Khint Paysar
Share
Contact information, map and directions, contact form, opening hours, services, ratings, photos, videos and announcements from Khint Paysar, Book shop, Hlaing.
03/02/2022
သူမ နာမည် " မြိုင် "
အငြိမ်းစား စက်ရှင်တရားသူကြီးဟောင်း၏ သမီး
ဘိလပ်ပြန် ဝတ်လုံတော်ရတစ်ဦး၏ နှမ
ရွှေတောင်ကြားရပ်ကွက် ခြံကျယ်ကြီးထဲနေ၍ ကြီးပြင်းလာသူ
နှင်းဆီပန်းတွေ စိုက်တယ် ၊ နှင်းဆီပန်းတွေ မြတ်နိုးတယ်
အင်္ဂလိပ်ကျောင်းထွက် တစ်ယောက်ဖြစ်လို့
အင်္ဂလိပ်ကဗျာတွေသာ အမြဲလိုလို ဖတ်တယ် ။
ပီယာနိုတီး ကျွမ်းကျင်တယ်
အထက်တန်းလွှာ ပတ်ဝန်းကျင်မှာ ကျင်းပလေ့ရှိတဲ့
ပျော်ပွဲရွှင်ပွဲ ၊ မွေးနေ့သဘင်ပွဲ ၊ ဘုရားကိုးဆူပွဲတွေဆို
မြိုင့်ရဲ့ စန္ဒရားလက်သံကိုသာ ပွဲတောင်းလေ့ ရှိကြတယ် ။
နှင်းဆီပန်းပင်တွေကြား အင်္ဂလိပ်ကဗျာတွေကြား ပျော်မွေ့တယ်
စိတ်ပါရင် ပီယာနို တီးချင်တီးနေမယ်
ရံဖန်ရံခါ သူငယ်ချင်းဖြစ်သူ လဲ့လဲ့တို့အိမ် သွားလည်မယ်
မြိုင့်ဘဝ ဤကဲ့သို့ ပေါ့ပါးတယ် ။
ရေပေါ်ဆီ ဓနရှင်အသိုင်းအဝိုင်းက မိန်းကလေး မြိုင်
မြန်မာသတင်းစာများကို အထင်မကြီးသော မြိုင်
စာပေမဖတ်တဲ့ မြိုင် ၊ ဘဝအကြောင်း ဘာဆိုဘာမျှမသိတဲ့ မြိုင်
ကမ္ဘာ့အရေး မြန်မာ့အရေး နည်းနည်းမှ စိတ်မဝင်စားတဲ့ မြိုင်
နိုင်ငံရေးဆိုသည်မှာ
အပိုသက်သက် ဝေါဟာရတစ်ခုဟုသာ ထင်နေသော မြိုင်
လူကုံထံ အသိုင်းအဝိုင်းကြားမှာတော့
ပညာတတ် ရုပ်အဆင်းရူပကာ လှပကြော့ရှင်းလို့
အလွန် ဂုဏ်ဝင့်ခဲ့ရတဲ့ မြိုင်
ဂုဏ်ရည်တူချင်း ထပ်ဖို့ရာအတွက်
မိဘချင်း သဘောတူကြည်ဖြူထားသူမှာ " ကိုသက်တင် "
မြိုင် ဖတ်ဖတ်နေသော ကဗျာစာအုပ်တွေထဲမှ
စိတ်ကူးယဉ် မျှော်စိုက်နေခဲ့သော " မောင် "
ထို " မောင် " သည် ကိုသက်တင်တော့မဟုတ် ။
ဆုံမယ့်ဆုံလေတော့ " ကိုတင်ဦး " ဆိုသူနှင့် ...
မြိုင့်အသိုင်းအဝိုင်းအတွက်တော့ ကိုတင်ဦးဟာ
အထင်ကြီးစရာမရှိတဲ့ သတင်းစာတိုက် အလုပ်သမားတစ်ဦးသာ
မြိုင့်အတွက်တော့ သည်လူဟာ ဆန်းကြယ်တယ်
သည်လူကိုမှ စိတ်ဝင်တစားဖြစ်မိ ချစ်မိခဲ့တယ်
မိဘဆွေမျိုးတွေ သဘောမတူ ကန့်ကွက်နေတဲ့ကြားက
ကိုတင်ဦးကို သတ္တိရှိရှိ မင်္ဂလာဆောင်ပစ်ခဲ့တဲ့ မြိုင်
သူမ တစ်သက်လုံး နေထိုင်ခဲ့တဲ့ ခြံဝန်း
သူမ နှစ်သက်စွာ တီးလေ့ရှိသော ပီယာနို
အမြတ်တနိုး ပြုစုပျိုးထောင်ခဲ့ရတဲ့
သူမရဲ့ နှင်းဆီပင်တွေကို အကုန်ထားရစ်ကာ
ကိုယ်တိုင် ရွေးချယ်ခဲ့တဲ့သူနောက် လိုက်သွားပြီးမှ
တကယ့်လက်တွေ့ဘဝကို ခံနိုင်ရည်မရှိ ရင်မဆိုင်နိုင်ခဲ့တဲ့ မြိုင်
ရွှေဘုံစံ မင်းသမီးဘဝကိုသာ ပြန်တမ်းတတဲ့ မြိုင်
လဲ့လဲ့နှင့်မောင်မောင်လတ်တို့ နှစ်ဦးကြားက အရှုပ်တော်ပုံတွေ
ယောင်းမဖြစ်သူနှင့် အိမ်တွင်းရေး ပြသနာများ
ကိုသက်တင်ရဲ့ အပြုအမူ အပြောဆို ရဲတင်းလာမှုတွေ
အဒေါ်ဖြစ်သူ ဒေါ်စောခင်ရဲ့ ဖိအားတချို့
ထိုအရာတွေနှင့် သောကများနေရတဲ့ မြိုင်
ဆင်ခြင်တွေးခေါ်မှုမရှိ စိတ်ကစား စိတ်အလိုလိုက်ပစ်ခဲ့တဲ့ မြိုင်
မိမိရဲ့မိုက်ပြစ်တွေ ဆိုးပြစ်တွေကြောင့်
မည်သူတစ်ဦးတစ်ယောက်နဲ့မှ မတွေ့ဆုံရဲတော့ဘဲ
တမြေ့မြေ့ နာကျင်ခံစားသွားတဲ့ မြိုင်
ကိုတင်ဦး အကြိမ်ကြိမ် ပြောပြခဲ့ဖူးသော
ပြည်တွင်းစစ် မည်မျှကြောက်စရာကောင်းသည်ဆိုတာ
မြိုင် ကိုယ်တိုင်ကြုံလိုက်ရတဲ့အခါ ....
ဘဝကို အဖော်မပါ တစ်ကိုယ်တည်း ရင်ဆိုင်ကျော်ဖြတ်ရမှ
ပျော်ရွှင်မှု အစစ်မှန် ၊ ဘဝရဲ့ အဓိပ္ပာယ်
အခြေခံလူတန်းစားတွေရဲ့ လက်တွေ့ဘဝကို
မြိုင် သိလိုက်ရသည့် အချိန် ......
🔺 ကိုတင်ဦး
အထက်တန်းကျောင်းမှာတောင် ပညာမသင်ခဲ့ရသူ
ထက်မြက်၍ ရိုးသားတယ် ၊ ဗဟုသုတစုံတယ်
ဖြောင့်မတ်တယ် ၊ တည်ကြည်တယ်
ယောက်ျားပီသတယ် ၊ ခန့်ညားတယ် ။
ကိုသက်ထွန်း တည်ထောင်ထားတဲ့
" ပြည်သူ့အလင်း " သတင်းစာတိုက်မှ အယ်ဒီတာ ၊
သတင်းစာသမားတစ်ဖြစ်လဲ နိုင်ငံရေးသမားတစ်ဦး
ပီယာနိုတီးခတ်မှုမှာ မြိုင့်ထက် ကျွမ်းကျင်သည့်အပြင်
မြန်မာသီချင်းကြီး သီချင်းခန့်တွေလည်း ရ
ဥရောပဂန္တဝင် အမေရိကန်ဘောဂဗေဒတွေ ဝေဖန်သုံးသပ်နိုင်ပြီး
စာပေကျမ်းဂန်မှာလည်း တော်တော်ကိုပင် နှံ့နှံ့စပ်စပ်ရှိသူ
ကြေးရတတ် လူတန်းစားတွေကြားမှာတော့
ကိုသက်ထွန်းမှလွဲ သူ့အား ကြိုဆ်ိုသူမရှိ
ဖိနှိပ်ခံ အလုပ်သမား လူတန်းစားတွေအတွက်တော့
သူဟာ နိုင်ရာဝန်ကို စွမ်းစွမ်းတမံ ထမ်းတဲ့ သူရဲကောင်းတစ်ဦး
တိုင်းပြည် ကောင်းစားချမ်းသာဖို့ ဘာလုပ်ရလုပ်ရ
တိုင်းပြည်အတွက် လူ့အဖိုးတန်တစ်ယောက်
ပိုင်ဆိုင်မှုကတော့
တစ်သက်တာ ဖတ်ရှုလာခဲ့တဲ့ စာအုပ်များစွာရယ်
ရေကျော်က တိုက်ခန်းကျဉ်းလေးရယ်
မြိုင်နှင့် မေတ္တာသက်ဝင် လက်ထပ်ပြီးကြတဲ့အခါ
မပြည့်မစုံ အခြေအနေတွေကြောင့် ရုန်းကန် ပြင်ဆင်ပေမယ့်
မြိုင့်ရဲ့ အလိုဆန္ဒတွေအတိုင်း ဖြစ်စေရဖို့
တတ်နိုင်သည့်ဖက်မှ ကြိုးစား ဖြည့်ဆည်းပေးပေမယ့်
မြိုင်ဟာ မကျေနပ်ခဲ့ မပျော်ရွှင်ခဲ့
နိမ့်ပါးတဲ့ လူတန်းစားတွေနဲ့ မပတ်သတ် မဆက်ဆံလိုခဲ့
သည်အခြေအနေတွေကို နားလည်မပေးနိုင်ခဲ့ လက်မခံချင်ခဲ့
သူတို့နှစ်ဦး ခက်ခက်ခဲခဲ တည်ထောင်ခဲ့ရတဲ့
အိမ်ထောင်ရေးဟာ နောက်ဆုံးမှာတော့ ..........
🔺 ကိုသက်တင်
ဝန်ကြီးကတော် ဒေါ်မိမိခင်၏ တူ
မြိုင့်သူငယ်ချင်း လဲ့လဲ့နှင့်ဆို မောင်နှမဝမ်းကွဲ
ဆန်စက်သူဌေးသား လူ့ပေါ်ကြော့
အပတ်တိုင်း မြင်းပွဲသွား သုံးဖြုန်းပျော်ပါးနေသူ
ယိုးဒယားသို့ မကြာခဏကူးကာ ပွေလီနေတတ်သူ
မိမိကိုယ်၌မှာ မည်မျှ ပွေရှုပ်နေစေကာမူ
ခြောက်ပြစ်ကင်းသဲလဲစင်ဖြစ်တဲ့ မြိုင့်ကိုသာ လက်ထပ်လိုသူ
အောက်ခြေအဆင့်ဆို ဘယ်သောအခါမှ လူရာမသွင်းတတ်
ကိုတင်ဦးရဲ့ အရည်အချင်းတွေအပေါ်လည်း မနာလို မရှုစိမ့်
သူ့ရဲ့ မကောင်းတဲ့ အကျင့်စရိုက်တွေဟာ
ဘယ်လိုဖုံးဖုံး အချိန်တန်တော့ ပေါ်လာခဲ့တဲ့အခါ .....
ဆရာ့ရဲ့ " မြိုင် " ဝတ္ထုစာအုပ်လေးဟာ
ဇာတ်လမ်းဇာတ်အိမ်ထက် ဇာတ်ဆောင်ကို
အသားပေး ရေးသားထားတဲ့ ဝတ္ထုမျိုးဖြစ်ပါတယ် ။
အပျော်အပါးမက်လွန်း၍
ဘယ်အရာကိုမှ လေးလေးနက်နက်မရှိ
လူတန်းစား ခွဲခြားဆက်ဆံတတ်တဲ့ သဘောတွေကို
လဲ့လဲ့ ၊ ကိုသက်တင် ၊ လဲ့လဲ့၏မိခင်တို့
သုံးနှုန်းသွားတဲ့ စကားပြောတွေကတဆင့် သိနိုင်ပါတယ် ။
ဇာတ်ရံအချို့ ပါဝင်သော်ငြားလည်း
ကိုတင်ဦး ၊ မြိုင် ၊ ကိုသက်တင် တို့ရဲ့
အဓိက ဇာတ်ကောင်စရိုက်များဟာ အပီပြင်ဆုံးပါပဲ ။
မြိုင်နဲ့ ကိုတင်ဦး လက်မထပ်ခင်
သတင်းစာတိုက်မှာ မြိုင့်ကို ပြောဆိုဆုံးမသွားတဲ့
ကိုသက်ထွန်းရဲ့ စိတ်သဘောထား စေတနာတွေ
ရေကျော် တိုက်ခန်းကျဉ်းလေးထဲ ကျင်းပခဲ့ရတဲ့
မြိုင့်ရဲ့ ခြောက်ကပ်ကပ် မင်္ဂလာဧည့်ခံပွဲ
အိမ်ထောင်ပြုအပြီး ကြုံလာရတဲ့ အခက်အခဲတွေမှာ
မြိုင် ခံနိုင်ရည်မရှိခဲ့ပုံတွေ
မြိုင့်ဖခင်ရဲ့ ဆုံးမစကားလေးတွေ
မြိုင် နားမလည်ခဲ့တဲ့ အခြေခံလူတန်းစားတွေရဲ့ ဘဝတွေ
ယောက်ျားတစ်ယောက်ရဲ့ အရည်အချင်း ၊ စိတ်ဓာတ် ခံယူချက်
မိန်းကလေးတစ်ယောက်ရဲ့ စိတ်ခံစားချက် အတွေးတွေ
လူကောင်းကို လူဆိုးထင် ၊ လူဆိုးကိုမှ လူကောင်းသကဲ့သို့
မှားယွင်း ကိုးကွယ်မိခဲ့တဲ့ မြိုင့်ကံကြမ္မာ
မြိုင့်ဘဝ အနိမ့်အမြင့် အလှည့်အပြောင်း .....
စတဲ့ ဇာတ်ခုံအဖုံဖုံကို ဖော်ပြညွှန်းဆိုသွားတဲ့
ဆရာ့အရေးအသားတွေဟာ သိပ်ကို ထောင့်စေ့လွန်းပါတယ် ။
ဆရာဟာ ဖဆပလခေတ် အစိုးရလက်ထက်မှာ
ပထမဆုံး အကျဉ်းထောင် ချခံခဲ့ရတဲ့ စာရေးဆရာကြီးတစ်ဦးပါ
ဤ " မြိုင် " ဝတ္ထုရှည်ကြီးကို ထောင်ကျခံနေရသည့်အချိန်
အခန်း ( ၃၃ ) ခန်းရှိသည့်အနက် အခန်း ( ၂၃ ) အထိ
အကျဉ်းထောင်အတွင်းမှာပဲ ရေးသားခဲ့တာပါ ။
၁၉၅၇ ဇူလိုင်လထုတ် ရှုမဝမဂ္ဂဇင်းမှာ
အခန်းဆက်ဝတ္ထုအဖြစ် ဖော်ပြခြင်းခံရတဲ့ " မြိုင် " ကို
စာမျက်နှာ ၅၆၄ မျက်နှာ ပါရှိပြီး
တန်ဖိုးငွေမှာ ၇,၅၀၀ ကျပ် ဖြစ်ပါတယ်ရှင် ။
" မြိုင် " ဟာ ဆရာ့ရဲ့ အပြောင်မြောက်ဆုံး စာအုပ်တစ်အုပ် ၊
ဇာတ်ကောင် " ကိုတင်ဦး " ဟာ ဆရာဗန်းမော်တင်အောင်ရဲ့ရုပ်ပုံ
စသည်ဖြင့် ပြောစမှတ်ပြုကြတာကိုလည်း မှတ်သားဖူးပါတယ် ။
နယ်ချဲ့ဆန့်ကျင့်ရေး ၊ နိုင်ငံရေးဗဟုသုတတွေ ၊
ကွန်မြူနစ်ဝါဒ သဘောတရားတွေ ၊
ဘဝသရုပ်ဖော် ပီပြင်မှုတွေ ၊ လူတန်းစား ပဋိပက္ခများ ၊
ဖိနှိပ်ခံ လူတန်းစားဖက်မှ ရပ်တည်ချက်တွေကို
ဆရာ့ရဲ့ အရေးအသားစွမ်းရည် လေးနက်မှုကြား
စိတ်ဝင်စားဖွယ်ကောင်းစွာဖြင့် ဖွဲ့နွဲ့ပုံဖော်ထားလို့
အချိန်ပေး ဖတ်ရှုရကျိုးနပ်စေမယ့်
မြန်မာ့ဂန္တဝင်စာရင်းဝင် ဝတ္ထုရှည်တစ်ပုဒ်ပဲ ဖြစ်ပါတယ်ရှင် ။ ။
Review by May
မြိုင် - ဗန်းမော်တင်အောင်
တန်ဖိုး -7500ကျပ်
Orchid Coloursမှာဝယ်ယူရရှိနိုင်ပါပြီ🤍
သာယာလှပသောနေ့ရက်လေးဖြစ်ပါစေရှင်🤍
#မြိုင်
#ဗန်းမော်တင်အောင်
Click here to claim your Sponsored Listing.
Category
Contact the business
Telephone
Website
Address
Hlaing
