KNAPK

Anda Karl Egede-imut Eqqaaniut

Nuummi Aalisartut Piniartullu Peqatigiinni Ataqqinaammik ilaasortaq Anda Karl Egede toqukkut qimagussimasoq kalerrinneqarpugut, Anda Karl ukiorpassuarni nuummi aalisartutut pingaarutilittut inissisimajuarsimavoq aammalu peqatigiiffilerinermut toqqaannartumik siulersuinernut peqataanngikkaluarluni isummaminik aamma tunioraajuartuuvoq siunnersuisarlunilu, tamaattumik Anda Kaali annertuumik eqqaamaneqaatissaminik peqatigiiffimmut tunniussaqarluarsimavoq.

Anda Karl Egede eqqaaneqarnera ataqqinartuuli, mannalu iluatsillugu ilaqutaanut kammalaataanut maanilu aalisartunut misiginneqataanera KNAPK-mi Siulittaasutut siulersuisut sinnerlugit annguppara.

Tulluartutut isigivara ikinngutaata Nikolaj Heinrich-ip eqqaaniaanermini allagaa matumuuna ilanngutissallugu, Nikolaallu akuersineratigut matumuuna allagaa imatut imaqartoq:

Inuk nunaminut ernerulluartoq, nunagisaminut, pingaartumik nunatsinni illoqarfiit annersaannut Nuummut sunniuteqaqaluni, ernerulluarluni ukiorpassuarni inooqataasoq Anda Kaali Egede unnummut napparsimaviisuarmi Nuummiittumi eqissivoq.

Anda Kaali suli meeraalluni inuiaqatigiinni pisussafigisani atorlugu inuiannguit kalaaliusut inuutissarsiutitut tunngavigisaat aalisarneq, ilaatigullu piniarnermik akusarlugu pikkoreqaluni ingerlatilerpai, ukiorpassuarni inuiaqatigiinni tusaamasalluni pikkoreqalunilu aalisartutut inooriaatsini aallullugu pigami suli inuusoqaluni qatanngutini ilaquttanilu ilatigut peqatigalugit aalisariutinik pisaartalerpoq, sulilu inuusulluni angajuni Vittu ernini jorngunilu annikinnerusumik piginneqatatilugit kilisaammik rajarniummik nioqutissiorfiusunik pisaarpoq, tamannalu sioqqullugu alisariutinik alliartortitaminik angisuunik pisaartorluni, inuiaqatiminut maligassiuilluartuusut taaneqartariariaqalerluni.

Anda Kaali inuutissarsiornermini pikkorilluni ingerlatsinermini, aqqusinermi ilaani suleqatigisaminit ippinaateqartutut isikkoqartunik pineqanermi kingorna inooriaatsimigut allanguvivoq, immalli pissaritaanik atuinini millisikkaluarlugu taamaattoq inoriatsip tamatuma pingaarutaa, aammalu atorluaraanni kingunerisinnaasai inuiaqamminut nittarsaatuartarpai, tamannalu tunngaviulluinnarluni inuiaat kalaallit nunatsinniittut pingaartunik rajarniarnerup iluani anertuumik siuariartulerput. Ullumilu ima siuarsimatigilerlutik inuiaat inuannut allanut sanilliuttutut piulerput.

Anda Kaali utoqqalinermini inuusunnermisut imaani inuutissarsiutigisani ingerlasinnaajunnaaramiuk sorngunami tamanna eqqarsariaasianut aamma sunniuppoq, ilaquttani minnerunngitsumik ukiorpasuarni nuliannguani ilagalugit utooqalinini atorpaa. Unnumullu sivitsortumik nappatigisani timiminiittoq pigereerlugu qasuerfissaminut eqqisilluni iserpoq.
Inuk ulluinnarni inuttut nalinginnaasutut iskkoqartoq, eqissilluni sinilernerata takutippaa inuugallarnermini inuiaqatigiit pillugit ilutsinni suliaqangaarsimalluni inuuneq atugarisani qimakkaa, eqqissilluinnarluni sinilersimavoq iteqqissanani, kiina pilluarpasippoq, sumik ersissuteqarni ornitani iserfigivaa, nuliannguani, meeqqani, ilaquttani ikinngutini, nunaqatinilu qimallugit qasuerfissaminut eqqissilluinnarluni iserpoq.

Anda Karl Egede nunannut inuiaqatinnullu ernerulluareerlutit nunat inuiaqatitillu qimappatit.

Eqqaaneqarnerit ataqqinartuuvoq

Perersunut qujalluta, apuuffissanut apuulluarnissannik kissaallutit ukiorpassuarni ikinngutit
Nikolaj Heinrich.

Kingumut KNAPK-i aalisarnermut saqqummersitsinermut peqataassaaq, taamaattumik Sinerissamiit soorunami aamma Nuummi Aalisarnermik Piniarnermillu inuussutissarsiuteqartut takunissaat saqqummersitsivimmi qilanaarivatsigit.

Takuss.

Ugguuna ilisimatitsilaarpunga ullumikkut nassiunneqarpoq KNAPK-p immikkoortortaqarfiinut tusarniut.

Taannalu imaqarpoq nipisanniarnerup aallartinnissaanut qaqugu peqatigiiffiit innersuusserusunnersut.

KNAPK-mut immikoortortaqarfiit akissutissartik nassiutereersimassavaat Sapaatiuppat 22. marts 2026.

Aalisarnermut pisortaqarfimmut KNAPK kingusinnerpaamik akissuteqartussaavoq 23. marts nalunaaqutaq 12:00

qilanaarpugut tigusaqarnissatsinnut.

ik.in.
Niels Boassen
KNAPK-mi
Pisortaq

Aluukkut Kalaallit Nunaanni Aalisartut Piniartullu Peqatigiiffii,

ulloq 16. februat Nipisat pillugit tusarniut ingerlanneqarpoq email-ikkut, taamattumik Email-ersi alapernaalaarniarisiuk.

arlaatigut annguttoqarsimanngippat KNAPK-mi allattoqarfik tutsaqarfigiinnassavarsi uunga: [email protected]

inussiarnersumik inuulluaqqusilluta

KNAPK

Kujataani Aalisartut Piniartullu peqatigiiffianiit aamma Nuummi Aalisartut Piniartullu Peqatigiiffianiillu KNAPK-i suliakkernikuuvaat Aalisarnermut Piniarnermut, Nunalerinermut, Imminut Pilersornermut Avatangiisinullu Naalersuisoqarfimmut appat piniagaanerat 31. december 2025-i tungaanut sivitsuiniarnermik saaffiginnittoqarpoq allakkatigut.

Ullumikkullu qulaani taaneqartunut Naalakkersuisoq Peter Borg avammut nalunaaruteqarpoq saaffiginnissumut akuersaarluni.

Tamannalu KNAPK-mi Siulittaasup Pele Blytmann-ip tamanna nuannaarutigivaa qujallunilu.