Fast News

អង្គការGret បន្ដជួយលើកកម្ពស់ការធ្វើកសិកម្មរបស់កសិករនៅខេត្ដសៀមរាបឱ្យទទួលបានទិន្នផលខ្ពស់ មានទីផ្សារ និងបន្លែមានសុវត្ថិភាព

ភ្នំពេញ៖ ដើម្បីលើកស្ទួយកម្រិតជីវភាពរបស់គ្រួសារកសិករជនបទនៅប្រទេសកម្ពុជាកាន់តែល្អប្រសើរ តាមរយៈការអនុវត្តបច្ចេកទេសកសិអេកូឡូស៊ី អង្គការGret បានបន្ដជួយលើកកម្ពស់ការធ្វើកសិកម្មរបស់កសិករនៅខេត្ដសៀមរាបឱ្យទទួលបានទិន្នផលខ្ពស់ មានទីផ្សារ និងបន្លែមានសុវត្ថិភាព ។

ថ្លែងក្នុងដំណើរទស្សនកិច្ចសិក្សាឈ្វេងយល់ “ការអនុវត្តកសិអេកូឡូស៊ីនៅខេត្តសៀមរាប និងកំពង់ធំ ដឹកនាំដោយអង្គការGret កាលពីថ្ងៃទី២៤ ខែមេសា ឆ្នាំ២០២៦ លោក ង៉ែត វិបុល ប្រធានគម្រោង អង្គការ Gret នៅខេត្ដសៀមរាប បានលើកឡើងថា អង្គការមានផែនការជាក់លាក់ចំនួន៣ ទី១៖ជំរុញផលិតកម្មកសិកម្មតាមបែបកសិអេកូឡូស៊ី (ប្រពលវប្បកម្ម និងពិពិធកម្មដំណាំ/ស្បៀង) ទី២៖ពង្រឹងអង្គការកសិករ និងរៀបចំរចនាសម្ព័ន្ធក្នុងខ្សែច្រវាក់តម្លៃក្នុងស្រុកដើម្បីធានាការផ្គត់ផ្គង់ និងសម្របសម្រួលការលក់ទៅកាន់ទីផ្សារ និងទី៣៖ គាំទ្រដៃគូពាក់ព័ន្ធខេត្តក្នុងការកសាង និងអនុវត្តផែនការអភិវឌ្ឍន៍ដោយនិរន្តរភាព និងសុវត្ថិភាពប្រព័ន្ធស្បៀងខេត្តសៀមរាប។

លោកបន្ដថា ផែនការនេះ នឹងជួយលើកកម្ពស់កម្រិតជីវភាពរបស់គ្រួសារកសិករជនបទក្នុងខេត្តសៀមរាបនៅប្រទេសកម្ពុជាកាន់តែល្អប្រសើរ តាមរយៈការអនុវត្តបច្ចេកទេសកសិអេកូឡូស៊ី ពង្រឹងរចនាសម្ព័ន្ធខ្សែច្រវាក់តម្លៃក្នុងតំបន់ និងកសាងផែនការ និងអនុវត្តផែនការអភិវឌ្ឍន៍ដោយនិរន្តរភាព និងសុវត្ថិភាពប្រព័ន្ធស្បៀងខេត្តសៀមរាប។

ដោយឡែក លោក សុខ សុធា អ្នកជំនាញផ្នែកកសិអេកូឡូស៊ីនៃអង្គការ Gret បានឱ្យដឹងថា កសិអេកូឡូស៊ី គឺជាវិធីសាស្ដ្រមួយដែលរួមបញ្ចូលគោលការណ៍ អេកូឡូស៊ី ជាមួយសង្គម និងសេដ្ឋកិច្ច។ វាត្រូវបានអនុវត្តនៅទូទាំងពិភពលោក។ ហើយបង្កើតឡើងដើម្បីគ្រប់គ្រងប្រព័ន្ធកសិកម្ម និងប្រព័ន្ធស្បៀងអាហារ ប្រកបដោយនិរន្តរភាព។ បង្កើនប្រសិទ្ធភាពក្នុងការអនុវត្តកសិកម្មរួមគ្នា រវាងមនុស្ស សត្វ រុក្ខជាតិ និងបរិស្ថានជុំវិញ ព្រមទាំងលើកកម្ពស់ប្រព័ន្ធស្បៀង និងសមធម៌សង្គម ដោយបុគ្គលម្នាក់ៗអាចមានសិទ្ធិជ្រើសរើសអ្វីដែលពួកគេចង់បរិភោគ និងជ្រើសរើសរបៀបដែលស្បៀងអាហារទាំងអស់នោះត្រូវបានផលិតឡើង។

លោកគូសបញ្ជាក់ថា កសិអេកូឡូស៊ីនេះ គឺបានផ្ដល់ផលប្រយោជន៍ជារួមមាន ១. ជីវចម្រុះ៖ លើកកម្ពស់ផលិតកម្មដំណាំចម្រុះ និងការចិញ្ចឹមសត្វ ដើម្បីធ្វើឱ្យប្រព័ន្ធអេកូឡូស៊ីមានភាពល្អប្រសើរ។ ២. គុណភាពដី៖ ថែរក្សា និងការអភិរក្ស ដោយប្រើប្រាស់បច្ចេកទេសស្របតាមគោលការណ៍ធម្មជាតិ ដូចជា ការគ្របដណ្តប់លើដីដាំដុះ ការប្រើប្រាស់ជីកំប៉ុស្តិ៍ ស្លឹកឈើ ជីកំប៉ុស្តិ៍ទឹក ជីធម្មជាតិផ្សេងទៀត និងកាត់បន្ថយការរំខានដល់ដី (ភ្ជួររាស់)។ ៣. សត្វល្អិតចង្រៃ និងជំងឺលើផលិតកម្ម៖ កាត់បន្ថយការប្រើប្រាស់សារធាតុគីមីជំនួសវិញ ដោយប្រើថ្នាំពុលផលិតពីរុក្ខជាតិ ឬវិធានការចម្រុះការពារដំណាំ តាមរយៈវិធីសាស្ដ្រកម្ចាត់សត្វល្អិត និងជំងឺ (IPM) និង៤. ចំណេះដឹងដែលមានស្រាប់៖ បង្កើនការយល់ដឹង ជំនាញ និងការអនុវត្តដែលបង្កើតឡើងដោយផ្អែកលើបទពិសោធរបស់កសិករលើផ្នែកកសិកម្ម បរិស្ថាន និងប្រព័ន្ធស្បៀងក្នុងតំបន់ និងស្វែងយល់បន្ថែមនូវអ្វីដែលថ្មី៕

ចិនបានសន្យាបន្តគាំទ្រលើការធ្វើទំនើបកម្មសមត្ថភាពវិស័យយោធាកម្ពុជា

ភ្នំពេញ៖ ប្រមុខការពារជាតិកម្ពុជានាយឧត្ដមសេនីយ៍ ទៀ សីហាបានអោយដឹងថា មហាអំណាចចិនបានសន្យាបន្តគាំទ្រលើការធ្វើទំនើបកម្មសមត្ថភាពវិស័យយោធាកម្ពុជា ដើម្បីពង្រឹងខឿនការពារជាតិទាំងដែនទឹក ដែនគោក ដែនអាកាស។ លើកឡើងបែបនេះបន្ទាប់ពីកិច្ចសន្ទនាយុទ្ធសាស្ត្រ “២+២” ជាប្រវត្តិសាស្ត្រដែលមិនធ្លាប់មានពីមុនមក បានបញ្ចប់ទៅកាលពីល្ងាចថ្ងៃទី២២ ខែមេសា ឆ្នាំ២០២៦។

សរសេរលើទំព័រហ្វេសប៊ុកផ្លូវការនាយឧត្ដមសេនីយ៍ ទៀ សីហា នាព្រឹកថ្ងៃទី២៣ ខែមេសា បានអោយដឹងថា៖«ក្នុងកិច្ចប្រជុំស្ដីពីកិច្ចសន្ទនាយុទ្ធសាស្ត្រ “២+២”ភាគីមិត្តចិនបានបង្ហាញពីការគាំទ្រលើវិស័យយោធាកម្ពុជា ក្នុងការចូលរួមលើកកម្ពស់កិច្ចសហប្រតិបត្តិការយោធា និងធ្វើទំនើបកម្មយោធា ដែលនឹងពង្រឹងខឿនការពារជាតិ ដែនទឹក ដែនគោក និងដែនអាកាស។

ប្រមុខការពារជាតិកម្ពុជា បង្ហាញជំនឿយ៉ាងមុតមាំថាវត្តមានរដ្ឋមន្ត្រីការបរទេស និងរដ្ឋមន្ត្រីការពារជាតិប្រជាមានិតចិន នឹងជំរុញទំនាក់ទំនងយុទ្ធសាស្ត្រកម្រិតខ្ពស់ ធ្វើឱ្យកាន់តែស៊ីជម្រៅនូវទំនុកចិត្តផ្នែកនយោបាយ ការរីកចម្រើននៃទំនាក់ទំនងទ្វេភាគី ដែលជាដៃគូយុទ្ធសាស្រ្តគ្រប់ជ្រុងជ្រោយ និងជាមិត្តដែកថែប ព្រមទាំងបាននិងកំពុងខិតខំកសាងសហគមន៍ជោគវាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី។

ប្រមុខការពារជាតិកម្ពុជា អះអាងថា៖«កម្ពុជាប្តេជ្ញាចិត្ត ក្នុងការបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ លើគ្រប់វិស័យ ឱ្យកាន់តែស៊ីជម្រៅបន្ថែមទៀត ដោយប្រកាន់ខ្ជាប់ឥតងាករេនូវគោលការណ៍ចិនមួយ៕

មន្រ្តីជំនាញក្រសួងបរិស្ថានបានរកឃើញថាក្រុមហ៊ុនបៃស៊ីង សេង បានបញ្ចេញសំណល់រាវ បង្កឱ្យមានការបំពុលទឹក ងាប់ត្រី និងបំពុលបរិស្ថាននៅក្នុងអូរត្រែង ខេត្តបាត់ដំបង

ក្រុមការងារក្រសួងបរិស្ថានបានបន្តចុះពិនិត្យ ជាមួយមន្រ្តីជំនាញនៃមន្ទីរបរិស្ថានខេត្តបាត់ដំបង និងរដ្ឋបាលស្រុករតនៈមណ្ឌលនៅថ្ងៃទី២១-២២ ខែមេសា ឆ្នាំ២០២៦ និងបានរកឃើញថារោងចក្រផលិតដំណាប់ស្វាយ បៃ ស៊ីង សេង (ខេមបូឌា) អ៊ិនដាសស្រ្ទី ឯ.ក ដែលស្ថិតនៅជាប់នឹងដងអូរត្រែង និងស្ថិតនៅចំណុចខ្សែទឹកខាងលើទីតាំង ដែលមានត្រីងាប់ ចម្ងាយប្រមាណ ២គីឡូម៉ែត្រ បានបញ្ចេញសំណល់រាវ មិនបានធ្វើប្រព្រឹត្តកម្មត្រឹមត្រូវដោយបានបង្ហូរតាមប្រព័ន្ធលូចេញពីទីតាំងផលិតកម្ម ចូលទៅក្នុងអូរត្រែងដោយផ្ទាល់ (ស្ថិតនៅចំណុចខាងកើតផ្នែកខាងជើងនៃទីតាំងរោងចក្រ)។

ក្រសួងបរិស្ថានតម្រូវឱ្យរោងចក្រ៖
១- ផ្អាកដំណើរការផលិតកម្មរោងចក្រ រហូតដល់អាងប្រព្រឹត្តិកម្មសំណល់រាវបានសាងសង់រួចរាល់ និងដំណើរការអនុលោមតាមបទដ្ឋានបរិស្ថាន។
២- ត្រូវធ្វើការបិទលូបង្ហូសំណល់រាវ និងទឹកភ្លៀងទាំងអស់ មិនឲ្យមានការបញ្ចេញពីទីតាំងរោចក្រចូលទៅក្នុងអូរត្រែង​។
៣- ត្រូវទទួលរងពិន័យអន្តរការណ៍ករណីមិនរាងចាល និងត្រូវផ្តល់សំណងការខូចខាតបរិស្ថាន តាមការវាយតម្លៃជាក់ស្តែងរបស់មន្ត្រីជំនាញ។

ក្រសួងបរិស្ថាននឹងបិទរោងចក្រជាស្ថាពរ ក្នុងករណីមិនគោរពតាមគោលការខាងលើ ឬប្រព្រឹត្តកំហុសម្តងទៀត។