Autumn Intel

Online မှတဆင့် စျေးရောင်းခြင်း ​ရဲ့ အသုံးဝင်မှုနဲ့ စိန်ခေါ်မှုများ

အခုလို COVID19ကာလမှာ ကျွန်မတို့ဖေ့စ်ဘုတ်အကောင့်ထဲမှာရှိတဲ့ မိတ်ဆွေသူငယ်ချင်းတော်တော်များများက pageကနေဖြစ်စေ၊ ကိုယ်ပိုင် အကောင့်များကနေ ဖြစ်စေ အွန်လိုင်းကနေအရောင်းအဝယ်လုပ်နေကြတာတွေ့ကြပါလိမ့်မယ်။ Social media platform တွေကိုကြည့်ရင်လည်း မြောက်မြားလှစွာသောစျေးရောင်းသူတွေကို အွန်လိုင်းမှာတွေ့နေရမှာပါ။

လူတော်တော်များများကလည်း အချိန်တော်တော်များများကို ဆိုရှယ်မီဒီယာတွေသုံးနေကြပြီး အွန်လိုင်းကနေပဲစျေးဝယ်နေကြတာလည်း အကျင့်တစ်ခုလို၊ ရည်ရွယ်ချက်တစ်ခုလိုဖြစ်နေကြပါတယ်။ ဒါ့အပြင် အရင်ကအပြင်မှာ offline ရောင်းနေတဲ့ ကုမ္ပဏီ၊ လုပ်ငန်းအများစုကလည်း အခုဆိုရင် အချိန်တိုတိုနဲ့လူတွေဆီ မြန်မြန်ရောက်မယ့် အမြတ်များများရနိုင်တဲ့ အွန်လိုင်းပေါ်မှာ ရင်းနှီးမြုပ်နှံဖို့ ဆုံးဖြတ်နေကြပါပြီ။

ဒါကြောင့်ဒီတစ်ခေါက်တော့ အွန်လိုင်းကနေစျေးရောင်းဖို့ စဉ်းစားနေသူတွေအတွက် သိထားဖို့လိုတဲ့ သူ့ရဲ့အသုံးဝင်မှုနဲ့ စိန်ခေါ်မှုတွေကို ဝေမျှချင်ပါတယ်။

💎 Online selling ရဲ့ အသုံးဝင်မှုတွေက ဘာတွေလဲ

👉 နယ်မြေကန့်သတ်တာကို လျှော့ချပေးတယ်
နိုင်ငံ၊ လူမျိုး၊ နေရာဒေသ မခွဲခြားဘဲ ကိုယ့်ရဲ့ကုန်ပစ္စည်းက ဖောက်သည်တွေရှိတဲ့နေရာတိုင်းကို ရောက်ရှိနိုင်ပါတယ်။

👉 အချိန်သတ်မှတ်ချက်မရှိဘူး
တစ်ပတ်မှာ ၇ရက်၊ တစ်ရက်မှာ ၂၄နာရီ အရောင်းအဝယ်လုပ်နိုင်ပြီး ဝယ်သူတွေရဲ့အိမ်ရှေ့အရောက်ပို့ဆောင်ပေးတဲ့ ဝန်ဆောင်မှုလည်းလုပ်ပေးနိုင်ပါတယ်။

👉 စျေးလျှော့ပေးပြီး ဆွဲဆောင်နိုင်တယ်
အွန်လိုင်းကနေ ကလစ်တစ်ချက်နှိပ်ရုံနဲ့ပြိုင်ဘက်တွေရဲ့ ရောင်းစျေးကိုသိနိုင်တဲ့အခါ အရောင်းမြှင့်တင်ရေးအစီအစဥ်တွေ၊ ၂ခုဝယ်၁ခုလက်ဆောင်စတဲ့ စျေးလျှော့ပေးတဲ့အစီအစဥ်တွေ၊ အခမဲ့ပို့ဆောင်ပေးတာ စတဲ့နည်းလမ်းတွေနဲ့ ဝယ်သူတွေကို ဆွဲဆောင်နိုင်တာလည်း အားသာချက်တစ်ခုပါပဲ။

👉 အချက်အလက်တွေ အမြန်ရှာပေးနိုင်တယ်
အရောင်းပေ့ချ်တွေမှာ လာကြည့်သူ ဘယ်နှစ်ယောက်ရှိပြီး အဲ့ဒီထဲကနေ ဘယ်နှစ်ယောက်က စိတ်ဝင်စားပြီးအမှန်တကယ်ဝယ်သွားသလဲ၊ အချိန်ဘယ်လောက်သုံးပြီးလေ့လာသွားသလဲ စတဲ့ဖောက်သည် တွေရဲ့အချက်အလက်တွေ (ကျား၊ မ အရေတွက်၊ အလုပ်ကိုင်၊ ပညာအရည်ချင်း၊ အသက် စတဲ့အသေးစိတ်အချက်များ) လည်းပါဝင်ပါတယ်။ ဝယ်သူစိတ်ဝင်စားတဲ့ကုန်ပစ္စည်းတွေအပြင်အပြုအမူတွေကိုပါ အလျင်မြန်ဆုံးရှာပေးနိုင်ပါတယ်။

👉 ကုန်ကျစရိတ်နည်းတယ်
ဝန်ထမ်းစရိတ်၊ မီတာခ၊ အခန်းငှားရမ်းခ စတာတွေလျော့နည်းသွားတဲ့အခါ အမြတ်ရာခိုင်နှုန်းတက်လာပါတယ်။

👉 အလုပ်တွေကို ပိုမိုမြန်ဆန်စေပြီး လွယ်ကူစေတယ်
ငွေတောင်းခံလွှာတွေ၊ အော်ဒါကောက်တာတွေ၊ ဖောက်သည်တွေကိုဆက်သွယ်တာကအစ အွန်လိုင်းကပဲလုပ်နေရတဲ့အတွက် ပိုမိုမြန်ဆန်စေပြီးအချိန်ကြန့်ကြာတာတွေလည်း လျှော့ချပေးပါတယ်။

ဘယ်လိုအကြောင်းအရာမဆို အားသာချက်၊ အားနည်းချက်တွေရှိသလို စိန်ခေါ်မှုတွေလည်း ရှိပါတယ်။

💎 Online selling ရဲ့ စိန်ခေါ်မှုတွေက ဘာတွေလည်း

👉 ပြိုင်ဆိုင်တာများတယ်
ဖောက်သည်တွေ တိုးလာနိုင်သလို ပြိုင်ဘက်တွေလည်းတိုးပွားလာနိုင်တယ်။ သူ့ထက်ငါအလုအယက်ဝယ်သူတွေကိုဆွဲဆောင်ရတဲ့အတွက် စျေးတွေလျှော့ပေးရပါတယ်။

👉 ထိတွေ့လို့မရဘူး
ကျွန်မတို့လည်းကြုံဖူးကြမှာပါ။ အွန်လိုင်းမှာပြထားတဲ့ပုံနဲ့ ရောက်လာတဲ့ကုန်ပစ္စည်း၊ အရောင်နဲ့ အရည်အသွေး တစ်ထပ်တည်းမကျတာမျိုးပေါ့။ အပြင်မှာလို ထိတွေ့စမ်းသပ်ကိုင်တွယ်ခွင့်မရှိတာကြောင့် ကုန်ပစ္စည်းအကြောင်းအသေးစိတ်ဖော်ပြမထားတဲ့အခါ များသောအားဖြင့် အွန်လိုင်းကဓာတ်ပုံကြည့်ပြီး ခန့်မှန်းပြီး ဝယ်ကြရတဲ့အခါ ဝယ်သူတွေရဲ့ စိတ်ကျေနပ်မှုအပြည့်မရကြပါဘူး။

👉 ကူညီပေးမယ့်သူမရှိဘူး
အခုအချိန်မှာတော့ မက်ဆင်ဂျာ၊ ချက်ဘောက်၊ အလိုအလျောက်ဖြေကြားပေးတဲ့စနစ်တွေကနေမေးလို့၊ ဖြေလို့ရနေပေမယ့် နည်းပညာအခက်အခဲ၊ အကြံဥာဏ်လှမ်းတောင်းတာ၊ အဝတ်အစားဝယ်တော့မယ်ဆိုရင် ကိုယ်နဲ့လိုက်ဖက်သင့်တော်တာရှိမရှိ စတဲ့အသေးစိတ်မေးမြန်းရာမှာ ပြန်လည်​ကူညီဖြေဖို့ အခက်အခဲရှိနိုင်ပါတယ်။

👉 မယုံကြည်ဘူး
ဝယ်သူ၊ ရောင်းသူ ငွေပေးချေတာကို ယုံကြည်မှုမရှိတာတွေဖြစ်နိုင်တာကြောင့် ဝယ်သူဘက်ကလည်းကြိုတင်ငွေကောက်ခံတာ၊ ရောင်းသူဘက်ကလည်း ကြိုမပေးချင်တာ စတဲ့သဘောထားကွဲလွဲမှုတွေရှိနိုင်ပါတယ်။ ဒါ့အပြင် ဝယ်သူဘက်ကလည်းမဝယ်ခင်မှာ အရင်ဝယ်ထားပြီးတဲ့သူတွေရဲ့ ကောင်းတာ၊ ဆိုးတာစတဲ့ အွန်လိုင်းအရောင်းစာမျက်နှာတွေပေါ်က သုံးသပ်ချက်၊ထောက်ခံချက် တွေကို ဆန်းစစ်တာတွေကို ကြည့်ရှုလေ့လာပြီးမှ ဝယ်တာတွေကိုတွေ့ရတဲ့အတွက် ဝယ်သူတွေရဲ့စိတ်ကျေနပ်မှုကို အပြင်မှာထက်ပိုပြီးအသေးစိတ်လေ့လာစောင့်ကြည့်ရပါတယ်။

👉 သယ်ယူပို့ဆောင်ရေးစရိတ်ကြောင့် စျေးများတယ်
ပစ္စည်းတစ်ခုရဲ့ရောင်းစျေးအပြင် သယ်ယူပို့ဆောင်စရိတ်တွေကို မြို့နယ်၊ နိုင်ငံ၊ နေရာဒေသအလိုက် ကျသင့်ငွေထပ်ဆောင်းပေးရတာအပြင် သယ်ယူပို့ဆောင်ရေးလုပ်ငန်းကြောင့် ကတိအတိုင်းအချိန်မှီမရောက်နိုင်တဲ့အခါ ဝယ်သူတွေနဲ့ပြဿနာတွေကို တိုက်ရိုက်ဖြေရှင်းရတာကလည်း အွန်လိုင်းကနေစျေးရောင်းနေရတာရဲ့ အကြီးစားစိန်ခေါ်မှုတစ်ရပ်ပါပဲ။

အပေါ်ကအချက်တွေကြောင့် အောင်မြင်နေတဲ့အွန်လိုင်းစျေးရောင်းတဲ့လုပ်ငန်းတွေရှိသလို ရပ်သွားရတဲ့လုပ်ငန်းတွေလည်း အများကြီးရှိနေပါတယ်။ ဒီနေ့မှာတော့ ဆိုရှယ်မီဒီယာတွေ၊ လုပ်ငန်းတွေရဲ့ ကိုယ်ပိုင် web page ၊ application တွေအသုံးပြုပြီးစျေးရောင်းနေတဲ့လုပ်ငန်းတွေဟာ အင်အားကြီးမားလာပြီးတစ်နေ့တစ်ခြားဖွံ့ဖြိုးလာနေပါတယ်။ ဒီလိုလုပ်ငန်းတွေ အောင်မြင်လာဖို့အတွက် စျေးကွက်ဖော်ဆောင်ရေး မဟာဗျူဟာနဲ့ အရောင်းမြှင့်တင်ရေးနည်းပညာတို့ကိုပါ ထည့်သွင်းအသုံးပြုရမှာဖြစ်ပါတယ်။

ဒါဆိုရင် online selling လုပ်တဲ့အခါ သူ့ရဲ့အားသာချက် အားနည်းချက်တွေသိရပြီဆိုတော့ အခုလက်ရှိ online shop လုပ်နေတဲ့သူတွေရော ဘယ်လိုအချက်တွေနဲ့ရင်ဆိုင်ခဲ့ရတယ်ဆိုတာ comment မှာ အတွေ့အကြုံတွေမျှဝေခဲ့ပါဦးနော်

Awnnnnnn...... it’s so sweet!!!!
Our heart melt!!!!! 😍😍😍😍

Happy Valentine’s Day to you alll!!!!❤️🧡💛💚💙💜

👊🏼