The Post

𝐋𝐈𝐓𝐀𝐁𝐀 | 𝐍𝐲𝐞𝐨 𝐞𝐚 𝐏𝐨𝐥𝐚𝐨 𝐞𝐚 𝐁𝐚𝐨𝐤𝐢 𝐞 𝐓𝐬𝐨𝐞𝐥𝐚 𝐏𝐞𝐥𝐞
Lefa Mabusane oa Ha-Paki Mazenod, o hlahile ka pele ho moahloli Tšeliso Mokoko moo a qosoang ka polao ea baoki ba babeli ka 2014.

Ho latela lengolo la qhoso, Mabusane hammoho le Setsokotsane Majalle ba ile ba fenetha le ho bolaea ka sehloho 'Mathebane Ramataboee le Mpho Molatoli Khotšuoane, shoalaneng ea la 28 August 2014.

Bop**i bo supa ha bobeli, Ramataboee le Khotšuoane e ne e le baoki 'me ba ne ba le Thaba-bosiu, Khotsong Lodge, thupelong ha ka tsela e sa tsejoeng ba tla nkoa ke Mabusane le Majalle 'me ba il'o ba fenethela mangopeng a Ha-Mosalla hona Thaba-Bosiu.

Mabusane o ipoletse a se molato liqosong tsohle, ha moqosuoa 'moho le eena Majalle e se e le p**i-motšoaeli, e leng h**e e se le p**i ea mofapa-hlooho 'me o tl'o paka khahlanong le Mabusane.

Mabusane o ile a baleha lilemo tse leshome ka mor'a ho ketsahalo ena eo a qosoang ka eona. Ho latela sepolesa, o ile a balehela Afrika Boroa moo a fihlileng a tšoaroa ka tlolo e fapaneng ea molao 'me a ahloloa lilemo tse 10. Ke moo e itseng ha a khutlela hae ka mor'a h**e a lokolloe, sepolesa sa Lesotho se ileng sa moqhautsa nakong eo a neng a le lipotsong a fuputsoa ka taba e fapaneng.

Mobusane o belaelloa letotong le lelelele la litlolo tsa molao tse akarelletsang polao, bosholu ba boqhobane le peto. Leha ho le joalo, o fuoe bail linyeoeng tseo kaofela 'me o li emetse a ntse a le lapeng.

Ke maobanyana mona ka March ha a ne a qosoa ka ho beta ngoanana ea lilemo li 17 ka mor'a ho mo noesa se belaelloang e le sethethefatsi (pilisi). Tlaleho ea sepolesa e supile ha a ile a nyantša kharebe eo phooko ka le reng ba ee lijong kae-kae, ke moo e itseng ha ba le tseleng a ileng a mo noesa pilisi 'me eo a se ke a hlola a itseba.

Hamorao o ile a lemoha h**e o betiloe.

Senepeng ke Mabusane o ikoahetse sefahleho e le ho sitisa baqolotsi ho mo nka linepe.