Taste Window Food Magazine

Bibimpap (ကိုရီးယားထမင်းသုပ်)
ဒီတစ်ခေါက်မှာတော့ ကိုရီးယားစတိုင်လ်ထမင်းသုပ်လေး လုပ်စားပါမယ်။ ကိုရီးယားဟင်းတွေလုပ်စားတဲ့အခါမှာ မရှိမဖြစ်ကတော့ ကိုရီးယားငရုတ်သီးအနှစ် (Gochyjang)ပဲပေါ့။ ထမင်းသုပ်မှာလည်း ငရုတ်သီးအနှစ်ကို အဓိကထားပြီး ထမင်းရယ်၊ အသီးအရွက်တွေနဲ့ သုပ်လေ့ရှိတယ်။ ဒါဆို ကြည့်လိုက်ကြရအောင်။
ပါဝင်ပစ္စည်းများ
ထမင်း - ၂၀၀ ဂရမ်
မုန်လာဥနီ - ၃၀ ဂရမ်
ကြက်ဥ - ၁ လုံး (ကြော်ထားပါ)
ဟင်းနုနယ်ရွက် - ၃၀ ဂရမ် (ခြွေထားပါ)
သခွားသီး - ၃၀ ဂရမ်
ပဲပင်ပေါက် - ၃၀ ဂရမ် (ရေဆေးသန့်စင်ထားပါ)
ကင်မ်ချီ - ၂၀ ဂရမ်
ဆီ - ၁၀၀ မီလီလီတာ
ဆား - အနည်းငယ်
ငရုတ်ကောင်းမှုန့် - အနည်းငယ်
ဆော့စ်စပ်ရန်
အရိုးပြုတ်ရည် - ၁၅၀ မီလီလီတာ
နှမ်းဆီမွှေး - လက်ဖက်ရည်ဇွန်း ၁ ဇွန်း
ပန်းသီးရှလကာရည် - လက်ဖက်ရည်ဇွန်း ၁ ဇွန်း
ကိုရီးယားငရုတ်သီးအနှစ် - စားပွဲဇွန်း ၂ ဇွန်း
ချင်း၊ ကြက်သွန်ဖြူ အနှစ် - လက်ဖက်ရည်ဇွန်း ၁ ဇွန်း
ပဲငံပြာရည် - လက်ဖက်ရည်ဇွန်း ၁ ဇွန်း
ပြုလုပ်ပုံ
မုန်လာဥနီကို‌ အနေတော်အချောင်းငယ်များ လှီးပြီး အိုးတစ်လုံးထဲသို့ ဆီအနည်းငယ်၊ ဆား၊ ငရုတ်ကောင်းတို့ထည့်ပြီး လှိမ့်ပေးပါ။ ဟင်းနုနယ်ရွက်၊ ပဲပင်‌ပေါက်တို့ကိုလည်း ရေနွေးဖျောပြီး နှမ်းဆီမွှေး၊ ဆား၊ ငရုတ်ကောင်းတို့နှင့် လှိမ့်ပေးပါ။ ပြီးလျှင် ထမင်းကို နှမ်းဆီမွှေး၊ ဆား၊ ငရုတ်ကောင်းတို့နှင့် နယ်ပေးပါ။ ပြီးလျှင် အိုးတစ်လုံးထဲ ပဲငံပြာရည်၊ ကိုရီးယားငရုတ်သီးအနှစ်၊ ပန်းသီးရှလကာရည်၊ ချင်းကြက်သွန်ဖြူအနှစ်၊ အရိုးပြုတ်ရည်တို့ထည့်ပြီး မီးအေးအေးဖြင့် တည်ပါ။ ခပ်ပျစ်ပျစ်ဖြစ်လာလျှင် နှမ်းဆီမွှေးထည့်ပြီး မီးပိတ်လိုက်ပါ။ ပန်းကန်တစ်လုံးထဲကို ခုနက အရသာနယ်ထားသည့်ထမင်းကို ထည့်ပါ။ ပြီးလျှင် အသီးအရွက်များကို ထည့်ပါ။ ကြက်ဥကြော်ထားတာထည့်ပါ။ အပေါ်ကနေ ခုနက ကျိုထားသည့်ဆော့စ်ကို ထည့်လိုက်လျှင် စားချင်စဖွယ် ကိုရီးယားစတိုင်လ်ထမင်းသုပ်လေး ရပါပြီ။

ဤဟင်းလျာကို Taste Window Magazine အတွဲ(၁၂)၊ အမှတ် (၇)၊ ၂၀၂၆ မတ်လထုတ်မှ ကောက်နှုတ်ဖော်ပြထားခြင်း ဖြစ်ပါသည်။
ထွက်ရှိပြီးသား Taste Window Magazine များကိုလည်း Ebook အနေဖြင့် အခမဲ့ ဖတ်ရှုနိုင်ပါတယ်။



#နေခြည်
#ကိုရီးယားထမင်းသုပ်

နွားနို့ခဲခရမ်းချဉ်သီးချက် ထမင်းပုံစား
အညာနွားနို့ခဲဆိမ့်ဆိမ့်လေးကို ခရမ်းချဉ်သီးအနှစ်ပျစ်ပျစ်လေးနဲ့ ချက်စားရအောင်။ အရသာရှိပြီး လုပ်ရတာလည်း လွယ်ကူပါတယ်။
ပါဝင်ပစ္စည်းများ
နွားနို့ခဲ - ၃၅၀ ဂရမ်
ခရမ်းချဉ်သီး - ၅ လုံး
ကြက်သွန်နီ - အသေး ၄ လုံး
ဆီ - ၇၅ မီလီလီတာ
ငါးငံပြာရည် - စားပွဲဇွန်း ၁ ဇွန်း
သကြား - လက်ဖက်ရည်ဇွန်း ၁/၄ ဇွန်း
နနွင်းမှုန့် - လက်ဖက်ရည်ဇွန်း ၁/၄ ဇွန်း
အရောင်တင်မှုန့် - လက်ဖက်ရည်ဇွန်း ၁ ဇွန်း
ငရုတ်သီးစိမ်း - ၅ တောင့်
နံနံပင် - ၅ ပင်
ရေနွေး - ၈၀ မီလီလီတာ
ပြုလုပ်ပုံ
ခရမ်းချဉ်သီးအနှစ်ချက်ရန်အတွက် ခရမ်းချဉ်သီးကို အိုးတစ်လုံးထဲထည့်ပြီး ပြုတ်ထားလိုက်ပါ။ ပြီးလျှင် နွားနို့ခဲကို အနေတော်တုံးပါ။ ကြက်သွန်နီကို နုပ်နုပ်စဉ်းပါ။ ခရမ်းချဉ်သီးပြုတ်ရလာပြီဆိုလျှင် ကြေညက်သွားသည်အထိ နုပ်နုပ်စဉ်းပါ။ ဒါမှသာ အနှစ်ချက်သည့်အခါမှာ အဖက်တေမကျန်ဘဲ အနှစ်ပျစ်ပျစ်လေး ဖြစ်လာမှာပါ။ ချက်မည့်အိုးထဲကို ဆီ ထည့်ပြီး ဆီပူလာလျှင် ကြက်သွန်နီ ထည့်ပါ။ မီးအေးအေးနှင့် ကြက်သွန်နီရွှေရောင်သန်းလာသည်အထိ ကြော်ပါ။ ပြီးလျှင် နနွင်းမှုန့် ၊ အရောင်တင်မှုန့်၊ ငါးငံပြာရည်၊ သကြားတို့ထည့်ပြီး ဆီသတ်ပါ။ ပြီးလျှင် ခရမ်းချဉ်သီး ထည့်ပါ။ မီးအေးအေးလေးနဲ့ ရေ‌နွေးအနည်းငယ်ထည့်ပြီး အနှစ်ဖြစ်လာသည်အထိ တည်ထားပါ။
ပြီးလျှင် အဆင်သင့်တုံးထားသည့် နွားနို့ခဲထည့်ပြီး အရသာများဝင်သွားအောင် အဖုံး‌အုပ်ပေးပါ။ (နွားနို့ခဲက ရေထွက်လာမှာဖြစ်တဲ့အတွက် နောက်ထပ် ရေထပ်မထည့်ပါနဲ့)။ ပြီးလျှင် ငရုတ်သီးစိမ်း၊ နံနံပင်ထည့်ပြီး တစ်မိနစ်လောက် အဖုံးအုပ်ပြီးလျှင် ရပါပြီ။ နွားနို့ခဲခရမ်းချဉ်သီးချက်ဆိမ့်ဆိမ့်လေးကို ထမင်းပူပူလေးနဲ့ အရသာရှိစွာ တွဲဖက်သုံးဆောင်နိုင်ပါပြီ။



#နေခြည်
#နွားနို့ခဲခရမ်းချဉ်သီးချက်ထမင်းပုံစား