Basava Samithi

ತನ್ನ ವಿನೋದಕ್ಕೆ ತಾನೆ ಸೃಜಿಸಿದ ಸಕಲ ಜಗತ್ತ.
ತನ್ನ ವಿನೋದಕ್ಕೆ ತಾನೆ ಸುತ್ತಿದನದಕ್ಕೆ ಸಕಲ ಪ್ರಪಂಚನು.
ತನ್ನ ವಿನೋದಕ್ಕೆ ತಾನೆ ತಿರುಗಿಸಿದನನಂತ ಭವದುಃಖಂಗಳಲ್ಲಿ.
ಇಂತೆನ್ನ ಚೆನ್ನಮಲ್ಲಿಕಾರ್ಜುನನೆಂಬ ಪರಶಿವನು
ತನ್ನ ಜಗದ್ವಿಲಾಸ ಸಾಕಾದ ಮತ್ತೆ ತಾನೆ ಪರಿವನದರ ಮಾಯಾಪಾಶವನು.

~ ವೀರ ವಿರಾಗಿಣಿ ಅಕ್ಕಮಹಾದೇವಿ ತಾಯಿಯವರು 🙏

ಕೇವಲ ತನ್ನ ಖುಷಿಗಾಗಿ ಜಗತ್ತನ್ನು ಸೃಷ್ಟಿಸಿ, ಸಂಸಾರದ ಬಲೆಬೀಸಿ, ಕಷ್ಟ-ಸುಖದ ಸುಳಿಯಲ್ಲಿ ನಮ್ಮನ್ನು ಸಿಲುಕಿಸಿ ನಾಟಕ ನೋಡುತ್ತಿದ್ದಾನೆ ಆ ಪರಶಿವ.

ಹೀಗಿದ್ದಾಗ ನಮ್ಮ ಪ್ರಯತ್ನದಿಂದಲೇ ಇದರಿಂದ ಪಾರಾಗುತ್ತೇವೆ ಎನ್ನುವುದು ಶುದ್ಧ ಭ್ರಮೆ; ಉರುಳು ಬಿಗಿದವನೇ ಅದನ್ನು ಬಿಡಿಸಬೇಕಲ್ಲವೇ?

ಆತನಿಗೆ ತನ್ನ ಜಗನ್ನಾಟಕ "ಸಾಕು" ಎನಿಸಿದ ಗಳಿಗೆಯಲ್ಲಿ, ಅವನೇ ಬಂದು ಮಾಯಾಪಾಶ ಕತ್ತರಿಸಿ ನಮ್ಮನ್ನು ತನ್ನೊಳಗೆ ವಿಲೀನವಾಗಿಸಿಕೊಳ್ಳುತ್ತಾನೆ.

ಅಲ್ಲಿಯವರೆಗೆ ಅಹಂಕಾರ ಕಳಚಿ, ನಿರಾಳವಾಗಿ ಆ ಚೆನ್ನಮಲ್ಲಿಕಾರ್ಜುನನಿಗೆ ಸಂಪೂರ್ಣ ಶರಣಾಗುವುದೊಂದೇ ನಾವು ಮಾಡಬೇಕಾದದ್ದು!

~ Basava Samithi

ನಾಮ ನಾಮ ಎಂದು ನೀನು ನಾಮಕ್ಕೆ ಬಳಲುವೆ.
ನಾಮವಾದ ಸೀಮೆಯ ಒಳಗೆ ಇಪ್ಪುದು ಹೇಳೆಲೆ ಮರುಳೆ?
ನಾಮವೂ ಇಲ್ಲ, ಸೀಮೆಯೂ ಇಲ್ಲ,
ಒಡಲೂ ಇಲ್ಲ, ನೆಳಲೂ ಇಲ್ಲ,
ನಾನೂ ಇಲ್ಲ, ನೀನೂ ಇಲ್ಲ, ಏನೂ ಇಲ್ಲ,
ಚಿಕ್ಕಯ್ಯ ಪ್ರಿಯ ಸಿದ್ಧಲಿಂಗ ಇಲ್ಲ ಇಲ್ಲ ಎಂದುದಾಗಿ!

~ ಶರಣ ಘಟ್ಟಿವಾಳಯ್ಯನವರು