Splitske štorije

Još se nisan štufa

A šta više napisat
Kojon krpon prašinu obrisat
Sa svih onih napisanih riči
Sve mi sad na klišej liči

I judi i pisme i libri i note
Pari mi sve malo kraj takve lipote
Uvik ka da nešto fali
Da smo bar još stih Dragojeviću ukrali

Jer bilo šta da napišen i kažen
Ma da neznan kakve strofe naslažen
Ništa nebi vajalo i imalo smisla
Nijedna rečenica nebi bila suvisla

Teško je meni objasnit Matejušku
I svu tu ljubav pomalo meteorološku
Maestral, lebićadu, jugo i buru
Sunce i more u bilo koju uru

I sve tvoje tisne ulice
Od Mertojaka pa sve do Radunice
Teško je nekome objasnit sa strane
Kako priko Meja do svetoga Frane

Teško je meni samome svatit
Da ne kažen slučajno ko to more platit
Kako još uvik štufa se nisan
I kako mi ovi grad nije posta tisan

Bojin se da mi nećeš dopizdit
A vjerojatno ću do tad i popizdit
Posidit, udebljat se i smežurat
I nad tebon Splite cili život dežurat

Grade moj na dobro ti došla Sudamja!!!

Jema puno lipih stvari ma ne smin kazat

A di san ono sta? Teško se više i sitit. Badnjak je. Je, znan da van je teško to svatit, ali evo na kalendaru je dvedeset i četvrti dan miseca prosinca. Godina je manje bitna, dvi iljade i neka, dvi iljade pizdarija, dvi iljade joj kolpi palo. I evo san se ja, baš danas na ovi dan sitija vas, moje vjerne publike. Sitija san se da smo danas malo više sami nego inače, sitija san se da je danas bakalar malo drugačijeg okusa, a fritule malo manje mekane. Sitija san se da je crno vino izblidilo, sitija san se da se razvodnija život ka bevanda. Pelin je jutros bija sladak, a prošek gorak. Bila je gužva na rivi, a žive duše nije bilo. Ka da mi je nešto falilo... Ka da mi je falija zagrljaj od nekoga u prolazu, dvi,tri riči izgovorene na prišu, osmijeh i ono najlipše pitanje od svih pitanja: Oćeš ti nešto popit? Falila je i pisma, falija je i Oliver, falija je bakalar na peškariji u onome bronzinu od sto ijada litri. Falila mi je i pjaca, falija je i Duple na pločama. Svega je falilo, ali nije falilo dišpeta i jubavi. Čudna su vrimena. Sakrili su nan smij, sakrili su nan beštimje iza maske. Ni pisat nemogu. Štufa san se. Ma triba virovat da će i ovo proć, triba virovat da će na kraju predstave sve maske past. Infetat ćemo se večeras dobrin društvon a cijepit ćemo se vinon. Jema puno lipih stvari ma ne smin kazat.

Splićanke moje i Splićani na dobro van došla badnja noć.

Bambola - Božić u Splitu Bambola i prijatelji - Božić u Splitu