Homeplus Electricals

⭕ විදුලි කාර්මිකයන්ට බලපත්‍රයක් අනිවාර්යයි: NVQ සුදුසුකම නැති අයට නොමිලේ සහතිකයක්

විදුලිබල ක්ෂේත්‍රයේ ආරක්ෂාව සහ වෘත්තීය ප්‍රමිතීන් ඉහළ නැංවීම සඳහා මෙරට සියලුම විදුලි කාර්මිකයන්ට වෘත්තීය බලපත්‍රයක් ලබා ගැනීම ශ්‍රී ලංකා මහජන උපයෝගිතා කොමිෂන් සභාව (PUCSL) විසින් අනිවාර්ය කර තිබේ. විදුලිබල පනතේ සහ ශ්‍රී ලංකා ඉංජිනේරු සභා පනතේ විධිවිධාන යටතේ මෙම නව නීතිය ක්‍රියාත්මක වේ.

මෙම නව ක්‍රමවේදය යටතේ බලපත්‍රලාභී විදුලි කාර්මිකයන් ලෙස පිළිගැනීමට අවශ්‍ය සුදුසුකම් මෙසේය:

2026 සිට 2029 දක්වා: අවම වශයෙන් විදුලි ඉංජිනේරු විද්‍යාව පිළිබඳ NVQ 3 මට්ටම තිබිය යුතුය.

2030 සිට: අවම වශයෙන් NVQ 4 හෝ ඊට වැඩි සුදුසුකමක් තිබීම අනිවාර්ය වේ.

දැනට වෘත්තියේ නියැලී සිටින නමුත් විධිමත් NVQ සහතිකයක් නොමැති කාර්මිකයන් සඳහා මහජන උපයෝගිතා කොමිෂන් සභාව විශේෂ සහන වැඩසටහනක් හඳුන්වා දී ඇත. ඒ යටතේ ඔවුන්ට තම පළපුරුද්ද පදනම් කරගෙන (RPL ක්‍රමය හරහා) NVQ 3 මට්ටමේ සහතිකය ලබා ගැනීමට අවස්ථාව හිමිවේ. මෙහි ඇති සුවිශේෂී වාසිය නම්, විභාග ගාස්තු සහ දින දෙකක විශේෂ පුහුණු පාඨමාලාව සඳහා වැය වන වියදම කොමිෂන් සභාව විසින් දරනු ලැබීමයි.

මෙම බලපත්‍රය හිමිවීම හරහා විදුලි කාර්මිකයන්ට දේශීය මෙන්ම විදේශීය රැකියා වෙළෙඳපොළේ ද ඉහළ පිළිගැනීමක් ලැබෙනු ඇත. මේ පිළිබඳ වැඩිදුර තොරතුරු කොමිෂන් සභාවේ සන්නිවේදන අධ්‍යක්ෂවරයාගෙන් (077 294 3193) ලබාගත හැකිය.