တီဘီဆရာဝန်

“ တစ်ကြိမ်မှာ တစ်ခု ”

မင်္ဂလာပါခင်ဗျာ ... ။

ကျွန်တော်ကတော့ လက်ရှိမှာလည်း တီဘီရောဂါနဲ့ ပတ်သက်တဲ့ ကျန်းမာရေးဝန်ဆောင်မှုတွေပေးနေသလို၊ လူမှုပတ်ဝန်းကျင်အတွင်း မှန်ကန်တဲ့ သတင်းစကားတွေ ထိထိရောက်ရောက် ပျံ့နှံ့ရောက်ရှိစေဖို့အတွက် ဒီစာမျက်နှာလေးကိုလည်း ကြိုးစားတင်ဆက်နေတဲ့ ‘တီဘီဆရာဝန်’ တစ်ဦးပဲ ဖြစ်ပါတယ်။

ကျွန်တော့်ရဲ့ ယုံကြည်မှုတစ်ခုကတော့ “ဆေးရုံ၊ ဆေးခန်းတွေမှာပဲ တီဘီရောဂါကို တိုက်ဖျက်နေလို့ မရဘူး” ဆိုတာပါပဲ။

လူတွေကြားထဲမှာ အရိုးစွဲနေတဲ့ ‘တီဘီအယူအဆအမှားတွေနဲ့ ရောဂါအပေါ် ရှက်ကြောက်အားငယ်စရာလို့ မြင်နေတဲ့အမြင်တွေ’ ကို အမှန်တကယ် ပြုပြင်နိုင်မှသာ တီဘီရောဂါကို အနိုင်ယူ တားဆီးနိုင်မှာဖြစ်ပါတယ်။

ဒါကြောင့် အခြားအလုပ်တာဝန်တွေနဲ့ မအားလပ်ပေမဲ့လည်း ကျွန်တော်ဟာ အခုလို ‘ဒီဂျစ်တယ် ဆက်သွယ်ရေး (Digital Communication) ကဏ္ဍ’ ကို အသုံးပြုပြီး တီဘီရောဂါအပေါ် လူတွေ စိတ်ဝင်စားမှု ပိုရှိလာအောင် တိုက်တွန်းနှိုးဆော်ဖို့ ဆုံးဖြတ်ခဲ့တာ ဖြစ်ပါတယ်။

ဒီစာမျက်နှာလေးကနေတစ်ဆင့် —
- မှန်ကန်တဲ့ တီဘီရောဂါ ကျန်းမာရေးအသိပညာပေးနိုင်ဖို့၊
- အခမဲ့ ဝန်ဆောင်မှုများကို လက်လှမ်းမီ လမ်းညွှန်ချိတ်ဆက်ပေးနိုင်ဖို့နဲ့
- ရောဂါကို စောစီးစွာ စစ်ဆေးတွေ့ရှိပြီး စနစ်တကျ ကုသမှုခံယူနိုင်စေဖို့ ...
ဆိုတဲ့ ရည်ရွယ်ချက်တွေနဲ့ ရတဲ့အချိန်လေးမှာပဲ ကြိုးစားတင်ဆက်နေရတာ ဖြစ်ပါတယ်။

လက်တွေ့မှာတော့ ကျန်းမာရေးနဲ့ ပတ်သက်တဲ့ စာမျက်နှာဖြစ်လို့ လူတွေကြားထဲ ရောက်ရှိပျံ့နှံ့ဖို့က မလွယ်ကူပါဘူး။ ဒါ့အပြင် တီဘီရောဂါဟာ လူတွေတို့ထိရမှာ တွန့်ဆုတ်တတ်ကြတဲ့ အကြောင်းအရာလည်းဖြစ်နေပြန်တာကြောင့် ပိုပြီးတော့တောင် ခက်ခဲမယ်ဆိုတာကိုလည်း သိပါတယ်။

ဒါပေမဲ့ “ဒါတွေလုပ်နေလို့ ဘယ်သူအကျိုးရှိမှာလဲ”၊ “ဘာတွေများ ထူးထူးခြားခြား ပြောင်းလဲသွားမှာလဲ” ရယ်လို့ မေးလာခဲ့ရင်တော့ ‘ဆရာဖေမြင့်ရဲ့ နှလုံးသားအာဟာရ (ရသစာများ)’ ထဲက စာသားလေးကိုပဲ မှီငြမ်းပြီး အခုလို ပြန်ဖြေပေးလိုက်ချင်ပါတယ်ခင်ဗျာ။

“တခြားသူတွေအတွက်တော့ ဘာမှမထူးခြားသွားနိုင်ပေမဲ့ ... သတိပြု ဖတ်ရှုမိတဲ့သူတစ်ယောက်ဆီမှာတော့ မှန်ကန်တဲ့ ကျန်းမာရေးအသိလေး ဝင်သွားနိုင်တာပေါ့ … ။”

လေးစားစွာဖြင့် —

[တီဘီဆရာဝန်]