Eat4Read

မိချမ်းဝေ
မစာဂဝတီပါ ဘုရား (သီလရှင်ဝတ္ထုတိုများ)
တန်ဖိုး- ၃၀၀၀ ကျပ်
မြန်မာပြည်တွင် သီလရှင်သာသနာထွန်းကားလျက် ရှိသည့်အနက် မော်လမြိုင်မြို့သည် သီလရှင် ဆရာလေးများ၏ သာသနာပြုလုပ်ငန်းအပေါ် အလွန်အားပေးသော မြို့ဖြစ်သည်။ အစိုးရစာမေးပွဲအပြင် အသင်းအပင်းစာမေးပွဲများလည်း ထွန်းကားစည်ပင်ရာမြို့ ဖြစ်သည်။ စာသင်တိုက်မှ ဆရာကြီး၊ ဆရာလေးများ မြို့ဖိတ်တောဖိတ် ဆန်ခံကြွလျှင် အလွန်ကြည်ညိုဖွယ်ကောင်းသည်။ မြို့သူမြို့သားများသည် သူတို့၏ သဒ္ဓါတရား များကို ဆရာလေးတို့၏လက်မှ ဆန်ကာခုံးငယ်လေးထဲသို့ မပြတ်သွန်ကျလာတတ်သည်။ နီပေါလ်နိုင်ငံမှ ပညာသင်ရောက်ရှိလာသော တစ်မြို့လုံးက မနီပေါလ်ဟု ချစ်စနိုးခေါ်ဆိုသည့် ဆရာလေး မသုဓမ္မဝတီ စာပေ ပရိယတ် လာရောက်ဆည်းပူး နေထိုင်ခဲ့ခြင်းကလည်း မြို့ကို ဂုဏ်တက်စေသော အကြောင်းတစ်ရပ် ဖြစ်ခဲ့သည်။ ဆရာလေး မသုဓမ္မဝတီပြီးနောက် အခြားနီပေါလ်ဆရာလေး သုံးပါးခန့်လည်း လာရောက်ပညာသင်ကြသေး၏။ စာသင်တိုက်သို့ ရောက်ရှိလာသော ဆရာလေးများသည် ကျင်လည်ရာ ဘဝအသီးသီးမှ ရောက်ရှိလာရသည်ဖြစ်ရာ နောက်ခံပန်းချီကားတစ်ချပ်စီကို ပိုင်ဆိုင်ထားသူများ ဖြစ်သည်။ သဒ္ဓါကြောင့် ရောက်လာသူ၊ ဘယာကြောင့် ရောက်လာသူ၊ ဘာကြောင့် ရောက်လာလာ စာသင်တိုက်ကြီးက လက်ကမ်းကြိုဆိုခဲ့သည်။ စာသင်တိုက်သို့ ရောက်ရှိလာသော လူမမယ်ကလေးငယ်တို့၏ အတွေ့အကြုံ၊ ခံစားချက်၊ အိုးစားခေါင်းဆောင်များနှင့် အစုအဖွဲ့ဝင် များရဲ့ ချစ်ခြင်းသဒ္ဓါ၊ ဆင့်ကမ်းမျှဝေစောင့်ရှောက်မှုများ၊ ဘဝအဖုံဖုံမှ ဒုက္ခအစုံစုံဖြင့် ရောက်လာသူများကို ကြိုဆိုလိုက်သော နွေးထွေးမှု၊ တဒင်္ဂဖြစ်စေ၊ ထာဝရဖြစ်စေ၊ ခိုနားသည့်အခိုက် အေးရိပ်သာယာဖြစ်စေသော သီလရှင်စာသင်တိုက်ကြီးများ မြန်မာပြည်တစ်နံတစ်လျားမှာ အများအပြား ရှိနေပေသည်။ ယခုဝတ္ထုတိုပေါင်းချုပ် တွင် သီလရှင်လောကမှ စာသင်တိုက်အတွေ့အကြုံလေးများကို ဆရာမ မိချမ်းဝေက စုံလင်စွာ ဖော်ပြထားပုံကို ဖတ်ရှုရမည် ဖြစ်ပေသည်။
မှာမှာယူနိုင်ပါပြီ။

မမနော်မာ ယင်းမာပင်ဘက် ရောက်ဖူးလား

အညာဒေသကို ချစ်လှပါတယ်ဆိုတဲ့ မမ
ဒီအရပ်မှာထွက်တဲ့ နေက အပူပိုကဲတာကို
ကြုံဖူးမှပဲ အသေချာ သိလိမ့်မယ်

ပေပင်ကုန်း ထန်းတောကုန်း ထနောင်းကုန်း
ကျနော်တို့ အညာသားတွေမှာ
မွေးရာပါ လူဖြစ်ရှုံးရပါတယ်
ဒါတွေအကုန်လုံးလည်း
ကြုံဖူးမှပဲ အသေချာ သိလိမ့်မယ်

မမနော်မာကို လာ ခေါ် ပြချင်တယ်
ကျောမွဲတွေ ကျောဘယ်လောက်မည်းကြောင်း
ကျွန်သက်ရှည်တဲ့ ကြက်သွန်တွေ အကြောင်း
ရက်လွန်နေတဲ့ ပဲငပိတွေ အကြောင်း
သောက်ကြောင်းမကောင်း ဘဝမှာ
ထထဆဲရကောင်းမှန်းတောင် မသိတဲ့
အညာသားလူလိမ္မာတွေ အကြောင်း
နောက်ပြီး ကျနော်တို့ ဘယ်လောက် ချစ်တတ်ကြောင်း

ကျောင်းတက်ရမယ့်အရွယ်မှာ သိုးကြောင်း ဆိတ်ကြောင်း
တိတ်တဆိတ်ပဲ အိုဟောင်းအသက်ကြီးပြီး
ကမ္ဘာကျော်အိပ်မက်ကြီးတွေ မက်ခွင့်မရဘဲ
ပြီးသွားတဲ့ ဘဝတွေ
အသားမဲမဲ သနပ်ခါးပဲကြားနဲ့ အညာသူမက
လူတွေအမြင်မှာ ဘယ်လောက်လှမယ်လို့
အထင်ခံရမလဲ
ဖြူဖြူစင်စင် ရိုးအတဲ့ ခပ်တုံးတုံးဘဝတွေ
မရချင်တော့ဘူး

မမနော်မာ မြင်ဖူးချင်တဲ့ လက်ပံပွင့်တွေလိုပဲ
စွန့်လွှတ်ရဲတဲ့ အညာသားတွေရဲ့ သွေးလည်း
ရဲ ပါ တယ်
သေနတ်နဲ့ အသေလိုက်ပစ်နေတဲ့ကောင်တွေကို
ခဲနဲ့ပြန်ပေါက်ဖို့ မကြောက်မလန့်
ပြေးတက်သွားတဲ့ ဘဲကြီးတွေ
အတောင့်လိုက်ဆွဲတဲ့ ဂန်းတွေကို
လက်လုပ်တူမီးနဲ့ ခံပစ်ရဲတဲ့ ကောင်တွေ
ရူးကြောင်ကြောင်သတ္တိခဲတွေပဲ

သေနတ်ဆိုတာ ကျည်တကယ်ထွက်သလား
သီတင်းကျွတ်မှာ ဖောက်တဲ့ ဗြောက်သံလောက်ပဲ
ကြားဖူးတဲ့ အညာသားတွေပါ
မုံရွာမှာ လူတွေ သေနေပြီတဲ့
၂၇ရက်နေ့မှာ လာသမျှ ရွာသပိတ်စစ်ကြောင်းတွေ
အကုန်ဖြိုခံရတုန်းက
ကျောပိုးလွယ်အိတ်တစ်လုံးနဲ့ ကော့တေးတစ်ပုလင်းကိုင်ပြီး
ရှေ့ဆုံးကပြေးတဲ့ကောင်လေးက ကျနော်ပါ
MAအစုတ်တွေက အဟုတ်သေတတ်မှန်း သိခဲ့မှ
ကျနော်တို့ ချစ်ရသူတွေမှာ အပေါက်တွေချည်းပဲ
အဲ့အပေါက်တွေကြောင့် တောက်တခေါက်ခေါက်နဲ့
ငိုနေရတယ်

မမနော်မာ လာရင် ဖိုးချမ်းလမ်းကိုလိုက်ပြမယ်
ယမားချောင်းတစ်ဖက်ကမ်းက
အလုံးလိုက်ပျောက်သွားတဲ့ ကြေးစင်တောင်ဘက်လည်း
လိုက်ပို့ပေးမယ်
အရှိုက်ကိုထိမယ့်တေးကွက် တီးဖို့ဆို
ဂစ်တာကို ကြိုးညှိတတ်ဖို့ မလိုမှန်း
မမနော်မာ အသေချာ သိသွားလိမ့်မယ်

တန်ဖိုးနည်း အညာသားတွေပါ
တကယ်သတ်ရဲလို့လည်း
တကယ်သေရဲခဲ့ကြပါပြီ
လူမဆန်တဲ့ကောင်တွေကို သတ်ဖို့
ဆန်ထွက်တဲ့ လယ်ကွက်တွေရောင်းပြီး
သေနတ်ဝယ်လိုက်တဲ့ ဦးကြီးတွေ
ယာတောထဲက ဒိုင်းနမိုက်တွေ
တဒိုင်းဒိုင်းနဲ့ မိုက်တဲ့ ဒိုင်းနမိုက်တွေပဲ

တန်ဖိုးနည်း အညာသားတွေပါ
ရဖြူဂျီဘဝနဲ့ ဘယ်နိုင်ငံကိုမှ ထွက်ပြေးခိုလုံခွင့်
ရမှာ မဟုတ်ဘူး
လွှတ်တော်အမတ်ဖြစ်ချင်လို့
သေနတ်ကိုင်နေတာလည်း မဟုတ်ဘူး
သောက်လုပ်ရှုပ်တဲ့
နိုင်ငံရေး​တွေလည်း နားမလည်ဘူး
နိုင်သလောက်နဲ့ ပြန်ခံချဖို့ကလွဲ ကျန်တာလည်း
စိတ်မဝင်စားဘူး
ဖိနှိပ်မှုကို ငုံ့မခံလိုလို့ အုံကြွတဲ့
သူပုန်လူတန်းစား စစ်စစ်

မမနော်မာ သိပ်ချစ်ပါတယ်ဆိုတဲ့
အညာဒေသမှာ အခုဆို ရွာတွေပစ်ပြီး ပြေးနေကြရပြီ
ရွာဦးဘုန်းကြီးကျောင်းမှာ စစ်တပ်က တပ်ဆွဲထားလို့
ဘယ်သူမှ ဆွမ်းမပို့ရဲတော့ဘူး
အိမ်အလုံးလိုက်တွေ မီးမြှိုက်ခံရ
ဆိုးလိုက်တဲ့ ဘဝ အခြေနေ
တန်ဖိုးနည်း အညာသားတွေပါ

ယာစောင့်တဲထဲက နွားကျောင်းသာလေး
ပစ်သတ်ခံရတာရော
ခင်တန်းဘက်က သေနတ်သံတွေ အကြောင်းရော
တမာပင်တွေ၊ ထန်းပင်တွေပေါ်က
လောင်ချာကျည်ရာတွေ အကြောင်းရော
နောက်ကနေတရစပ်လိုက်ပစ်လို့
ဖိနပ်ကျွတ်အောင် ပြေးခဲ့ရတဲ့ ကောင်တွေ အကြောင်းရော
ရွာထဲကို စစ်တပ်ဝင်မယ်ကြားတိုင်း
ပြေးလွှားနေကြရတဲ့
အညာကအဘွားကြီးတွေ အကြောင်းရော
ညည ကင်းပုန်းဝပ်ရတဲ့အခါ
မမနော်မာကို ချမ်းချမ်းစေးစေး
လွမ်းမိသေးတဲ့ အကြောင်းရော အစုံဗျာ
မမနော်မာ သဘောကျတဲ့ အညာဒေသမှာ
ဖြစ်ပျက်သမျှတွေကို ပြောပြဖို့
ဒီကဗျာ ရေးလိုက်ရပါတယ်

မမနော်မာ ယင်းမာပင်နယ်ဘက် ရောက်ဖူးလား
မေးကြည့်တော့ "ဟင့်အင်"တဲ့
အဆင်ပြေရင် ကျနော်မနေချင်တော့တဲ့အရပ်ကို
အလည်အပတ်ခေါ်ချင်တယ်ဗျာ
ကနီဘက်မှာလေကြောင်းနဲ့ပါ ပစ်တယ်တဲ့
ကျနော် သိပ်စိတ်ညစ်တာပဲ
ဘာပဲဖြစ်ဖြစ် မမနော်မာကို သိပ်ချစ်ကြောင်းပြောမယ့်
အညာသားလေး ကျနော်
လာအခေါ်ကို မျှော်နေပါ...။ ။

ဉာဏ်ဉာဏ်

ရည်ညွှန်း -
ဆရာဇေယျာလင်းရဲ့ "မမလီဆာ လိုင်ဇာရောက်ဖူးလား" နဲ့
"မမလာနာ လှိုင်သာယာရောက်ဖူးလား" ဆစ်ခ်
Credit to original uploader