Future The DAGON

လွမ်းမိသောနေ့ရက်များ

မနက်အစော Tuto ရှိလို့ကျောင်းလာတဲ့အခါ
နှင်းတွေကိုဖြတ်လာတဲ့ ဆောင်းတွင်းရဲ့
လေနုအေးလေးတွေကို ခံစားမိနေတုန်းပဲ
ပြီးတော့လက်ထဲကိုင်ထားတဲ့ စက္ကူခွက်ထဲက ကော်ဖီနံ့လေးရယ်
အဆောင်နားရောက်တော့ အဆောင်ဘေးက အသုပ်ဆိုင်က သင်္ဘောသီးထောင်းအနံ့လေးကလည်း
ဗိုက်ဆာအောင်ဆွဲဆောင်ရင် ဆွဲဆောင်နေမှာပေါ့
အခန်းနားရောက်တော့ လူစုံရင်စကားများတော့မယ်
သူငယ်ချင်းတွေရဲ့စာကျက်သံတွေ
လူစုံပြီဆိုတာနဲ့ ရောက်တက်ရာရာပြောကျတော့မယ်လေ
Tuto ပြီးလို့ canteen သွားဖို့အောက်ဆင်းတဲ့အခါ
ရေစင်ဘေးက လှေကားထစ်လေးမှာ ရေဖြည့်တဲ့ကျောင်းသားတွေ မုန့်ဝယ်တဲ့‌ကျောင်းသားတွေ
အတက်အဆင်လုပ်တဲ့ကျောင်းသားတွေနဲ့ စည်ကားလို့
Canteen ရောက်တော့လည်း ဝိုင်းအပြည့်နီးပါး
ကိုယ့်အဖွဲ့နဲ့ကိုယ် ‌စကားပြောနေကျတဲ့ကျောင်းသားတွေ
ဘာသောကမှမရှိဘဲနဲ့ပေါ့
အတန်းပြန်တက်တော့လည်း တချို့ကရှေ့ဆုံးတန်းကနေမသိမသာစကားများ တချို့ကျအလယ်တန်းကနေမုန့်ခို့စား
တချို့ကျနောက်ဆုံးတန်းကနေပေါက်ကရတွေလုပ်ရင်း
စာလိုက်မှတ်ကျတာပေါ့
ဒီလိုနဲ့ အတန်းချိန်တွေပြီးသွားတဲ့အခါ
ကားဝန်းထဲကိုသွားတဲ့လမ်းမှာ အိမ်ပြန်တဲ့လူတွေနဲ့ရှုပ်ရှတ်ခပ်လို့ အိမ်မပြန်သေးဘဲ Canteen ထပ်ထိုင်တဲ့လူတွေ အတန်းထဲမှာပဲစကားထိုင်ပြောကျတဲ့ ကျောင်းသားတွေလည်းရှိတာပဲ
အဲ့အချိန်ထိကျွန်တော်တို့ပျော်ခဲ့ကျပါတယ်

ဒီနေ့ကျောင်းသွားတက်မယ် ပျော်စရာတွေဖန်တီးမယ်
အိမ်ပြန်သွားမယ် နောက်နေ့လည်းဒီအတိုင်းပဲဆက်ဖြစ်ဦးမှာပဲ
အခုတော့အဲ့အချိန်တွေက မနီးမဝေးတဲ့ အတိတ်မှာကျန်ခဲ့ပါပြီ
ကျောင်းနဲ့အချိန်အတိုင်းအတာတစ်ခုအထိဝေးခဲ့ပြီဆိုပေမယ့်
တစ်ချက်တစ်ချက်တော့လည်း မနက်နိုးရင်
လွယ်အိတ်လေးလွယ်ပြီးကျောင်းသွားတက်ရမယ်ထင်နေတုန်းပဲ

ဒဂုံတက္ကသိုလ်ကျောင်းသားများသမဂ္ဂ ဗဟိုအလုပ်အမှုဆောင်

မဝတ်ရည်အောင်
(၂၀၀၀- ၂၀၂၅)

၂၀၀၀ပြည့်နှစ်၊ ဇန်နဝါရီလ ၂၇ ရက်တွင် အဖ ဦးသန်းမောင် (ကွယ်လွန်) ၊ အမိ ဒေါ်လှလှအေးတို့မှ ရန်ကုန်မြို့၌ မွေးဖွားသည်။

မွေးချင်း ငါးဦးအနက် အငယ်ဆုံးသမီး ဖြစ်သည်။ ငယ်မည် မီးမီး၊အပြုံး။

အ.ထ.က.(သုဝဏ္ဏ) တွင် ဆယ်တန်းအောင်မြင်ပြီး ၂၀၁၇ ခုနှစ်တွင် ဒဂုံတက္ကသိုလ်၌ သတ္တဗေဒဘာသာရပ်အထူးပြုဖြင့် ပညာသင်ယူခဲ့သည်။

၂၀၁၈ ခုနှစ်တွင် Unity & Progress ဒဂုံတက္ကသိုလ် ကျောင်းသားအစည်းအရုံးသို့ ဝင်ရောက်ခဲ့သည်။ဒဂုံတက္ကသိုလ် Cheer leaders အဖွဲ့တွင်လည်းပါဝင်ခဲ့သည်။ ထို့နောက် ဒဂုံတက္ကသိုလ်ကျောင်းသားများသမဂ္ဂသို့ဝင်ရောက်ပြီး ကျောင်းသားအရေးကိစ္စများတွင် တက်တက်ကြွကြွ ဆောင်ရွက်ခဲ့သည်။

၂၀၂၀ ပြည့်နှစ်တွင် ဒဂုံတက္ကသိုလ်ကျောင်းသားများသမဂ္ဂ ရွေးကောက်ပွဲကို Unity & Progress ကျောင်းသားများအစည်းအရုံး ကိုယ်စားပြု၍ ဝင်ရောက်ယှဉ်ပြိုင်ကာ အနိုင်ရရှိခဲ့သည်။

ဒဂုံတက္ကသိုလ်ကျောင်းသားများသမဂ္ဂ ဗဟိုအလုပ်အမှုဆောင်အဖွဲ့ဝင်၊ တွဲဖက်အတွင်းရေးမှူး အဖြစ်ဆောင်ရွက်ခဲ့သည်။

၂၀၂၀ပြည့်နှစ် ကိုဗစ်ကပ်ရောဂါကာလအတွင်း ရောဂါထိန်းချုပ်၊ကုသရေးအတွက် Quaratine Center များတွင် စေတနာ့ဝန်ထမ်းအဖြစ် ထမ်းဆောင်ခဲ့သည်။ ရန်ကုန်မြို့တွင်သာမက ရခိုင်ပြည်နယ်အထိသွားရောက်၍ စေတနာ့ဝန်ထမ်းအဖြစ် ဆောင်ရွက်ခဲ့သည်။

၂၀၂၁ စစ်အာဏာသိမ်းပြီးနောက် ဒဂုံတက္ကသိုလ်ကျောင်းသားများသမဂ္ဂနှင့်အတူ စစ်အာဏာရှင်ဆန့်ကျင်ရေးလှုပ်ရှားမှုများတွင် တက်တက်ကြွကြွ ပါဝင်လှုပ်ရှားခဲ့သည်။

၂၀၂၁ ခုနှစ်၊ စက်တင်ဘာလ ၁၄ ရက်တွင် ဒဂုံတက္ကသိုလ်ကျောင်းသားများသမဂ္ဂ ရဲဘော် ၅ဦးနှင့်အတူ စစ်တပ်၏ ဖမ်းဆီးခြင်းခံရသည်။ စစ်ကြောရေး၏ ပြင်းထန်သော နှိပ်စက်မှုများကြောင့် ဖမ်းဆီးခံရပြီး သုံးလအကြာတွင် လေဖြန်းဝေဒနါခံစားရသည်။

၂၀၂၂ ခုနှစ်၊ မတ်လ ၁၀ ရက်တွင် ပုဒ်မ ၅၀၅(က) ဖြင့် ထောင်ဒဏ် သုံးနှစ် ချမှတ်ခံရသည်။ ဧပြီလတွင် ဒိုက်ဦးအကျဉ်းထောင်သို့ ပြောင်းရွှေ့ခံရသည်။ ထို့နောက် ကျန်းမာရေးဆိုးရွားလာသဖြင့် အင်းစိန်ထောင်သို့ ပြန်လည်ပြောင်းရွှေ့ခံရသည်။

၂၀၂၃ ခုနှစ်၊ ဇွန်လ ၂၇ ရက်နေ့တွင် ပုဒ်မ ၅၂(က) ဖြင့် ထောင်ဒဏ် ၄နှစ်ချမှတ်ခံရရာ စုစုပေါင်း ထောင်ဒဏ် ၇နှစ်ဖြစ်လာသည်။

အင်းစိန်အကျဉ်းထောင်အတွင်း ဆိုးရွားသော အကျဉ်းထောင်စနစ်များကြောင့် ဆေးကုသမှူလုံလောက်စွာမရရှိဘဲ ဒဏ်ရာအခံကြောင့် မကြာခဏတက်ခြင်း၊ သတိလစ်ခြင်း ၊ နှလုံးရပ်ခြင်းများ ဖြစ်ပွားခဲ့သည်။

၂၀၂၅ ခုနှစ်၊ ဇူလိုင်လ ၂၀ ရက် နံနက် (၃) နာရီတွင် အင်းစိန်အကျဉ်းထောင်အတွင်း၌ ကျဆုံးခဲ့သည်။

#မဝတ်ရည်အောင်_အတ္ထုပ္ပတ္တိအကျဉ်း

❐ စစ်ကြောရေးအတွင်း နှိပ်စက်ဒဏ်ရာများဖြင့် ဒဂုံတက္ကသိုလ်ကျောင်းသားများသမဂ္ဂ အလုပ်အမှုဆောင် မဝတ်ရည်အောင် ထောင်တွင်း၌ ကျဆုံး။

‌ဇူလိုင် ၂၀၊ ၂၀၂၅။

ဒဂုံတက္ကသိုလ်ကျောင်းသားသမဂ္ဂ ဗဟိုအလုပ်အမှုဆောင် မ၀တ်ရည်အောင်သည် စစ်ကြောရေးအတွင်း စစ်ကောင်စီတပ်၏ နှိပ်စက်ဒဏ်ရာများကြောင့် လေးနှစ်နီးပါးအကြာ၌ အကျဉ်းထောင်တွင်း ကျဆုံးသွားခဲ့ပြီဖြစ်သည်။

မ၀တ်ရည်အောင်သည် ၂၀၂၁ ခုနှစ်၊ စက်တင်ဘာလ ၁၄ ရက်တွင် ဖမ်းဆီးခံရပြီး မတရား ပုဒ်မ ၅၀၅ (က) ဖြင့် ထောင်ဒဏ် (၃) နှစ်၊ ပုဒ်မ ၅၂ (က) ဖြင့် ထောင်ဒဏ် (၄) နှစ် ချမှတ်ခံထားရပြီး စစ်ကြောရေးအတွင်းလည်း ပြင်းထန်စွာ နှိပ်စက်ခံခဲ့ရသည်။

၂၀၂၂၊ ဧပြီလ (၂၄) ရက်နေ့တွင် အင်းစိန်ထောင်မှ ဒိုက်ဦးထောင်သို့လည်းကောင်း၊ ၂၀၂၂ခုနှစ် အောက်တိုဘာလ (၂၄) ရက်နေ့တွင် ဒိုက်ဦးထောင်မှ အင်းစိန်ထောင်သို့ လည်းကောင်း ရွှေ့ပြောင်းခံခဲ့ရသည်။

ဒိုက်ဦးထောင်မှ အင်းစိန်‌ထောင်သို့ ပြောင်းရွှေ့ခံရပြီးနောက် စစ်ကြောရေးတွင်း နှိပ်စက်ခံရသည့် ဒဏ်ရာများကြောင့် ဦးနှောင်အကျိတ်တည်ဒဏ်ရာဖြင့် (၂၂) နာရီကြာခန့် သတိလစ်သွားခဲ့သေးသည်။

ထို့နောက် မဝတ်ရည်အောင်ကို အင်းစိန်ဆေးရုံကြီးသို့ ပို့ဆောင်ကာ ကုသခဲ့သော်လည်း ဒဏ်ရာအခံကြောင့် မကြာခဏ တက်ခြင်း၊ သတိလစ်ခြင်း၊ နှလုံးရပ်ခြင်းများ ဖြစ်ပေါ်ကာ အရေးပေါ်အခြေအနေအထိ ဖြစ်ပေါ်ခံစားခဲ့ရသည်။

ထို့နောက် ယ‌နေ့ ဇူလိုင်လ (၂၀) ရက်တွင် အဆိုပါ‌ဒဏ်ရာများဖြင့်ပင် အင်းစိန်ထောင်တွင်း၌ ကျဆုံးသွားပြီဖြစ်ကြောင်း နီးစပ်သူများက အတည်ပြုထားပြီး မဝတ်ရည်အောင်သည် ကျဆုံးချိန်တွင် အသက် (၂၅) နှစ်သာ ရှိသေးသည်။

- မင်းဘုန်း (စာတည်း - မောင်ဘိုး)

#စစ်ကြောရေးအတွင်းနှိပ်စက်ဒဏ်ရာများ #မဝတ်ရည်အောင် #ဒဂုံတက္ကသိုလ်ကျောင်းသားများသမဂ္ဂ #အလုပ်အမှုဆောင် #မဝတ်ရည်အောင် #ထောင်တွင်းကျဆုံး
#ဆီသို့

-----