MIND7

فهاد الحياة كندوزوا من بزاف ديال المراحل و كنعيشوا بزاف ديال المواقف و اللحظات المهمة .. و لكن أهم لحظة و أصعب وحدة فيهم هي ديك اللحظة لي كتاخد فيها قرار حاسم باش دير تغيير جدري و مصيري فحياتك. اللحظة لي غادي تخرج بيها بنتيجة حتمية بلي راه جا الوقت باش دير التغيير ايلا كنتي باغي تهنا من القلق و التوتر و المشاكل ... و تزيد القدام و تطور راسك فگاع المستويات الإجتماعية و المهنية و حتى الشخصية.

•فإيلا كنتي كتهتم براسك و بحياتك كيفاش كتمشي و فين غادية ... أكيد غادي توصل لواحد المرحلة لي غتولي فيها فاهم و مقتنع أنك محتاج دير شي تغيير ايلا بغيتي تصحح الأمور.

لي تجاوز الوزن ديالو الحدود الطبيعية [++ ..] كيفهم بلي راه جا الوقت باش يبدل النظام الغدائي ديالو و يبدا يرجع الوزن الطبيعي لي كان عليه فاللول، و لي كانت شاداه الخلعة حيت كيحشم يهضر قدام الناس، منعاتو باش يقدم عروض و أفكار كانت غادي تبدل حياتو الدراسية و المهنية كاملة، غادي يفهم فواحد اللحظة أنه خاصو يواجه الخوف ديالو و يتخلص منو باش ما يضيعش الفرص لي تقدر تغير حياتو للأفضل.

الأسباب متعددة و كتختلف من شخص لآخر و لكن الشعور
و الأفكار لي كيعيشها الشخص فهاد الفترة كتقودو لواقع واحد و هو التغيير، و لكن بشروط حيت كلشي عندو ثمن
و باش دير تغيير إيجابي فحياتك خاصك تخدم و تْدمرْ دابا باش تجني و تحصد من بعد ...

الكلام على التغيير ماشي بحال الفعل، و أهم مؤشر فهاد الجانب هو التجارب لي سبقليك عشتيها و المحاولات لي درتيها، تقدر تكون لاحظتي أنك كتدوز سوايع طويلة فمواقع التوصل الإجتماعي بلا ما تستفد منها والو و قررتي تخلا عليها و تسد الحسابات ديالك كلها و لكن النهاية ديما كتكون وحدة : كتعاود ترجع لنقطة الصفر و تفتح گاع الحسابات ديالك ولا كدير حسابات اخرى جديدة باش ترجع للعادة ديالك القديمة و تگلس عوتاني سوايع طويلة بلا فايدة!

✰گاع لي كيفشل باش ادير تغيير فحياتو أو باش يكتسب عادات جديدة ... كيدوز من جوج ديال المراحل، اللولة هي المرحلة لي كتاخد فيها القرار، هنا الشخص كيحدد شنو باغي ادير، مثلا باغي يبدل النظام الغدائي ديالو ولا ادير الرياضة. •فهاد المرحلة كيدير فيها الشخص جهدو كامل💪، و كيكون موتيڤي🔥 لدرجة كيحس فيها بلي ما يقدرش يتراجع على القرار لي خداه و أنه يقدر يحقق التغيير لي باغيه، و لكن هاد المرحلة ما كطولش بزاف حتى كيدخل فالمرحلة الثانية لي كيبدا يتراجع فيها بشكل تدريجي حتى كيستسلم و كينسى كلشي🤦

عملية التغيير عملية معقدة بزاف كتكون مبنية على خطوات مختلفة و على فترة زمنية معينة كتختلف من شخص لآخر على حسب الشخص و على حسب النوع ديال التغيير➦
و الهدف🎯 لي باغي يوصليه، يقدر ياخد ليا هدف واحد فترة زمنية طول من أي هدف آخر، و يقدر شي واحد ادير التغيير لي هو باغيه فوقت قل ولا اكثر مقارنة مع أي واحد آخر.

✰أساس النجاح هو البداية ديالك خاصها تكون صحيحة
و هادشي كيخصك تخطط ليه مزيان و تفهم راسك بطريقة صحيحة و تحدد السلوك السلبي ديالك و الوضعية لي نتا فيها و تكون عارف شنو باغي من هاد التغيير لي غادي تبدا خدام عليه قبل ما دير أي خطوة➮

🔰بعض النقاط المهمة فالعملية ديال التغيير و لي من خلالها يمكنليك تزيد من نسبة ٪ النجاح ديالك باش دير تغيير ايجابي فحياتك.

➊••❖ ❴استشعار التغيير❵ :
أول خطوة باش تلقى الحل هو تعرف بلي كاين عندك مشكل خاصو الحل، حيت ماشي منطقي تقلب على حل لمشكل نتا ماعارفوش أصلا! ولا عارفو كاين و لكن ما تقبلتيهش على أساس أنه واقع كتعيشو و خاصك تعامل معاه و تغيرو، فاش كتلقى المشكل ما خاصكش تبقى غارق فيه لوقت طويل ... حيت فهاديك اللحظة كتكون عليك مسؤولية التغيير ديالو.

غادي تعرف بلي نتا محتاج للتغيير فحالة ايلا كنتي صريح مع راسك، ما كتكذب ما كتزوق ما كتأجل ... كتشوف راسك على حقيقتو بگاع الإيجابيات و العيوب و النقائص ديالو،
ديك ساع غادي تفهم بلي خاصك دير تغيير إيجابي فحياتك.

➋••❖ ❴تحديد الدوافع و الأسباب ديال التغيير❵ :
بلا هدف واضح ما يمكنش ليك تشوف النجاح ولا تحلم بيه، و حتى لا شفتيه ما غاديش تعرفوا و ما غتقدرش تكتاشفو ولا تفهمو حيت الأهداف بوحدها هي لي كتعطي للمجهود
و الخدمة ديالنا معنى و مغزى. داكشي علاش قبل ما دير شي حاجة جيب معاك واحد الورقة و ستيلو و كتب فيها هادشي لي غادي نذكروا ليك.

☆ واجد ؟ إذن نبداو على بركة الله⇩⇩

🟥فهاد المرحلة غادي نفترض أنك تجاوزتي المرحلة اللولة
و هي لي كتحدد فيها العادة السلبية لي كتعاني منها فحياتك و بالتالي يمكنليك دوز للمرحلة الثانية لي غادي تخدم فيها بورقة و ستيلو باش تغير ديك العادة السلبية لي نتا بغيتي تهنا منها.

أول حاجة غادي ديرها هي تقسّم الورقة لجوج ديال جوايه، الجهة اللولة كتب فيها المشكل لي عندك فالفوق ديال الورقة، تحت منها مباشرة غادي تكتب گاع السلبيات فالسلوك لي نتا باغي تغيرو. و فالجهة الاخرى كتب الهدف ديالك فالفوق و تحت منو مباشرة كتب گاع الإيجابيات لي غادي تولي عندك فحالة ايلا نجحتي فالتغيير لي باغي ديرو.
وصلتك الفكرة ؟ نتمنى هادشي، و دابا ملي تسالي من هاد اللائحة لي درتي تقدر دوز للخطوة لي غادي تجي مباشرة من بعد هادي.

🟩بعد ما ساليتي اللائحة📝 ديالك لي فيها گاع العادات
و السلوكات السلبية لي باغي تبدلها بهاديك الإيجابيات لي كاينة فالطرف لاَخُرْ ديال الورقة، خليني نسولك � واحد السؤال : كيفاش ناوي تبدا فهاد التغيير ؟ و شنو هي الطريقة لي غادي تخدم بيها باش توصل الهدف ديالك ؟ واش عندك شي طريقة معينة ولا غادي تبع گاع الطرق و الأساليب لي كاينة بشكل عشوائي بلا ما تفكير و بلا تخطيط ؟🤔

ايلا كنتي شخص عادي ما عارفش كيفاش تبلاني و تخطط كيفما كيديروا گاع الناس لي نجحوا باش يطوروا ريوسهم
و داروا تغييرات كثيرة فحياتهم ماشي غير تغيير واحد فقط، إذن نتا فهاد الحالة غادي تبع هاد الأسلوب⇩⇩ :

النهار اللول : غادي تاخد قرار باش دير واحد التغيير معين … النهار الثاني : غادي تبدا فالخدمة على الهدف لي حددتيه
و نتا فالطوب ديال القوة و الحماس ديالك، غادي تكمل على هاد الحالة لفترة ربما ما كتعداش ثلاثين يوم … الايام لي غادي تجي من بعد غاتبدا هاد الأفكار دور ليك فراسك⇩⇩ : عييت و باقي وصلت لحتى شي نتيجة ... ما كانش كيسحاب ليا هادشي غادي يكون صعيب بحال هكا … يمكن و الله أعلم غلطت فشي حاجة، وقيلا خاصني نحبس ... لا ما غاديش نحبس غنزيد شي أيامات اخرى و نشوف شنو غادي طرا ...

الايام لي غاتجي من ورا هادشي غادي تكون فيها الإنتاجية ديالك قل مقارنةً بالايام اللولة و بالتالي ما غتوصل لحتى شي نتيجة، هنا غايبدا اجيك الإحباط و الحافز غايبدا يطفى شوية بشوية ... حتى كتوصل للمرحلة لي غايبدا فيها الإلتزام ديالك بالخدمة يقل، و المرحلة اللخرة هي فاش غادي ترجع للنقطة لي بديتي منها فاللول و تستسلم و تنسى كلشي حتى تلقى راسك فوضعية خايبة و يمكن تكون خيب من الوضعية لي كنتي فيها قبل ما تبدا هادشي كامل.

واش عارف السبب علاش كيوقع هاد البلان لأغلبية ديال الناس، السبب راه واضح هو داك الإندفاع و التهور لي كيوقع ليهم فاللول، كيبداو ديريكت فالخدمة بلا تفكير و بلا تخطيط كينساو المفاهيم الأساسية و القواعد لي ضرورية فالعملية ديال التغيير. ماتكونش بحالهم.

قبل ما تبدا فالخدمة على الهدف ديالك خاصك دير خطة باش تعاونك تنظم بيها الوقت و الجهد ديالك، داكشي علاش فالبداية ما تزربش حتى تكون عندك فكرة واضحة على الطريقة لي غادي تخدم بيها باش توصل الهدف ديالك.

•مثال: ايلا كنتي باغي تبني جسم رياضي🤸 خاصك تحدد الساعات و الايام ديال التدريب لي غادي تبقى متبعها حتى توصل للهدف ديالك فاللخر. حيت ماشي معقول دير الرياضة نهار واحد فالشهر اللول و من بعد دير سيمانة فالشهر الثاني
و فالشهر الثالث دير غير يومين صافي ... بهاد الطريقة العشوائية ما غتوصل لحتى شي نتيجة.

فالمقابل يمكنليك دير خطة و بروغرام منظم فيه جوج ديال الحصص كل حصة فيها ساعة مثلا، هادشي وخا يبان ليك ساهل و لكن كيبقى كمثال يمكنليك تقادو براسك فهاد الحالة.
غادي يبقى ليك غير تعلم كيفاش تصاوب بروغرام و خطة تخدم بيها براسك على حسب الهدف ديالك. و أهم حاجة فهادشي كامل هو تحترم ديك الخطة و تطبقها بداكشي لي فيها.

•••النقطة الثانية و لي عندها نفس الأهمية ديال التخطيط هي تعرف كيفاش تفرق الجهد و تحكم فالمشاعر ديالك لي كتخليك تهور و تندافع فاللول باش دير مجهود اكبر من الطاقة ديالك➦

•أحسن طريقة هي تعتمد على مبدأ التدرج و تمشي خطوة بخطوة ... و تفرق الجهد و الوقت ديالك على فترات باش توصل الهدف لي نتا باغيه فاللخر√

➌••❖ ❴الثبات على الهدف و الإصرار على التغيير للأفضل❵ :
واش كل واحد كيبغي ادير شي تغيير فحياتو كينجح ؟
واش الرغبة بوحدها كافية ؟ باش تعرف الجواب سول راسك
شحال من مرة بغيتي تكتسب عادة جديدة و لكن فشلتي،
و شحال من مرة درتي هدف قدام عينيك و ملي بديتي خدام ما قدرتيش تكمل و تراجعتي فاللخر ؟
الجواب هو لا، ماشي كل واحد باغي ادير شي تغيير فحياتو كينجح باش يوصليه، گاع الناس باغا توصل و تنجح و تميز فالمجال لي هي كتبرع فيه، كاملين باغين هادشي و لكن ماشي كل واحد كيفهم شنو باغي لسبب بسيط حيت التغيير صعيب، صعيب بزاف.

"التغيير صعيب حيت ما خاصوش يكون مجرد فكرة فالراس، بل خاصو يكون حقيقة كيشوفوها الناس"➥

راه كلشي باغي اديرو داك التغيير المهم فحياتو، و كلشي كيتكلم📺🎤 على الأهداف و الأحلام ديالو ... و الاغلبية فيهم كيتفنن كيفما بغا فالهضرة و التمنيات ... و لكن قليل لي كيطبق ديك الهضرة🗣️ و الأمنيات باش تولي واقع ملموس، و هادا هو السبب لي كيخلي الشخصيات لي هي ناجحة✓
و متفوقة فحياتها يكونوا متميزين و مختالفين على الخرين، و كلشي كيحتارمهم و كيحاولوا حتى هوما ادير بحالهم
و يتبعوا نفس الطريق ديالهم ...

داكشي علاش خاصك تفهم واحد الحاجة مهمة و هي أن التغيير كيبغي منك تخدم مزيان و دير لي فجهدك و أهم حاجة فهادشي تكون صبار، خاص تكون مع هادوك لي عندهم النفس الطويل🏃 باش تقدر تربح السباق🥇 و توصل لخط النهاية، التسرع و الإندفاع ماشي هو لي غادي يخليك تختم السباق، لا، لي كيعرف كيفاش يسير الجهد و يقتاصد الطاقة ديالو فالفترة ديال السباق و ما كيستسلمش فاللول هو لي كيوصل الخط ديال النهاية فاللخر.

الأغلبية لي فشلوا ماقدروش يحققوا الاهداف ديالهم هوما هادوك لي كيبغوا النتائج تبان بالزربة و لي كيستسلموا دغيا.

كانقول ديما لهاداك لي عندو هدف فحياتو باغي يحققو، ايلا ماكانش عندك الجهد و الصبر للخدمة ولا كاتبغي النتائج تبان دغيا بلا تقولينا : "راه بغيت ندير شي حاجة فحياتي!"، حيت فاش كادير شي خدمة خاصك ضروري تصبر عليها🧘 حتى يبانوا النتائج لي نتا باغيهم من هاد الخدمة، هادا هو البلان ماكاينش شي طريق مختصر لي ممكن تسلكو باش تنجح✅ و تفوق فالمجال لي نتا كاتشتاغل فيه💁 من غير الخدمة
و الصبر.

ماتقدرش تبدل العادات ديالك السلبية بعادات اخرى إيجابية فشهر ولا فشهرين، و مايمكنش تحتارف شي مجال فعام ولا عامين ... هادشي صعيب و قليل فاش كيوقع مع شي واحد.

👈"تفكر ديما أن الخدمة و الصبر هوما المفتاح ديال النجاح"

🟧 التغيير خطوة مهمة بزاف كنديروها فحياتنا، ولكن إيلا درناها بطريقة صحيحة💯 قاصدين بيها أهداف🎯 ايجابية و مفيدة غادي نوصلوا بيها لنتائج مزيانة، ولكن قبل من هادشي كلو خاص الخدمة و الجهد و الصبر.

تحياتي✎

™¹•
𝗖𝗼𝗽𝘆𝗿𝗶𝗴𝗵𝘁 : MIND⁷