Pathian thu

KOHHRAN INLUNGRUALNA TURA HMA I LAK DAN TUR

“Chutichuan inremna tur leh intihsawt tawnna tur thilte chu i um ang u.” Rom 14:19

In kohhranah inremna leh inpumkhatna thlentu nih i duh em? I duh chuan, a hmasa ber atan chuan: i ringtupui te nena in danglamna ai chuan in inanna lai kha i zawn hmasak phawt a ngai a ni.

Bible chuan, "Chutichuan inremna tur leh intihsawt tawnna tur thilte chu i um ang u" a ti. Rom 14:19.

Thil engemawah i ngaihtuahna leh rilru zawng zawng i pek chuan I ngaihtuahna satliah ang kha a ni lo; i tumsa reng avanga ngaihtuah i ni. Kristian kan nihna angin, Krista taksaa kan inanna lai inpumkhatna leh inremna thlen thei thil i ngaihtuah ang.

Pathian avanga i laizawn leh nuṭa te nena in inannate chu engte nge ni ang? Ephesi 4:4-6 ah thil pasarih inanna lai kan neihte a sawi a, “A koh chhan che u beiseina hmunkhata koh in ni ang bawk khan taksa pakhat leh Thlarau pakhat chauh a awm a; Lalpa pakhat, rinna hmunkhat, baptisma hmunkhat, engkim Pathian leh Pa pakhat chauh a awm a; ani chu engkim chungah a awm a, engkim fang chhuakin a awm a, engkim chhungah a awm bawk a ni."

👌Taksa pakhat kan ni. Isuan taksa tam tak a nei lo. Kohhran chauh hi a neih chu a ni!

👌Thlarau pakhat kan nei. Chhandam kan nih khan Thlarau Thianghlim thuhmun ṭheuh pek kan ni.

👌Beiseina pakhat kan nei. Isua a lo kal leh dawn a ni tih kan beisei ṭheuhva. A thihnaah khan a tawp mai lo. A tho leh a, vanah han lawnin, a lo kir leh tur thu min tiam a ni.

👌Lalpa pakhat kan nei. Pathian tam tak bia kan ni lo a ni.

👌Rinna hmun khat kan nei. Kan rinna chu lehkhabu pakhat, Bible-ah a awm a ni.

👌Baptisma pakhat kan nei. Kan tihsual apianga baptisma chan nawn ngai kan ni lo a ni.

👌Pathian pakhat kan nei. Engkim a hriaa, a hmu vek a, engtiklai pawhin kan zingah a awm a ni.

Pathian chhungkua a mi kan nih angin chhandamna thuhmun, ngaihdamna thuhmun, khawngaihna thuhmun, zahngaihna thuhmun, leh hmalam hun thuhmun kan nei. Khing zawng zawngte khi eng hnam nge emaw, mipa nge i nih hmeichhia emaw, i pian hmang emaw i len zawng emaw, khawsak dinhmun, chhungkaw dinhmun, i sualna emaw thildang emaw ai chuan a pawimawh zawk a ni.

Ephesi a thil pasarih a sawite i ngaihtuah lai hian, Pathianin in kohhranah inanna chauh nei turin a siam lo che u tih theihnghilh lo ula. Danglamna nei tur pawhin a siam che u a ni.

Pathian chuan mize hrang hrang min pe a thilpek hrang hrangin min thuam bawk a ni. Chanchinṭha bul ngaihtuahin in inpumkhat theia, Pathianin danglam taka a siamna che leh i hlutzia pawh i zirchhuak thei ang.

In kohhran memberte nen chuan khawsa mawl tawp lo vin. Beiseina thuhmun in neih angin inremna leh inpumkhatna tak tak ngaihtuahin thawk ang che.

Ngaihtuah zui atan

👉Tunlai mite hian inpumkhatna dal zawngin engtin nge an thawh le?

👉Kohhranah in thuhmunna te ngaihtuah tho siin engtin nge in danglamna te pawh in inhriatsak theih ang?

👉Kristian zawng zawngte hian Thlarau Thianghlim kan nei vek a ni tih hi engnge a hlutna?

BY: Rick Warren

THALAITE HNÊNA THURÂWN

Thuhriltu‬ ‭11:9‬
Ṭhalaite u, in ṭhat lai chên ula, In la naupan viau lai hian hlim rawh u; In thinlung duh zâwng chu zâwm ula, In mitin a hmuh châk zâwng nên chuan; Amaherawhchu, chûngah chuan Pathianin in chungah Ro a rêl dâwn tih hre reng ang che u.

Tûnlai kan țhalaite hian helai thu ‘țhat lai chen’ tih hi la chhuakin duh duh dâna awm phalna hi țhat lai chuan Pathian hian min phalsak ta vek angah hian ngâiin kan duh ang anga khawsak tumna nei ta mai hi kan awm anih hmêl khawp mai; mahse, kan chhiar thlâk zêl chuan Pathianin kan chungah ro a la rêl dâwn avângin chumi hre reng chunga kan awm erawh a ngâi thung a ni.

Kan duh ang anga kan incheina leh kan khawsak dân uluk loh phah a khawvêl mite ang maia nung tûr hian Pathian hian min ti lo ania. Krista Isuaa mi fel leh thianghlim a ruat kan nih tawh avâng hian a mawi leh țha, a fel leh dik te chu zawng chunga nun hman hi kan tih tûr a ni. ‘Chên’ han tih ah hian khawvêl mite tih ang apiang lo tih ve zêl erawh a rem tawh lo.

Pathian chuan thinlung a en ti a kan incheina leh kan țawngkam leh khawsak dân kan duh tuilo anih chuan, Pathianin ro ala rêl dâwn si a, a hmaa kan zah pui loh tûr anga kan awm a ngâi a ni. Hmangaih Pathian khawngaihna a khat a nihna hi sual tihna remchâng ah emaw khawvêl mite anga khawsak na remchângah kan lo hmang mai ang e.

Pathian nêna lendunna ah hian ringlo mite nêna ang khat renga kan pâwnlam lan dân pawisak loh hi kan tih tûr a ni lo. Thil mawilo leh fakna awm vak lo, kan lungâwi dâna khawsa chunga Pathian tih lâwm tum ai chuan, fel fai tak talin, ram President hmaa kan din pui duh tûr ang te, Kristaa mi fel kan nih tawh anga a hmaah pawh mi fel anga min lo hmuh theihna tûr hi kan zawn ve a ngâi a ni.

“Pathian nên kan inkâr a fel chuan..” ti a duh duh dâna nung leh si te hi Pathian nên an inkâr a țha thei hian a rinawm loh. Kan mihring pui pawhin ‘mak’ an lo tih theih tûr ang chinah phei hi chuan Pathian hi ropui in a lan hi kei ve mai pawh hian ka ring lo. Thinlung entu Pathian lâwmzâwng chu nu leh pa thuawih, hmangaihnaa awma aia upa zahna nêna nun hi a ni.

Fellowship naa kan hun hman te pawh a țha, in lama thuawih chuang si lova inkhâwm taimâk êm êm ringawt te, chhûng ten haw hun an tih hunah pawh haw țha hlei thei miah lo hi kan va tam ta êm! Pathian kâwra hman hi thil hlauhawm tak ani tih te hi i hria ang u. Kan inchhûngah ngêi țanin thuawihnaa bul țan hi a pawimawh ber. Inkhâwmna anih avânga dik ta bera inngâi ngawt te hi kan awm țhin. Thuawihna in bul i țan ang u, nu leh pate ngâichâng hmasa zêlin i kal ang u.

Krista nên hian kan nun chen hi a nuam berin a thlamuan thlâk bera, thlamuanna dik nei chunga kan nun hmang tûr hian Lalpa pawh hian min duh ber a ni. ‘In țhat lai hian in duh duh dânin in awm thei ang” ti niâwm taka ngaihna hi a awm em ni chu âw tih theih tûr hian chhûngte ngâichâng miah lovin, keimahnia thu awm te vung taka kalpui ngawt hi ani ber lo a nia.

Philippi‬ ‭4:8‬
A tâwp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna rêng a awma, fakna rêng a awm phawt chuan - chûng chu ngaihtuah rawh u.

LALPAN MALSAWM CHE U RAWH SE.

n