MJSSA Kottayam Diocese

മണർകാട് ഡിസ്ട്രിക്റ്റ് അദ്ധ്യാപക കലോത്സവം - മികവ് 2026 : സെൻ്റ് മേരീസ് മണർകാട് സെൻട്രൽ സൺഡേസ്‌കൂൾ ഓവറോൾ ചാമ്പ്യന്മാർ ; സെൻ്റ് മേരീസ് മാലം രണ്ടാമത്
----------------------------------------
MJSSA മണർകാട് ഡിസ്ട്രിക്റ്റ് അദ്ധ്യാപക കലോത്സവം മികവ് മണർകാട് സെൻ്റ് മേരീസ് ഹൈസ്കൂളിൽ വച്ച് 17.05.2026 ഞായറാഴ്ച്ച നടത്തപ്പെട്ടു.

മത്സരത്തിൽ 121 പോയിൻ്റ് നേടി സെൻ്റ് മേരീസ് മണർകാട് സെൻട്രൽ സൺഡേസ്കൂൾ ഓവറോൾ ചാമ്പ്യന്മാരായി. 46 പോയിൻ്റ് നേടി മാലം സെൻ്റ് മേരീസ് സൺഡേസ്കൂൾ രണ്ടാം സ്ഥാനവും, 36 പോയിൻ്റ് നേടി തിരുവഞ്ചൂർ സൗത്ത് സെൻ്റ് മേരീസ് സൺഡേസ്കൂൾ മൂന്നാം സ്ഥാനവും കരസ്ഥമാക്കി.

35 പോയിൻ്റുമായി കുറ്റിയകുന്ന് സെൻ്റ് മേരീസ് നാലാമതും, 28 പോയിൻ്റുമായി സെൻ്റ് മേരീസ് പറമ്പുകര അഞ്ചാമതും എത്തി. വടവാതൂർ സെൻ്റ് മേരീസ് ആറാമതും (17 പോയിൻ്റ്), വെള്ളൂർ സൗത്ത് സെൻ്റ് മേരീസ് ഏഴാമതും (13 പോയിൻ്റ്) എത്തി. സെൻ്റ് മേരീസ് മാങ്ങാനം,പത്താഴക്കുഴി എന്നീ സൺഡേസ്കൂളുകൾ യഥാക്രമം 8, 9 സ്ഥാനങ്ങളിലായി പതിനാറ് സൺഡേസ്കൂളുകൾ ഉൾപ്പെടുന്ന ഡിസ്ട്രിക്റ്റിൽ മികവ് പുലർത്തി.

ഭദ്രാസന സെക്രട്ടറി ജോമോൻ.കെ.ജെ സന്നിഹിതനായിരുന്നു. മണർകാട് ഡിസ്ട്രിക്റ്റ് ഇൻസ്പക്ടർ കെ.എം.മാത്യു, സൺഡേസ്കൂൾ പ്രതിനിധി പി.സി.ചെറിയാൻ, അസിസ്റ്റൻ്റ് ഇൻസ്പക്ടർ സൂസമ്മ കുരുവിള, ഡിസ്ട്രിക്റ്റ് സെക്രട്ടറി ബിജി തോമസ്, അദ്ധ്യാപക പ്രതിനിധി പി.സി.മാത്യു എന്നിവർ നേതൃത്വം നൽകി.

MJSSA Kottayam Diocese

വിശ്വാസവും വിനോദവും കൈകോർത്തു; വെള്ളൂർ സെൻ്റ് തോമസ് സൺഡേസ്കൂളിലെ “Faith Orientation Program 2026” ശ്രദ്ധേയമായി
---- ----------- ------
​MJSSA കോട്ടയം ഭദ്രാസനത്തിലെ പാമ്പാടി ഡിസ്ട്രിക്റ്റിൽ പ്രവർത്തിക്കുന്ന വെള്ളൂർ സെൻ്റ് തോമസ് സൺഡേസ്കൂളിൽ മെയ് 9 ശനിയാഴ്ച്ച “Faith Orientation Program 2026” നടത്തപ്പെട്ടു. വിശ്വാസവും സന്തോഷവും പഠനവും ഒരുമിച്ചുചേർന്ന അനുഗ്രഹീത ആത്മീയ കൂട്ടായ്മയായി മാറിയ പ്രോഗ്രാം ഏറെ ശ്രദ്ധേയമായി.

​കുട്ടികളിൽ വിശ്വാസപരമായ അറിവും സഭാപാരമ്പര്യങ്ങളോടുള്ള അടുപ്പവും വളർത്തുക എന്ന ലക്ഷ്യത്തോടെ ഒരുക്കിയ ഈ പരിപാടി, പ്രാർത്ഥനയുടെയും പഠനത്തിന്റെയും ആനന്ദത്തിന്റെയും മനോഹര സംഗമമായി മാറി. സൺഡേസ്കൂൾ വിദ്യാർത്ഥികളും അദ്ധ്യാപകരും മാതാപിതാക്കളും പങ്കെടുത്തു.

​കുട്ടികളുടെ ആത്മീയ വളർച്ചയ്ക്ക് സഹായകമായ വിവിധ സെഷനുകൾക്ക് വികാരി റവ.ഫാ. ജോൺസ് കോട്ടയിൽ, ഇടവകാംഗമായ റവ.ഫാ. ജിക്കു ചേരിപ്പറമ്പിൽ, സൺഡേസ്കൂൾ അദ്ധ്യാപകർ എന്നിവർ നേതൃത്വം നൽകി.
​കുട്ടികളുടെ മനസ്സിലേക്ക് ലളിതമായ ഭാഷയിലും സജീവമായ അവതരണങ്ങളിലൂടെയും വിശ്വാസത്തിന്റെ ആഴങ്ങൾ എത്തിക്കാനായത് പരിപാടിയുടെ പ്രധാന പ്രത്യേകതയായി. ഇന്ററാക്ടീവ് സെഷനുകൾ, ആക്ഷൻ സോങ്സ്, ലിറ്റർജിക്കൽ ടാബ്ലോ, വിവിധ ആത്മീയ പ്രവർത്തനങ്ങൾ എന്നിവ കുട്ടികൾക്ക് പുതിയ അനുഭവമായി മാറി. പ്രത്യേകിച്ച് “പള്ളി അറിയുക” എന്ന ലക്ഷ്യത്തോടെ ക്രമീകരിച്ച പ്രവർത്തനങ്ങൾ ഏറെ ശ്രദ്ധ നേടി.

പള്ളി പരിസരങ്ങളെയും ദേവാലയത്തിനുള്ളിലെ വിശുദ്ധ ഇടങ്ങളെയും അടുത്തറിഞ്ഞ് മനസ്സിലാക്കാനുള്ള അവസരം കുട്ടികൾക്ക് നവ്യാനുഭവമായി.
​പള്ളിയുമായി ബന്ധപ്പെട്ട വിവിധ ഭാഗങ്ങളും വിശുദ്ധ ഉപകരണങ്ങളും പരിചയപ്പെടുത്തുന്ന രീതിയിൽ നടത്തിയ ട്രഷർ ഹണ്ട് പ്രോഗ്രാം ഏറെ വ്യത്യസ്തത പുലർത്തി. കളിയുടെയും അന്വേഷണത്തിന്റെയും ആവേശത്തിനിടയിൽ പള്ളിയുടെ ആത്മീയ പാരമ്പര്യങ്ങളെ കുട്ടികൾ മനസ്സിലാക്കിയ നിമിഷങ്ങൾ ഏറെ ശ്രദ്ധേയമായി.
​പരിപാടിയിലെ മറ്റൊരു പ്രധാന ആകർഷണമായിരുന്നു “മിട്ടു” പപ്പറ്റ് ഷോ. ദൈവവചനങ്ങളും വിശ്വാസസന്ദേശങ്ങളും കുട്ടികൾക്ക് എളുപ്പത്തിൽ മനസ്സിലാകുന്ന രീതിയിൽ അവതരിപ്പിച്ച ഈ സെഷൻ കുട്ടികളിലും മാതാപിതാക്കളിലും ഒരുപോലെ വലിയ സ്വീകാര്യത നേടി. ചിരിയുടെയും ചിന്തയുടെയും വിശ്വാസപാഠങ്ങളുടെയും മനോഹര സമന്വയമായിരുന്നു ഈ അവതരണം.

​പഠനവും കളിയും പ്രാർത്ഥനയും ഒരുമിച്ചുചേർന്ന ഈ ആത്മീയ സംഗമം കുട്ടികൾക്ക് വിശ്വാസപഠനത്തിനുള്ള വലിയ വേദിയായി മാറി. കുട്ടികളുടെ ചിരികളും ഗാനങ്ങളും പ്രാർത്ഥനകളും നിറഞ്ഞ സായാഹ്നം വെള്ളൂർ സെന്റ് തോമസ് സൺഡേസ്കൂളിന്റെ ആത്മീയ പ്രവർത്തനങ്ങളിൽ വേറിട്ട അനുഭവമായി.
​തുടർന്ന് വൈകുന്നേരം നടന്ന വാർഷിക യോഗത്തിൽ ഇടവക വികാരി റവ.ഫാ. ജോൺസ് കോട്ടയിൽ അദ്ധ്യക്ഷത വഹിച്ചു. വെരി. റവ. കുര്യൻ മാലിയിൽ കോറെപ്പിസ്കോപ്പ ഉദ്ഘാടനം നിർവഹിച്ചു. കുട്ടികളുടെ ആത്മീയ വളർച്ചയിൽ സഭയും കുടുംബവും ഒരുമിച്ച് പ്രവർത്തിക്കേണ്ടതിന്റെ പ്രാധാന്യം അദ്ദേഹം ഓർമ്മിപ്പിച്ചു.
​പരിപാടിയിൽ പങ്കെടുത്ത എല്ലാവർക്കുമായി വിഭവസമൃദ്ധമായ സ്നേഹവിരുന്നും ക്രമീകരിച്ചിരുന്നു. ഒരുമയുടെയും സ്നേഹത്തിന്റെയും പങ്കിടലിന്റെയും മനോഹര നിമിഷങ്ങളായി ആ ഭക്ഷണസമയം മാറി. വിശ്വാസവും വിനോദവും സ്നേഹവും ഒരുമിച്ചുചേർന്ന ഈ ആത്മീയ സംഗമം പങ്കെടുത്ത ഏവർക്കും ഹൃദയസ്പർശിയായ അനുഭവമാണ് സമ്മാനിച്ചത്.

MJSSA Kottayam Diocese

St.Johns Jacobite Syrian Sunday School Parampuzha

Kottayam District
------------------------------
പാറമ്പുഴ സെൻ്റ് ജോൺസ് യാക്കോബായ സുറിയാനി പള്ളിയുടെ കീഴിലുള്ള വിവിധ ആദ്ധ്യാത്മിക സംഘടനകളുടെ വാർഷികം 03.05.2026 ഞായറാഴ്ച്ച നടത്തപ്പെട്ടു. സഹവികാരി റവ.ഫാ.സഞ്ചു മാനുവേൽ കിടങ്ങേത്തിൻ്റെ അദ്ധ്യക്ഷതയിൽ കൂടിയ സമ്മേളനം എം.ജെ.എസ്.എസ്.എ കോട്ടയം ഭദ്രാസന ഡയറക്ടർ അവിനേഷ് തണ്ടാശ്ശേരിൽ ഉദ്ഘാടനം ചെയ്തു.

പാറമ്പുഴ സെൻ്റ് സ്റ്റീഫൻസ് പള്ളി വികാരി റവ.ഫാ.ബാബു വർഗീസ് പതിനാൽപറയിൽ, പാറമ്പുഴ സെൻ്റ് ജോൺസ് പള്ളി വികാരി റവ.ഫാ.ജോജോ ജോസ് നടുവിലേപ്പറമ്പിൽ, ജോർജ് ജോൺ, പ്രധാനാദ്ധ്യാപിക മേരിക്കുട്ടി കുറിയാക്കോസ് തുടങ്ങിയവർ ആശംസാ പ്രസംഗങ്ങൾ നടത്തി. യോഗത്തിൽ ആദ്ധ്യാത്മിക സംഘടനകളുടെ റിപ്പോർട്ടും വായിച്ചു. കുട്ടികളുടെ കലാപരിപാടികളും സമ്മാനദാനവും നിർവ്വഹിക്കപ്പെട്ടു.

MJSSA Kottayam Diocese