Tagel Amsal

በቃ! አንወሻሽ!

ራሱ ተናግሮ ራሱን አድናቂ
ድፍን ልሙጥ ድንጋይ
ከበዛበት ቀየ የሰው ልቅላቂ
ገለል በይ ፀጥ በይ
በሐሳብ በገቢር ሺህ ማይል ራቂ።

ከፊት መንገድ ዘግቶ መሔጃ እያሳጣ
''ሔድሁ በረርሁ!'' ለሚልሽ ቁልቁል እየመጣ
በሌላ ጎን ታጥፎ ከመራመድ በቀር
አንዳች ትርፍ የለውም ወደላይ ሚያስወጣ።

ማሳው ባረር ታርሶ አራሹ እየሞተ
ብሎ ለሚነዛ አዝመራው አሸተ
''ነፍስ ይማር!'' ነው ምሱ ቆይቷል ከሞተ፤ ገምቶ ከበከተ።

አስተውይ የኔ ዓለም ልብ በይ ሀገሬ
ደጋግሞ አያታልሽ 'በላ ባይ በወሬ

እፍኝ ጥሬ ጠፍቶ ሁሌ ፆም ሁዳዴ
በኾነበት እውነት
ሰው እንዴት ያኸልማል ሲዘናፈል ስንዴ?

ውሸት ሲደጋገም ተረት ሲደራረት
የለም ምንም ምትሃት
ኑሮን የሚያሻሽል፣
ሠላም የሚያሰፍን፣
ችግር የሚፈታ . . . ጥሪት ሚሆንበት
ጤና ተስፋ ሚሰጥ ለዜጎቹ ሕይወት!

ከማይረባ ባል ላጤነት ይደላል!?