Anti-Corruption Unit

‎ថ្នាក់ដឹកនាំ និងមន្ត្រីរាជការ នៃ អ.ប.ព. ចំនួន ៣០រូប បានចូលរួម វគ្គបណ្តុះបណ្តាលស្តីពី "ការសង្គ្រោះបឋម”
‎------------------
‎
‎នៅថ្ងៃសុក្រ ១៣កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៩ ខែឧសភា ឆ្នាំ២០២៦ វេលាម៉ោង ៨:៣០ នាទី អង្គភាពប្រឆាំងអំពើពុករលួយ (អ.ប.ព.) បានបើកវគ្គបណ្តុះបណ្តាលស្តីពី "ការសង្គ្រោះបឋម" ដោយមានការ ចូលរួមពីថ្នាក់ដឹកនាំ និងមន្ត្រីរាជការ នៃ អ.ប.ព. ចំនួន ៣០ រូប ក្រោមអធិបតីភាព ឯកឧត្តមបណ្ឌិត សម្បត្តិ ហ៊ូណា អនុប្រធាន អ.ប.ព. តំណាងដ៏ខ្ពង់ខ្ពស់ ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធាន អ.ប.ព.។
‎វគ្គបណ្តុះបណ្តាលនេះទទួលបានការធ្វើបទឧទ្ទេសនាមពី៖
‎១. លោកវេជ្ជបណ្ឌិតឯកទេស សោម រិទ្ធី នាយផ្នែករថយន្តសង្គ្រោះ នៃមន្ទីរពេទ្យជាតិតេជោសន្តិភាព
‎២. លោកវេជ្ជបណ្ឌិត ស៊ឹម វណ្ណដេត នាយរងផ្នែករថយន្តសង្គ្រោះ នៃមន្ទីរពេទ្យជាតិតេជោសន្តិភាព
‎៣. លោកវេជ្ជបណ្ឌិត ឈួន គៀងស័រ នាយរងផ្នែករថយន្តសង្គ្រោះ នៃមន្ទីរពេទ្យជាតិតេជោសន្តិភាព
‎៤. លោក ម៉ី សុភ័ក្ត គ្រូបង្គោលផ្នែករថយន្តសង្គ្រោះ នៃមន្ទីរពេទ្យជាតិតេជោសន្តិភាព
‎
‎នៅក្នុងពិធីបើកវគ្គបណ្តុះបណ្តាលនេះ ឯកឧត្តមបណ្ឌិត សម្បត្តិ ហ៊ូណា អនុប្រធាន អ.ប.ព. បានមាន ប្រសាសន៍ថា “វគ្គបណ្តុះបណ្តាលរយៈពេល ១ព្រឹកនេះ ពិតជាទុនមួយដ៏មានសារៈសំខាន់បំផុត ដែលផ្តល់ឱ្យសិក្ខាកាមនូវ ចំណេះដឹង និងភាពជឿជាក់ក្នុងការឆ្លើយតបយ៉ាងរហ័ស និងមានប្រសិទ្ធភាពនៅពេលមានអាសន្ន ដែលអាចជួយ សង្គ្រោះជីវិត និងកាត់បន្ថយភាពធ្ងន់ធ្ងរនៃរបួស មុនពេលក្រុមគ្រូពេទ្យមកដល់” ។

អ.ប.ព. ចូលរួមសង្កេតការណ៍ការប្រឡងចូលរៀនវគ្គបណ្ដុះបណ្ដាលមគ្គុទ្ទេសក៍ទេសចរណ៍ថ្នាក់តំបន់សៀមរាប និងតំបន់ជុំវិញ ជំនាន់ទី២៨

(ខេត្តសៀមរាប) ៖ ដើម្បីធានាតម្លាភាព យុត្តិធម៌ និងជ្រើសរើសអ្នកដែលមានសមត្ថភាពពិតប្រាកដប្រកបដោយវិជ្ជាជីវៈ ក្រុមការងារអង្គភាពប្រឆាំងអំពើពុករលួយ ហៅកាត់ថា អ.ប.ព. ដឹកនាំដោយលោក ហាន់ តូ ប្រធាននាយកដ្ឋានអប់រំ បង្ការ និងទប់ស្កាត់ ចូលរួមសង្កេតការណ៍ការប្រឡងចូលរៀនវគ្គបណ្ដុះបណ្ដាលមគ្គុទ្ទេសក៍ទេសចរណ៍ថ្នាក់តំបន់សៀមរាប និងតំបន់ជុំវិញ ជំនាន់ទី២៨ នាថ្ងៃទី២៩ ខែឧសភា ឆ្នាំ២០២៦ នៅមណ្ឌលប្រឡង សាកលវិទ្យាល័យវ៉ាន់ដា ខេត្តសៀមរាប។

ការប្រឡងនេះ មានបេក្ខជនបានដាក់ពាក្យចំនួន ៩០រូប ដែលត្រូវប្រឡងលើវិញ្ញាសាសរសេរ និងវិញ្ញាសាផ្ទាល់មាត់ លើ ៩មុខជំនាញឯកទេសភាសា។

វិញ្ញាសាប្រឡងរួមមាន ៖ ១) វិញ្ញាសាសរសេរមានចំនួន២ ប្រព្រឹត្តទៅនៅពេលព្រឹក លើវិញ្ញាសាវប្បធម៌ទូទៅ និងវិញ្ញាសាឯកទេសភាសា និង ២) វិញ្ញាសាផ្ទាល់មាត់ ប្រព្រឹត្តទៅនៅពេលរសៀល មានជំនាញឯកទេសភាសាចំនួន ៩ ដែលបេក្ខជនត្រូវឆ្លើយជាភាសាដែលខ្លួនជ្រើសរើស។

អ.ប.ព. នឹងបន្តសង្កេតការណ៍ដំណើរការកំណែ ស្រង់-បូកពិន្ទុដោយកុំព្យូទ័ររហូតដល់ប្រកាសលទ្ធផលស្ថាពរ។

អ.ប.ព. ចូលរួមសង្កេតការណ៍ការប្រឡងជ្រើសរើសមន្រ្តីរាជការក្របខ័ណ្ឌក្រសួងយុត្តិធម៌ ដែលមានបេក្ខជនប្រឡងសរុបចំនួន ១,១០៧រូប
-------

គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ជាគោលការណ៍គន្លឹះសម្រាប់ការរៀបចំការប្រឡងប្រជែងជ្រើសរើសមន្រ្តីរាជការដឹកនាំនិងរៀបចំ ដោយក្រសួងមុខងារសាធារណៈ ដែលមាន ឯកឧត្ដម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ជាប្រធានគណៈកម្មការរៀបចំការប្រឡងប្រជែង។

អង្គភាពប្រឆាំងអំពើពុករលួយ ហៅកាត់ អ.ប.ព. បានបង្កើតគណៈកម្មការដឹកនាំការសង្កេតការណ៍ និងក្រុមការងារចំនួន ៦៤ រូប ដឹកនាំដោយ ឯកឧត្ដមឧបការី កែវ ធីវុធ ចូលរួមសង្កេតការណ៍ការប្រឡងប្រជែងជ្រើសរើសមន្រ្តីឲ្យចូលបម្រើការងារក្នុងក្របខ័ណ្ឌក្រសួងយុត្តិធម៌ ដែលមានបេក្ខជនទទួលបានសិទ្ទិប្រឡងចំនួន ១,១០៧ រូប ដោយបែងចែកជា ២៧ បន្ទប់ និងប្រឡងលើវិញ្ញាសាជំនាញគោល ចំនួន១ និងវិញ្ញាសាគាំទ្រចំនួន ៤ នៅថ្ងៃទី២៩ ខែឧសភា ឆ្នាំ២០២៦ នៅមណ្ឌលប្រឡងសាលាភូមិន្ទរដ្ឋបាល។

សូមជម្រាបជូនថា បន្ទាប់ពីការប្រឡងនេះ អ.ប.ព. នឹងបន្តចូលរួមសង្កេតការណ៍ការប្រឡងជ្រើសរើសមន្រ្តីរាជការក្របខ័ណ្ឌរដ្ឋលេខាធិការដ្ឋានកិច្ចការព្រំដែន នៅថ្ងៃទី៣០ ខែឧសភា ឆ្នាំ២០២៦ នៅមណ្ឌលប្រឡងសាកលវិទ្យាល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច។