ULearn Webx Technology

ဒီတစ်ခါ ကျွန်တော်တို့ page မှ မျှဝေပေးလိုသော ကျန်းမာရေးဆိုင်ရာ ဗဟုသုတကတော့..

အစားအစာများမှ မှိုအဆိပ်ကြောင့် ဘယ်လိုအန္တရာယ်တွေ ဖြစ်စေနိုင်လဲ?

🔹အစားအစာနှင့် ကောက်ပဲသီးနှံများတွင် မှိုအမျိုးမျိုးတက်ရာမှတစ်ဆင့် အဆိုပါမှိုများတွင်ပါရှိသော Aflatoxin မှိုအဆိပ် တစ်မျိုးသည် လူနှင့် တိရစ္ဆာန်များ၏ ကျန်းမာရေးကို ဆိုးရွားစွာထိခိုက်စေကာ အထူးသဖြင့် ကင်ဆာရောဂါအမျိုးမျိုးကို ဖြစ်ပွားစေနိုင်ပါသည်။

🔹Aspergillus flavus နှင့် Aspergillus paragiticus မှိုမျိုးစိတ်များမှ Aflatoxin မှိုအဆိပ်အများဆုံး ထွက်ရှိကာ မြန်မာနိုင်ငံအပါအဝင် အပူချိန်မြင့်မားပြီး စိုထိုင်းဆမြင့်မားသော အပူပိုင်းဇုံနှင့် သမပိုင်းဇုံ များတွင် အဆိုပါမှိုအဆိပ်ကြောင့် နောက်ဆက်တွဲ‌ရောဂါအများအပြား ဖြစ်ပွားလေ့ရှိပါသည်။

🔹Aflatoxin မှိုအဆိပ် မျိုးစိတ်ခွဲများစွာရှိသည့်အနက် Aflatoxin B1, B2, G1 နှင့် G2 တို့မှာ အထူးသဖြင့် ပဲအမျိုးမျိုးနှင့် ပဲထွက်ပစ္စည်း (ဥပမာ- မြေပဲ)၊ ကောက်နှံ၊ စပါး၊ ပြောင်း စသည့် ကောက်ပဲသီးနှံများနှင့် ငရုတ်သီးစို၊ ငရုတ်သီးခြောက်များ၊ အသားနှင့် နို့ထွက်ပစ္စည်းများတွင် အများဆုံးပါဝင်လေ့ရှိသည်ကို တွေ့ရှိရပြီး ကောက်နှံရိတ်သိမ်းခြင်း မပြုခင်နှင့် ရိတ်သိမ်းပြီး ကောင်းမွန်စွာ ထိန်သိမ်းသိုလှောင်မှု မရှိခြင်းကြောင့် မှိုတက်ခြင်းမှတစ်ဆင့် အစားအသောက်များတွင် Aflatoxin မှိုအဆိပ်ပါဝင်ခြင်း ဖြစ်ပွားပါသည်။

⚕️Aflatoxin မှိုအဆပ်ကြောင့် ဘာတွေဖြစ်နိုင်သလဲ ?

(၁) Aflatoxin မှိုအဆိပ်ကြောင့် ခန္ဓာကိုယ်တွင်း ကလီစာများတွင် ကင်ဆာရောဂါအမျိုးမျိုး (ဥပမာ- အသည်း/ ကျောက်ကပ်ကင်ဆာများ) ဖြစ်စေပါသည်။

(၂) မွေးစကလေးများ Aflatoxin မှိုအဆိပ်သင့် ခြင်းကြောင့် မွေးရာပါချို့ယွင်းမှုဖြစ်ခြင်း၊ ကြီးထွားဖွံ့ဖြိုးမှုနှောင့်နှေးခြင်း (စကားထစ်ခြင်း၊ ဒယီး ဒယိုင်ဖြစ်ခြင်း) ဖြစ်စေပါသည်။

(၃) Aflatoxin မှိုအဆိပ်သည် ကိုယ်ခံအားစနစ်အား လျော့ကျစေခြင်း ကြောင့် ရောဂါခုခံစွမ်းအားကျဆင်းခြင်းကို ဖြစ်စေပါသည်။

⚕️ဒါဆိုရင် Aflatoxin မှို အန္တရာယ်မှ ဘယ်လို ကာကွယ်မလဲ ?

Aflatoxin မှိုအဆိပ်တက်ခြင်းမှ ကာကွယ်ရန် (လတ်ဆတ်မှုမရှိသော၊ အရောင်ပြောင်းသော၊ မှိုတက် နေသော အစားအသောက်များ၊ ကောက်ပဲသီးနှံများ၊ ငရုပ်သီးစို၊ ငရုပ်သီးခြောက်များနှင့် အသင့်စား အစာများ) စားသုံးခြင်းမှ လုံးဝရှောင်ကြဉ်ပါ။

(*အစားအသောက်ထုတ်လုပ်သိုလှောင်ရောင်းချသူများအနေနှင့် Aflatoxin မှိုအဆိပ်ပါဝင်စေခြင်း မရှိအောင် အထူးဂရုပြုကြပါရန်နှင့် စားသုံးသူများနေအနှင့်လည်း သန့်ရှင်းလတ်ဆတ်သော စားသောက်ကုန်များကိုသာ အထူးဂရုပြု ဝယ်ယူစားသုံးကြရမည်ဖြစ်ပါသည်။*)

ကျန်းမာပျော်ရွှင်သော ဘဝများပိုင်ဆိုင်နိုင်ကြပါစေ။