Cambodian Muslim Development Foundation - CMDF

តំណាងឯកឧត្តមទេសរដ្ឋមន្ត្រី អញ្ជើញចែកកញ្ចប់អាហារស្រាយបួសខែរ៉ម៉ាឌនចំនួន ៣៧០ កញ្ចប់ និងល្មើ១០០ កេស ជូនប្រជាពលរដ្ឋនៅខេត្តព្រះសីហនុ
—————-
នៅព្រឹកថ្ងៃទី៨ ខែមីនា ឆ្នាំ២០២៦ ឯកឧត្តម សេន ណាសុី អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានចុះជួបសំណេះសំណាល និងចែកកញ្ចប់អាហារស្រាយបួសខែរ៉ម៉ាឌនចំនួន ៣៧០ កញ្ចប់ ដែលជាអំណោយទទួលបានពីអង្គការសប្បុរសធម៌ប្រទេសកាតា តាមរយៈអង្គការមូលនិធិអភិវឌ្ឍន៍មុស្លិមកម្ពុជា(CMDF) ជូនប្រជាពលរដ្ឋ នៅភូមិអូត្រាវ ឃុំអណ្ដូងថ្ម ស្រុកព្រៃនប់ ខេត្តព្រះសីហនុ។

ជាមួយគ្នាដែរ ឯកឧត្តម ក៏បានប្រគល់ផ្លែល្មើចំនួន១០០ កេស ស្មើនឹង៨០០ គីឡូក្រាម ជូនគ្រប់វិហារ ស៊ូរ៉ាវឥស្លាមទាំងអស់ នៅក្នុងខេត្តព្រះសីហនុ ដែលជាអំណោយរបស់ មជ្ឈមណ្ឌលជួយសង្គ្រោះ និងមនុស្សធម៌របស់ ព្រះចៅ សាល់ម៉ាន ពិន អាប់ឌុលអាហ្ស៊ីស ព្រះមហាក្សត្រអារ៉ាប៊ីសាអូឌីត (KSRelief)៕

ឯកឧត្តម ណាសៀត អូស្មាន ទីប្រឹក្សារាជរដ្ឋាភិបាល និងជាអនុប្រធានអង្គការមូលនិធិអភិវឌ្ឍន៍មុស្លិមកម្ពុជា(CMDF) តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី អូស្មាន ហាស្សាន់ ប្រធានអង្គការ CMDF នារសៀល ទី១១ ខែកុម្ភៈ ឆ្នាំ២០២៦ បានអញ្ជើញសំណេះសំណាល និងចែកកញ្ចប់អាហាររ៉ាម៉ាឌនចំនួន២០០ កញ្ចប់ ជូនសាសនិកឥស្លាម នៅនៅវិហារឥស្លាមជ្រៃអណ្តែត ភូមិព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល។ អំណោយនេះទទួលបានពីអង្គការ Hasene ប្រទេសអាល្លឺម៉ង់ តាមរយៈអង្គការមូលនិធិអភិវឌ្ឍន៍មុស្លិមកម្ពុជា។

អង្គការអន្តរជាតិ HASENE បាននឹងកំពុងធ្វើកិច្ចសហប្រតិបត្តិការជិត ១០០ ប្រទេស ក្នុងនោះក៏មានកម្ពុជាផងដែរ ដែលបានផ្តល់ជំនួយជាច្រើន ដូចជា ជំនួយសង្គ្រោះបន្ទាន់ ជំនួយកញ្ចប់អាហារខែរ៉ាម៉ាឌន ជំនួយគោគួរពាន គម្រោងជំនួយបរិច្ចាគ ចិញ្ចឹមកុមារកំព្រា ផ្តល់អាហារូបករណ៍ សាងសង់ផ្ទះជូនជនក្រីក្រ និងផ្តល់គោចិញ្ចឹម ជាដើម ដែលគិតជា ថវិកាសរុប ប្រមាណជាង ២លានដុល្លារអាមេរិក៕