Zvezda Book Shop

လမ်း
_______

အဲဒီတုန်းက
ပျံသန်းဖို့ရာ ကောင်းကင်တခုမရှိတဲ့ ငှက်တကောင်လို
ငါတို့မွေးဖွားလာခဲ့ကြတုန်းက ။

နာဆာလိုဟာမျိုး တခုခုသာရှိကြည့်
စထရီကာခွေးတကောင်လို
ကမ္ဘာပတ်လမ်းထဲ လမင်းလည်းထိုးဟောင်ရဲပါရဲ့လို့
ဒို့အတူ လောင်ကျွမ်းခဲ့ကြတုန်းက ။

တယောက်သွေးကြောထဲ
တယောက်စီးဝင်ပြီး စီးဆင်နေသလို
ဒို့အတူထားခဲ့ကြတဲ့ကတိတွေ အမြီးအမြီးချင်းချည်လို့
ငါတို့လွှတ်တင်ထားတဲ့ ဂြိုလ်တုက ငါတို့ကိုစောင့်ကြည့်နေသလို
ဒို့အတူဆွဲခဲ့တဲ့ လမ်းပြမြေပုံကြား
တချက်အမှားမခံဘဲ အသက်အောင့်စောင့်ခဲ့ရတုန်းက ။

မြေဆွဲအား သုည
ပါးလျလေထု
အသက်လုရှုနေရတဲ့ ဂြိုလ်သစ်တစင်းပေါ်
ငါတို့စပြီး ခြေချမိကြတုန်းက ။

တနေ့တော့ နေရောင်ရမှာဘဲ
တနေ့တော့ ရေညှိတွေဖြစ်ဖြစ်ပေါက်လာရမှာဘဲ
တနေ့တော့ အောက်စီဂျင်ရရမှာဘဲ
ငါတို့နေရောင်ကို အတူစောင့်ခဲ့ကြတုန်းက ။

ပြီးတော့
ငါတို့ဆက်ပြီး အသက်ရှင်ခဲ့ကြတုန်းက ။

#ကိုသန်းထွန်း