Connect Burma

အားလုံးပါဝင်မှုမရှိတဲ့ တဖက်သတ် နိုင်ငံရေးလုပ်ငန်းစဉ်တွေကို အသိအမှတ်မပြုဖို့ အာဆီယံကို NUGတိုက်တွန်း

Connect Burma | မေ ၁၂

မြန်မာ့အရေးနဲ့ ပက်သက်ပြီး အာဆီယံရဲ့ မူဝါဒစံနှုန်းတွေနဲ့ မကိုက်ညီဘဲ အားလုံးပါဝင်မှုမရှိတဲ့ တဖက်သတ် နိုင်ငံရေးလုပ်ငန်းစဉ်တွေကို အသိအမှတ်မပြုဖို့ အမျိုးသားညီညွတ်ရေးအစိုးရ (NUG)က အာဆီယံကို တိုက်တွန်းလိုက်ပါတယ်။

ဒီကနေ့ ထုတ်ပြန်တဲ့ အမျိုးသားညီညွတ်ရေးအစိုးရ (NUG)ရဲ့ အာဆီယံထိပ်သီးအစည်းအဝေးဆိုင်ရာနဲ့ ဘုံသဘောတူညီချက် ၅ရပ် အကောင်အထည်ဖော်မှုနဲ့ ပက်သက်တဲ့ ထုတ်ပြန်ချက်မှာ အခုလို ထည့်သွင်းတိုက်တွန်းလိုက်တာ ဖြစ်ပါတယ်။

အာဏာသိမ်းစစ်အုပ်စုရဲ့ တဖက်သတ်ရွေးကောက်ပွဲ လုပ်ငန်းစဉ်တွေ ပြီးစီးသွားတဲ့အပေါ် အာဆီယံ ထိပ်သီးအစည်းအဝေးရဲ့ အသိအမှတ်ပြုမှုကို NUGအစိုးရအနေနဲ့ သတိပြုမိပြီး ပဋိပက္ခတွေဆက်ဖြစ်နေချိန်၊ နိုင်ငံရေးအကျဉ်းသားအားလုံးမလွတ်မြောက်သေးချိန်နဲ့ သင့်လျော်တဲ့ နိုင်ငံရေးအခင်းအကျင်းမရှိချိန်မှာ ပြုလုပ်တဲ့ ရွေးကောက်ပွဲဟာ ဒီမိုကရေစီနည်းကျတရားဝင်မှုနဲ့ ပြည်သူလူထုကို ကိုယ်စားပြုမှု မရှိဘူးလို့ NUGက ဆိုပါတယ်။

အာဆီယံရဲ့ ကိုယ်ပိုင်မူဝါဒစံနှုန်းတွေအရ နိုင်ငံရေးလုပ်ငန်းစဉ်တွေဟာ အားလုံးပါဝင်နိုင်ရမှာဖြစ်ပြီး ယုံကြည်စိတ်ချရမှုလည်း ရှိဖို့လိုအပ်တယ်လို့ ဆိုပါတယ်။

အဲ့ဒီစံနှုန်းတွေနဲ့ ကိုက်ညီမှုမရှိတဲ့ တဖက်သတ်နိုင်ငံရေးလုပ်ငန်းစဉ်တွေကို အသိအမှတ်မပြုဖို့ အာဆီယံကို တိုက်တွန်းကြောင်း NUGအစိုးရရဲ့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် ခွဲခြားမှုမရှိဘဲ အကြမ်းဖက်နေတာတွေ ချက်ချင်းရပ်တန့်ဖို့နဲ့ အစွမ်းကုန်ထိန်းသိမ်းလုပ်ဆောင်သွားဖို့ အာဆီယံထိပ်သီးအစည်းအဝေးကနေ သက်ဆိုင်ရာအဖွဲ့အစည်းတွေဆီ တိုက်တွန်းခဲ့တာကို ကြိုဆိုတယ်လို့လည်း NUGက ဆိုပါတယ်။

ဒါတွေကို ရပ်တန့်ဖို့အတွက်က အာဆီယံအနေနဲ့ ရှင်းလင်းပြတ်သားပြီး အချိန်ကာလတိကျတဲ့ စံသတ်မှတ်ချက် ချမှတ်ပေးဖို့ လိုအပ်တယ်လို့လည်း NUGထောက်ပြထားပါတယ်။

မြန်မာနိုင်ငံရဲ့ နိုင်ငံရေးအကြပ်အတည်းကို ဖြေရှင်းတဲ့နေရာမှာ အာဆီယံရဲ့ ဘုံသဘောတူညီချက် ၅ရပ်က အဓိကမူဘောင်အဖြစ် ဆက်လက်တည်ရှိနေတယ်ဆိုတာကို အာဆီယံထိပ်သီးအစည်းအဝေးက ထပ်လောင်းအတည်ပြုခဲ့ပြီး ဒီလိုအတည်ပြုမှုကို ထောက်ခံကြောင်းလည်း ‌NUGအစိုးရရဲ့ ထုတ်ပြန်ချက်မှာ ဖော်ပြထားပါတယ်။

အာဆီယံအနေနဲ့က သမ္မတတာဝန်ယူထားတဲ့ စစ်ခေါင်းဆောင် မင်းအောင်လှိုင်ကို အသိအမှတ်မပြုတဲ့အတွက် ပြီးခဲ့တဲ့ ၄၈ကြိမ်မြောက် အာဆီယံထိပ်သီးအစည်းအဝေးကို စစ်အုပ်စုအစိုးရ နိုင်ငံခြားရေးဝန်ကြီးဌာနရဲ့ အမြဲတမ်းအတွင်းဝန်ကိုသာ တက်ရောက်ခွင့်ပေးခဲ့ပါတယ်။

မင်းအောင်လှိုင်အစိုးရရဲ့ နိုင်ငံခြားရေးဝန်ကြီးဌာနကတော့ အာဆီယံက သူတို့ကို ခွဲခြားဆက်ဆံနေတယ်ဆိုပြီး ထုတ်ပြန်ချက်တစောင် ထုတ်ပြန်ခဲ့ပါတယ်။

အာဆီယံက မြန်မာနိုင်ငံကို ခွဲခြားဆက်ဆံနေတယ်လို့ စစ်အုပ်စု နိုင်ငံခြားရေးဝန်ကြီးဌာန ညည်းတွား

Connect Burma | မေ ၁၁

အာဆီယံအဖွဲ့ဝင်နိုင်ငံထဲက တချို့က မြန်မာကို ကိုယ်စားပြုမှုမပေးဘဲ ခွဲခြားဆက်ဆံနေတယ်လို့ အာဏာသိမ်းစစ်အုပ်စုရဲ့ အရပ်သားအသွင်ပြောင်း မင်းအောင်လှိုင်အစိုးရ နိုင်ငံခြားရေးဝန်ကြီးဌာနက ထုတ်ပြန်လာပါတယ်။

အာဆီယံအဖွဲ့ဝင် နိုင်ငံတချို့ဟာ မြန်မာအစိုးရအပေါ် ကန့်သတ်မှုတာ၊ ခွဲခြားဆက်ဆံမှုများ၊ တန်းတူ ကိုယ်စားပြုမှုကို ချန်လှပ်ထားတာတွေ ဆက်လက်ပြုလုပ်ဖို့ ကြိုးပမ်းနေပြီး အာဆီယံ ပဋိညာဉ်စာတမ်းအခြေခံမူတွေကို ဖောက်ဖျက်ကာ ပြည်တွင်းရေးကို ဝင်ရောက်စွက်ဖက်တာနဲ့ ဖိအားပေးတာတွေ လုပ်နေတယ်လို့ မင်းအောင်လှိုင်အစိုးရ နိုင်ငံခြားရေးဝန်ကြီးဌာနကဆိုပါတယ်။

အဆိုပါ ထုတ်ပြန်ချက်ထဲမှာဘဲ စစ်တပ်က အာဏာသိမ်းခဲ့တာဟာ အရင် အရပ်သားအစိုးရလက်ထက် ရွေးကောက်ပွဲမှာ မဲမသမာမှုတွေ လုပ်ခဲ့လို့ အာဏာသိမ်းခဲ့ရကြောင်းလည်း ထပ်မံ အကြောင်းပြချက်ပေးထားတာ တွေ့ရပါတယ်။

စစ်တပ်က အာဏာသိမ်းပြီ ၅နှစ်တာကာလအတွင်းမှာ အာဆီယံရဲ့ ခွဲခြားဆက်ဆံမှုတွေကို စိတ်ရှည်သည်ခံပြီး ပူးပေါင်းဆောင်ရွက်ခဲ့တယ်လို့လည်း ဖော်ပြထားပါတယ်။

အရပ်သားအသွင်ပြောင်း စစ်ခေါင်းဆောင် မင်းအောင်လှိုင်အစိုးရကို ပြည်သူတွေက မဲပေးခဲ့တာကြောင့် အာဆီယံရဲ့ အပြုသဘောမဆောင်တဲ့ ခွဲခြားဆက်ဆံမှုတွေဟာ မြန်မာပြည်သူတွေရဲ့ ဆန္ဒသဘောထားတွေကို လျစ်လျူရှုရာရောက်တယ်လို့ မင်းအောင်လှိုင်အစိုးရ နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်မှာ ဖော်ပြထားပါတယ်။

အာဆီယံအဖွဲ့ဝင်နိုင်ငံတချို့ရဲ့ ခေါင်းဆောင်တွေကတော့ စစ်တပ်အာဏာသိမ်းမှုကြောင့် ဖြစ်ပေါ်လာတဲ့ မြန်မာ့အရေး အကြပ်အတည်း ပဋိပက္ခ တွေဟာ တိုးတက်မှုရှိမလာဘဲလူချင်းစာနာမှုဆိုင်ရာ ဘေးဒုက္ခတွေလည်း အခြေအနေပိုမိုဆိုးရွားလာနေတယ်လို့ ပြောဆိုထားပါတယ်။

အာဏာသိမ်းပြီးနောက် အာဆီယံက ထုတ်ပြန်ခဲ့တဲ့ ဘုံသဘောတူညီချက် ၅ချက်ကို မြန်မာစစ်အုပ်စုက လိုက်နာမယ်လို့ ဂတိပေးထားပေမယ့် ဒီကနေ့အချိန်အထိ ဒီကနေ့အချိန်အထိ ဆောင်ရွက်တာမရှိဘူးလို့လည်း အာဆီယံခေါင်းဆောင်တွေက ပြောပါတယ်။

ဖိလစ်ပိုင်နိုင်ငံ ဆီဘူး မြို့မှာ ကျင်းပတဲ့ ပြီးခဲ့တဲ့ အာဆီယံထိပ်သီးအစည်းအဝေး မှာ မြန်မာနိုင်ငံကိုယ်စားပြုတက်ရောက်မှုအတွက် သမ္မတတာဝန်ယူထားတဲ့ မင်းအောင်လှိုင်ကို တက်ရောက်ခွင့်မပေးခဲ့ဘဲ နိုင်ငံခြားရေးဝန်ကြီးဌာန အမြဲတမ်းအတွင်းဝန် ဦးဟော်ခန်းဆွမ်သာ တက်ရောက်ခွင့်ရခဲ့ပါတယ်။

အာဏာသိမ်းစစ်တပ်က ဦးဆောင်ပြုလုပ်တဲ့ ၂၀၂၆ရွေးကောက်ပွဲပြီးတဲ့နောက်မှာ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က သမ္မတဖြစ်လာပြီး အရပ်သားအသွင် အစိုးရတရပ်ဖန်တီးခဲ့ပေမယ့် ကမ္ဘာကုလသမဂ္ဂ နဲ့ အာဆီယံအပါအဝင် နိုင်ငံတကာက အသိအမှတ်မပြုခဲ့ဘူး။

မြန်မာ နိုင်ငံမှာ ကာလရှည်ကြာဖြစ်ပွားနေတဲ့ အကျပ်အတည်းတွေဟာ တိုးတက်မှု မရှိဘဲ လူချင်းစာနာမှုဆိုင်ရာ ဘေးဒုက္ခတွေဟာလည်း အခြေအနေပိုမိုဆိုးရွားလာကြောင်း အာဆီယံ ထိပ်သီးအစည်းအဝေး အပြီးမှာအဖွဲ့ ဝင်နိုင်ငံတချိုု့ရဲ့ ခေါင်းဆောင်တွေက ပြောကြားခဲ့ပါတယ်။
အခုလို ပြောဆိုမှုတွေ ရှိလာပြီးနောက်ပိုင်းမှာ စစ်အုပ်စု ထုတ်ပြန်ချက်ထုတ်ကာ ကန့်ကွက်ခဲ့တာဖြစ်ပါတယ်။

၂၀၂၁ ခုနှစ် စစ်အာဏာသိမ်းမှုနောက်ပိုင်း မြန်မာ့အရေး ဖြေရှင်းရာမှာ တိုးတက်မှု အလွန်နှေးကွေးနေ တဲ့ အပေါ် အာဆီယံ ခေါင်းဆောင်တွေ စိတ်ပျက်နေကြောင်း အာဆီယံ အလှည့်ကျ ဥက္ကဌ ဖိလစ်ပိုင် နိုင်ငံရဲ့ သမ္မတ ဖာဒီနန် မားကို့စ် ဂျူနီယာက သောကြာနေ့မှာ ပြောကြားခဲ့ပါတယ်။

(၄၈) ကြိမ်မြောက် အာဆီယံထိပ်သီးအစည်းအဝေးနှင့် ဆက်စပ်အစည်းအဝေးတွေ ကျင်းပြီးနောက် ပြုလုပ်တဲ့ သတင်းစာရှင်းလင်းပွဲမှာ အာဆီယံ အလှည့်ကျ ဥက္ကဌ ဖိလစ်ပိုင် သမ္မတ က အခုလို ပြောကြားခဲ့တာဖြစ်ပါတယ်။

မြန်မာ အကျပ်အတည်းဟာ နှစ်ကာလ ရှည်ကြာမဖြေရှင်းနိုင်တဲ့ အပြင် ဆူးညှောင့် သဖွယ်ဖြစ်လာတယ်လို့ လည်း သူ ကပြောဆိုခဲ့ပါတယ်။

"ကျွန်တော်တို့ လုံလောက်အောင် မလုပ်ခဲ့ဘူးလို့တော့ မယုံကြည်ပါဘူး။ ကျွန်တော်တို့ ဘာတွေ ထပ်လုပ်နိုင်သေးလဲ ဆိုတာမေးခွန်းထုတ်ရပါမယ်။ ကျွန်တော်တို့ ဆွေးနွေးပွဲတွေကိုလည်း အဲဒီဘက်ကိုပဲ ဦးတည်ခဲ့ပါတယ်။ ရှေ့ကို ဆက်မတိုးတဲ့အတွက် ကျွန်တော်တို့ ဘာတွေ ထပ်လုပ်နိုင်မလဲဆိုတာကိုပဲ ဆွေးနွေးခဲ့ကြတာပါ" လို့ ဖိလစ်ပိုင် သမ္မတ က သတင်းစာရှင်းလင်းပွဲမှာပြောကြားခဲ့ပါတယ်။

မြန်မာ အကျပ်အတည်းဖြေရှင်းရေး တိုးတက်မှု မရှိတာကို အာဆီယံ အဖွဲ့ဝင်နိုင်ငံတွေ အနေနဲ့ အလွန် အမင်း စိတ်ပျက်ရတယ်လို့ လည်း သူကပြောပါတယ်။

စစ်အုပ်စုတပ်က မင်းပြား နဲ့ ကျောက်တော်မြို့နယ် တွေကို တစ်ရက်တည်း နှစ်ကြိမ်ဗုံးကြဲတိုက်ခိုက်

Connect Burma၊ မေ ၉

စစ်အုပ်စုတပ်က ရခိုင်ပြည်၊ မင်းပြား နဲ့ ကျောက်တော်မြို့နယ် တွေကို မေလ ၇ ရက်နေ့ တစ်ရက်တည်း နှစ်ကြိမ်ဗုံးကြဲတိုက်ခိုက် ခဲ့တယ်လို့ အာရက္ခတပ်တော် AA က ထုတ်ပြန်ပါတယ်။

ရခိုင်ပြည်၊ မင်းပြားမြို့နယ်၊ ကျောက်ခုတ်ကျေးရွာ အရှေ့တောင်ဖက်ရှိ ကင်းမွန်ချောင်းဂျိုင် နဲ့ အနီးပတ်ဝန်းကျင်ကျေးရွာတွေကို မေလ (၇) ရက်၊ နေ့လည် (၂) နာရီ (၁၅) မိနစ်အချိန်ခန့် မှာ စစ်အုပ်စုတပ်က ဂျက်ဖိုက်တာ (၂) စီး၊ Y-12 (၁) စီး မိနစ် ၄၀ ဗုံးသီးတွေ ကြဲချတိုက်ခိုက်ခဲ့တယ်လို့ ဆိုပါတယ်။

ဒီတိုက်ခိုက်မှုကြောင့် အရပ်သား ပြည်သူတချို့ သေဆုံး၊ ဒဏ်ရာရမှုများရှိခဲ့ သလို လူနေအဆောက်အအုံတချို့ ပျက်စီးမှု၊ ကျွဲ၊ နွား၊ တိရစ္ဆာန် တချို့ သေဆုံးမှု၊ဗုံးစထိမှန်မှုတွေ ရှိတယ်လို့ AA က ဆိုပါတယ်။

အလားတူ အဲ့ဒီနေ့ တစ်ရက်တည်းမှာ စစ်အုပ်စု တပ်က ကျောက်တော် မြို့နယ်၊ သုံးခွအနီးပတ်ဝန်းကျင်သို့လည်း ဂျက်ဖိုက်တာ (၄) စီး နဲ့ ည (၁၀) နာရီခန့်မှ (၁၀) နာရီ (၂၅) မိနစ်အထိ ပေါင် (၅၀၀) ဗုံး ၈ လုံးဖြင့် လာရောက်ပစ် ခတ်တိုက်ခိုက်ခဲ့ တယ်လို့ ဆိုပါတယ်။

အဲ့ဒီနောက်ပိုင်း (၁၀) နာရီ (၂၈) မိနစ်မှာ လည်း Y-12 ထောက်ပို့လေယာဉ် (၂) စီးမှ Cluster Boombအမျိုးအစား (၂၄) လုံးခန့်လာရောက်ဗုံးကြဲတိုက်ခိုက်ခဲ့တယ်လို့ AA က ဆိုပါတယ်။

ဒီဗုံးကြဲတိုက်ခိုက်မှုကြောင့် အရပ်သားပြည်သူ (၁) ဦး၊ အကျဉ်းထောင်ဆေးဝန်ထမ်း (၁) ဦး၊ ကလေး (၁) ဦး သေဆုံးခဲ့ပြီး အရပ်သား ၁၀ ဦး ဒဏ်ရာရရှိခဲ့တယ်လို့ လည်း ဆိုပါတယ်။

ဒါ့အပြင် ကျောက်တော်မြို့နယ်၊ ပြိုင်းချောင်းကျေးရွာမှ အရပ်သား တစ်ဦး ပိုင်ဆိုင်သော နွား (၇) ကောင်လည်း ဤဗုံးကြဲတိုက်ခိုက်မှုကြောင့် သေဆုံးခဲ့တယ်လို့ သိရပါတယ်။

ဘီးလင်းနဲ့ ဘားအံမြို့နယ်တွေမှာ စစ်အုပ်စုက ဧပြီတလလုံး လေကြောင်းတိုက်ခိုက်၊ အရပ်သား ၁ဦးသေဆုံး

Connect Burma | မေ ၈

မွန်ပြည်နယ် ၊ ဘီလင်းမြို့နယ်နဲ့ ကရင်ပြည်နယ် ၊ ဘားအံမြို့နယ်တွေအတွင်းက ကျေးရွာတွေကို အာဏာသိမ်းစစ်အုပ်စုက ဧပြီလ ၁လလုံး လေကြောင်းက ဗုံကြဲတိုက်ခိုက်တာအပြင် လက်နက်ကြီးနဲ့ ပစ်ခတ်တိုက်ခိုက်ခဲ့တာတွေကြောင့် ထိခိုက်ပျက်စီးမှုတွေရှိခဲ့ပြီး အရပ်သား ၁ဦးသေဆုံးခဲ့တယ်လို့ ကရင်အမျိုးသားအစည်းအရုံး -KNUက ထုတ်ပြန်ပါတယ်။

ပြီးခဲ့တဲ့ ဧပြီလ ၁လလုံး အဆိုပါ မြို့နယ် ၂ခုက ကျေးရွာတွေကို စစ်တပ်က လေကြောင်းတိုက်ခိုက်မှုတွေ နေ့စဉ်လုပ်ဆောင်ခဲ့ပြီး ဧပြီ လ ၁၉ရက်ကစလို့ လကုန်အထိ ဘီးလင်းမြို့နယ် ဝင်းတာပန်ကျေးရွာအုပ်စုအတွင်းကို ဂျက်ဖိုက်တာတိုက်လေယာဉ်တွေအပြင် ပါရာမော်တာတွေအသုံးပြုပြီး အကြိမ်ကြိမ် ဗုံးကြဲတိုက်ခိုက်ခဲ့တယ်လို့ ဆိုပါတယ်။

ဧပြီလ ၁၉ ရက်နေ့ လေကြောင်းတိုက်ခိုက်မှုကြောင့် ဝင်းတာပန်ကျေးရွာအုပ်စုအတွင်းက ဝင်းတာပန်ရွာ၊ ဝင်းတာပန်အထက်ရွာနဲ့ မြစ်ကျိုးကျေးရွာအုပ်စုက ကျောက်ဖျာရွာတွေမှာ နေအိမ်၂လုံး၊စာသင်ကျောင်း၁ကျောင်း၊ ဘုန်းကြီးကျောင်းမုခ်ဝ ၁ခု ၊ဓမ္မာရုံ ၁လုံး၊ စက်သုံးဆီအရောင်းဆိုင်နဲ့ သင်္ချိုင်းကုန်းဇရပ် ၁ခု ပျက်စီးခဲ့ပြီး နွား ၅ ကောင်သေဆုံးခဲ့တယ်လို့ ဆိုပါတယ်။

ဧပြီလ ၂၂ရက်နေ့ မှာလဲ စစ်တပ်က လေကြောင်းတိုက်ခိုက်တာကြောင့် ကျောက်ဖျာရွာက နေအိမ် ၈လုံး၊ လယ်ခလော့ ထို့ပွာကလော် နေအိမ် ၃ လုံး၊ ဝင်းတာပန်ရွာနဲ့ဝင်းတာပန်အထက်ရွာတွေမှာ နေအိမ် ၅ လုံး ထိခိုက်ပျက်စီးခဲ့တယ်လို့ ဆိုပါတယ်။

အလားတူဘဲ ဧပြီလ ၂၃ရက်နေ့ မှာစစ်တပ်ရဲ့ ထပ်မံ လေကြောင်းတိုက်ခိုက်မှုကြောင့် ဝင်းတာပန်ရွာ နေအိမ် ၉ လုံးထိခိုက်ပျက်စီးခဲ့ပြီး ဧပြီလ ၂၅ ရက်နေ့ မှာတော့ ဘီးလင်းမြို့နယ်အတွင်းက အရပ်သားလုပ်ငန်းခွင် တွေထိခိုက်ပျက်စီးခဲ့တယ်လို့ KNUက ဆိုပါတယ်။

ဧပြီလ ၂၇ရက်နေ့မှာတော့ စစ်တပ်က လေကြောင်းတိုက်ခိုက်တာအပြင် မြေပြင်ကနေ စစ်ကြောင်းထိုးပြီး ဝင်းတာပန်ကျေးရွာက အရပ်သား လူနေအိမ်တွေကို မီးရှို့ ဖျက်ဆီးခဲ့ကြတယ်လို့ ဆိုပါတယ်။

အဆိုပါနေ့မှာဘဲ ဘားအံမြို့နယ်အတွင်းက ထီးကျော်ခီးရွာအနီးကို စစ်တပ်က ၁၂၀ မမ လက်နက်ကြီးနဲ့ ပစ်ခတ်ခဲ့ရာ အသက် ၈၈ နှစ်အရွယ် ဒေသခံအမျိုးသမီး တဦး လက်နက်ကြီးကျည်စထိမှန် သေဆုံးခဲ့တယ်လို့ သိရပါတယ်။

ဧပြီလ ၂၈ ရက်ကနေ ၃၀ ရက်နေ့အထိ စစ်တပ်က ပါရာမော်တာတွေ လေယာဥ်တွေနဲ့ လေကြောင်းတိုက်ခိုက်ခဲ့တာကြောင့် အရပ်သားပြည်သူ နေအိမ်အများအပြား မီးလောင် ထိခိုက်ပျက်စီးခဲ့ရပြီး စာရင်းအတိအကျ ကောက်ယူနိုင်ခြင်းမရှိသေးဘူးလို့ KNUက ထုတ်ပြန်ထားပါတယ်။