Kalimpong Diary

बर्खालाई मध्यनजर गर्दै मन्सोङमा सिन्कोना मजदुरहरूलाई छाता वितरण
मन्सोङ, १० जुलाई: वर्षायाममा सिन्कोना मजदुरहरूको दैनिक कार्यलाई सहज बनाउने उद्देश्यले ३९ नम्बर समष्टि अन्तर्गत पर्ने मन्सोङ सिन्कोना विभागको गन्तीमा शुक्रबार बिहान छाता वितरण कार्यक्रम सम्पन्न गरिएको छ।
गोर्खा जनमुक्ति मोर्चा ३९ नम्बर समष्टि तथा राष्ट्रिय राजमार्ग–१० (सेवक–रम्फू) का संयोजक अर्जुन छेत्रीको नेतृत्वमा आयोजित उक्त कार्यक्रममा सिन्कोना मजदुरहरूलाई छाता वितरण गरिएको हो। निरन्तर वर्षाका कारण कामकाजमा पर्न सक्ने असहजतालाई मध्यनजर गर्दै श्रमिकहरूको सुविधाका लागि कार्यक्रम सञ्चालन गरिएको आयोजकले जनाएको छ।
कार्यक्रममा ३९ नम्बर समष्टिका साङ्से पञ्चायत समिति सदस्य लाक्पा शेर्पा, पार्टीका विभिन्न पदाधिकारी, स्थानीय नेतागण तथा ठूलो संख्यामा पार्टी कार्यकर्ताहरूको उपस्थिति रहेको थियो।
कार्यक्रमपछि सञ्चारकर्मीसँग कुरा गर्दै संयोजक अर्जुन छेत्रीले श्रमिकहरूको हितलाई प्राथमिकतामा राख्दै आगामी दिनहरूमा पनि यस्ता जनहितमुखी तथा श्रमिक–केन्द्रित कार्यक्रमलाई निरन्तरता दिइने बताए। उनले मन्सोङपछि कास्येम, बर्मेक, रम्फो डिभिजन र साङ्सेरमा समेत सिन्कोना मजदुरहरूलाई छाता वितरण गरिने जानकारी दिए।
स्थानीयवासीले वर्षायाममा श्रमिकहरूको सुरक्षालाई ध्यानमा राखेर गरिएको यस पहलको स्वागत गर्दै यस्ता सामाजिक तथा जनसेवामूलक कार्यक्रमलाई निरन्तरता दिनुपर्ने धारणा व्यक्त गरेका छन्।