16.09.2006

المنتوج دار التيران، دار الرينيو، ودار اللحظات اللي كتمثل فعلاً الحركية، ولكن للأسف دابا ولى المنتوج كيتلبس فالحومة، فالقهوة، فالثانويات، وكأنو زينة ووسيلة باش تبان. وهنا المشكل الكبير، حيث القيمة الحقيقية ديال المنتوج ماشي فشكله، ولكن فالأحداث لي شارك فيها، والدموع والعرق لي تسالاو باش يتخدم.المنتوج كيمثل الغروب، كيمثل فكرة. وأي تصرف خارج الإطار، كيتحسب عليك وعلى المجموعة كاملة، لأنك منين كتلبسو، كتحمل مسؤولية كبر منك. ولى اليوم الواحد كيلبس المنتوج فالأماكن العامة، كيتصور بيه، وكيحطه فستوري، وكأنو عايش فيلم، وناسي أن هاد المنتوج خرج باش يتلبس فالماتش، فالمعركة، ماشي فالتصاور. المنتوج ماشي للزواق، المنتوج راه أمانة. وخا تكون شاريه بفلوسك، راه ماشي ديالك، راه ديال الكيان كامل. وكنصيحة لأي واحد باغي يحترم راسو ويخدم على مبادئ صحيحة: المنتوج يتلبس فبلاصتو، واللي باغي يبان يخدم، ماشي يصوّر.

مؤخرا ولينا كنشوفو تمييع الحركية من بعض الشباب لي كيبينو وجههم و كيفتاخرو بشي طاغ رسموه ولا بشي برودوي بل أيضا كيتصورو حداه بوجوه مكشوفة و هادشي كيضر بالمجموعة و كيضر بأعضائها و لي نتا منهم كثر ما كينفعهم.

هاد الموضوع جد مهم، دوك التصاور لي كتبين فيهم وجهك أ بطل مستقبلا يقدرو يكونو سبب باش يتجبد ليك شي مشكل، ولو عارفين أن الأعضاء ديالنا واعيين تبارك الله ولكن متعرف الدنيا أش تجيب. المحيط لي نتا فيه ماشي كلشي فيه ناس نقيين بحالك أخويا الفيراجيست ، ماشي كلشي عقلو نقي، و يقدر يلصق ليك ولا للمجموعة شي مونتيف خايب بسبب خطأ ساذج. هادشي بلا منهضرو على جانب أن التصاور كتحرمك من تعيش الشغف و تحس براسك فعلا نافع المجموعة و الفرقة، لأنه المجموعة تدارت على ود الفرقة وليس العكس.

و شكرا لأي واحد كيعطي من جهدو ولا من جيبو بلا ميبان فالصورة.
نكران الذات أهم مبدأ .