑር አቦ፡- ምንን ሙለሞ! አተ ቱኑ ባስከብኝስ! ሙላ ጋርምከ ፎዶ ደበለ ጦሰ ልያወጭኝን! አላሀ እላሽንኩም! በሌ ሊሼብሊ እልቅ ኤለይ፤ ለሞጎት እሄን ብቸ አቦ ደኑረዉ...!

ረቢየ፡- ዘ ዘ ዘምዘም ዋሽቶም መጣት ናረ፡፡ እትክለወስብያው ማዠ ወሰድሽብኛኔ ጅግ ባሽኝ? ባተሻት፡፡ ሀንኩን! እተ ሰብር ኤሎ…ገፍ ባታኔ ላባሽ እቴዉጂ ናር፤ የሹራመ አሳወኮ... በሄው ዘለመ ባሬብኛን፤ ቺፎምከ የጂጅሽስ፤ ወጄይ ለቢቴ ባይታይ ኮቶቼ፤ ባይታይ መላዬ ላቅትለይ? ባሉ ደኑር አቦ

ዘቢበ፡- ዮነም ትዮን ሰንጋይ መጠ?
ደኑር አቦ፡- እሄው ማቻላን ባሎ ዱመከ ደፈ፡፡
ዘቢበ፡- መቻላን! ሬርከ ኢላቆምስ፤ የምን ጨረጨራን ለይቀራን ነግዳሽ ኩስ…
አ አ አትፍጂ አለሀን ፍሪ፤ አቦ ጠበቀት፤ አቦ ምካት! ባሉ ደኑር አቦ፡፡
ዘቢበ፦ ቴረቢያ… ረቢያ
ረቢየ፡- በፋጡልት ብትመጭም ዬ… ጠንበሸ ቀደመ ጄጄ፡፡
ዘቢበ፡- እንዴ ባሬ አቅርቢ ደኑር አቦ ሙልፍቴን... አይኔን ባሬ ቀጭ ያሲ ያቀትሉቡያን፡፡
ደኑር አቦ፡- እለውበለ፤ እከተኛን፤ ላይኔ ልዮርድኝን? አተነው ፈሬ እለውበለ፡፡ እሄም ትልመጭ እበላው፤ ተገበየ ትልመጭ ወጡ፡፡

ረቢየ፡- ኡንቁራሪቴ የከራበኮ እትፎጋዉ ባተ ጦሸ ባታት ባሊ፤ በድግላዬ ሞጎት እነይ ሁለ ፈተኘ ማ አመጣይ? አይ አልቻሎት፤ ያጅባን….

ሙለሞ፡- ለሄ ያጀበኛነይ ቡሀ ጋር ሀረምታኔ...ሀልቅ ፈጀ ናናዌ ባላን፤ ሀዲ ታዲ እለጠቅል፡፡ ወደድኩሀ ወደድኩሽ ዋብኮ ተቄበልኮ ሊበዝብያን ብተር የፈርደ ያጠፌን? ዱኒየ ሉንሸን፡፡

ረቢየ፡- አግኖትመመ! ያፈረይ የጭቃራይ አግኖት! የቦሎቾ አልፋቴ…ምን እታይ ብቸ ግድርሰንበተይ ኡፍተም ልያንዙኝን፤ እዝን ቤዘ የስመ፤...ረቢየዋ ሙለሞ ደኑር የመጠ ግነ ድነበጡ፡፡ ቀለም ተይቄረ ደኑር ወጠ፤ ዘቢበ በገበየ መጣት ኡፍት ሉፍት ተራከቡ የሳድባደኒሙ ጡጥ ጡጥ…
✍️የፍረኪመ የዳሪ ፋሪስ

via የፍረኪመ የዳሪ ፋሪስ