Thadou Linguistic Forum

Nam goulu thil ho alim pumma lekhabu a kisodoh “Thadou Gouchin Bu” kithenso ta

Motbung, 1st October, 2025:
Australian Thadou Community, Melbourne in publish abolla Thadou Linguistic Forum in ahin boipi “Thadou Gouchin Bu” chu Jingun Pu Lamminlal Simte, MCS, Asst. Commissioner leh SDO Champhai in NTS Chapel Hall, Motbung munna hondonna aneijin Rev. SM Haopu, Executive Secretary, TBA in Pathen henga thensona leh lhandohna aneitan ahi.

Jinjaum in Dr. Seikhohao Kipgen, Principal, Presidency College, Motbung apangin Kin Pipu in Dr. Ngamkhohao Haokip, Chairman TKLS leh Principal, EMRS Gamnom Sapormeina in apangin ahi. Pastor Paothang, Principal Ngulhao Theological Seminary jong kingon a apangin ahi.

Pu Nehthang Kipgen, Vice Chairman, TLF in lekhabu kibol thu aseina a, “Thadou te tonna kipat ipule ipa akon Lam (traditional dance), Nampon (traditional attire), Lamna (traditional dance), Tumging thei (traditional music), Gouthil leh Galmanchah (traditional tools) hohi tukhanga khangthah hon ahet jing nadiuva alim (photo) jaona a kisemdoh ahi” tin aseije.

“Hiche lekhabu a hi Nampon Saipikhup, Thangnang, Khamthang ho thusim chuleh Namlam Sagolpheikhai lam, Saipikhupsuh lam, Suhta lam ho jong alim jaonan ajaovin ahi. Dahpi, Sumkon, Gosem, Lhemlhei leh Sinkhup, Leel leh Golong ho thusim abonchan ajaosoh keijin ahi. Tukhangthah ho leh inampon leh inamchonna henom ho dinga Research Centre tobang leh GK phatah thule la kikholna ahi” tin aseibei.

Lekhabu thensona phat sunga chun TLF Founding Chairman Pu H. Hangsing (Vomboi), IAS (Retd.) leh Founding Vice Chairman Pu Thangkhokhup S Kipgen leh achemasa TLF lamkai ho geldoh in aumin ahi.

COHSEM noija Thadou MIL Topper Ng. Lamneivah Haokip (Legacy Faith Academy, Lamka) dinga TLF in apeh Pu Thangkholet Kipgen Meritorious Award kipaman chu ama thalhengin insungmin Pu Chairman, TLF khutna akisan tauvin ahi.

Hetthei khat chu, TLF Founding Member Pu Thangkholet Kipgen Meritorious Award hi COHSEM noija Thadou MIL topper ho kipe ahi.

Refresher Course a TLF thalhenga kalsong Pu Nehthang Kipgen, Vice Chairman, TLF in akalsonna thu chu Pu Chairman, TLF henga thulhut apen ahi. Thanop le kipa aumlheh jenge.

Pu Vice Chairman hin training a chu TLF pao lambe thu leh pao lambe ding angaichat thua houlimna aga nei ahi.

TLF Chairman Jingun hina a Thadou Kuki Refresher Course kihongdoh ta

KMC, 1 July, 2025:
Ja umtah TLF Chairman Pu Janglal Sitlhou Jingun hinan tunin Ngaimel Children School, KMC, Kangpokpi District munna 5-Day Thadou Kuki Refresher Course chu hondoh ahitai.

Pu Chairman, TLF hi akum upat nung chuleh tahsa hatlouna anei nung hijongle Thadou pao khantouna dinga kichollouva panla jing khat ahi. Tunia atahsa tah a Thadou MIL jilkung ho pao thu ahilna hi ga lentah a*o ding kinepna akineije.

Thadou MIL jilkung ho dinga pao kihilna kin thupi tah hin gong Thadou Kuki Literature Society (TKLS) ho chunga Thadou Linguistic Forum (TLF) in pachatna sangtah akipen ahi.

Sd/-
Lhangsam
Thadou Linguistic Forum