Van Home

Mi pakhat nih khrihfa nun hi zeitindah tah ding a si tiah rak ka hal sehlaw?
“Thlarau theitlai”(Galati 5:22-23) tiah ka ti hnga.

Zeitluk in dah a phungchim a that, nikhatah voi zeizah thla a cam, zeitluk in biaknakah ai pekchanh,vawlei thluachuah zeitluk in dah a hmuh timi in Khrihfa pakhat nunnak hi ka tah hnga lo, cu bantuk thil hna cu khrihfa nunnak ah an herh ve ko nain kei ka tah fung an si lo.

Aruang cu, a tlonlen/nunzia aa dawh lo ngai mi phungchim thiam tampi hmuh awk in an um. Thlacam a thawng ngai nain innpa he aa rem lo mi tampi an um. Biaknak ah aa pechan ngai nain midang chiatnak kong ceih a zuam tuk mi an um fawn ko. Mi cheukhat cu degree tampi an ngei nain thil hmete hmanhah midang ngaihthiam an duh lo.

Asinain Thiang Thlarau thei a tlai mi cu buainak a chuahtertu an si bal lo. Abuai ciami hmanh remnak a sertu an si. Nihin khrihfa tampi cu mah zawn ruahnak in kan khat, cucu a puitling lomi zumtu nun, thei tha a tlai lo mi zumtu nun a si. Mi nih kan cungah thatnak tuah hna seh ti lawng kan duh, asinain midang zawn ruah kan i tim ve lo. Mi nih ngaihthiammi si kan duh nain midang ngaithiamtu si kan huam lo. Cheukhat cu midang siarem tein khua an sak kan hmuh tikah kan sia a rem kho lo. Kan caah santlaimi lawng komh kan duh tawn hna. Mi pakhat khat nih fahnak an kan pek tikah teirul cham kan i zuam i fak chinchin in fahnak pek kan i tim.

Kan hawipa vaipa nih bia kan i ruahnakah a chimmi cu "An ka zomhteih/zohchuk zongah a poi tukah ka chia lo, cawnnak hmun asi caah hi bantuk zuamcawhnak tete zong hi a herh ve tiah ka ruah, zuamcawhnak hme tete hmanh kan tuar khawh lo ahcun, hmailei zumlotu lakah rian kan tuan tikah a ngan deuhmi zuamcawhnak zeitin dah kan in khawh lai” tiah a ka ti bal. Cu kan biaruahnak cu ka duh ngai. Khrih ralkap tuan dingah a cawng liomi kan si bantukin, a hlawhtlingmi kan si nak hnga hika hmun hi thil ttha vialte kan cawnnak hmun asi.

Jesuh khrih nih a kan chimhmi cu, "Nan ral kha va daw hna ulaw an hremtu hna kha thlacam piak hna u" ati.(Matthai 5:44). Zeicahtiah kan cung i thil thalo an tuahtu cu anmah an si lo, thil tha lo tuah duhnak lungput a ngeihtertu cu Satan tu a si deuh. Tahchunnakah Cakei meithal in na kah tiah hei ti u sih. Cakei a thihtertu cu Meithal asi nain Meithal cu cabuai cungah na chiah ahcun amah tein Cakei a kap bal lai lo, mi nih meithal hmangin cakei cu an kah tu khi asi. Cakei ral cu meithal si lo nain, minung a si.

Kan minung hawi sinin fahnak, harnak kan tuar mi zong hi an mah minung kha si lo in satan nih minung thinlung kha hmanrua ah a ser caah asi. Cucah mi pakhat khat nih na lung an fahter sual ahcun amah kha va hua hlah, A ruahnakah khua thalo a khantertu Satan tu kha huat ding asi deuh. Cucaah, teirulchamnak lam tha bik cu fahnak a kan petu caah thlacam hi a si. Cu ti kan tuahah cun kan ral taktak asi mi satan kan tei asi.

Zumtu tha cu mah zawn ruahnak lungput kal taak i midang caah thil tha tuah i zuam asi. Thlarau theitlai cu mi nih ka caah zeitluk tam dah an tuah timi si lo in midang caah zeitluk tam dah ka tuah ve cang timi biahalnak le lungput tu khi asi.

Thlarau Theitlai 9;
-Dawtnak: Midang va dawt
- Lawmhnak: Midang lung va lawmhter
- Daihnak: Midang caah daihnak ser
- Lungsaunak: Midang cungah lungsaunak langhter
- Zaangfahnak: Midang cungah zaangfahnak ngeih
- Ṭhatnak: Midang cungah ṭhatnak tuah
- Zumhawktlak sinak: Midang cungah zumhawktlak sinak
- Nemnak: Midang cungah nunnem
- Mah le mah i uk khawhnak: Midang cungah thatlonak a tlunnak hnga lo mah le mah i uk khawhnak

Cucu Jesuh nih nunter a kan duhmi nunzia dawh cu an si. Midang zawn na ruah cu, nangmah zawn nai ruah zong asi. Midang thluachuah na pek hna ahcun nangmah zong thluachuah na pek asi ve.